४५ दिने एडभान्स तह–२ सिलाई कटाई तालिम निम्जल

पहुरा समाचारदाता
हसुलिया, २५ फागुन । कैलारी गाउँपालिका वडा नम्बर ५ बैसपुरमे ४५ दिने एडभान्स तह–२ सिलाई कटाई तालिम निम्जल बा । कैलारी गाउँपालिकाके आयोजनामे गैल माघ १० गतेसे फागुन २५ गतेसम हुइल तालिम हुइल रहे ।

कैलारी गाउँपालिका उपाध्यक्ष भगवतीकुमारी चौधरीके बरका पहुनामे हुइल तालिम समापन कार्यक्रममे महिलाहुकनके आत्म निर्भर बनाइक लाग सिलाई कटाईके एडभान्स तालिम डेहुवाइल बटैली । उहाँ कहली, ‘महिलाहुक्रनहे यी तालिमपाछे अपने व्यवसाय कैना सहजुल हुई । तह–२ के तालिमसे सिलाई कटाईमे निखारतापन नानल हुई ।’ तह–१ सिखल महिला अपन लत्ताकपरा सिएजन्ठै । ओइनहे अपन पसल संचालन करटी आयआर्जनमे बृद्धि करिट कहिके यी मेरिक तालिम डेहल हो ।

गाउँपालिकाके आर्थिक सहयोगमे वडा नम्बर ५ के पवेरा, वडा नम्बर ४ के के गाउँमे तह–२ के सिलाई कटाई तालिम डेहल गाउँपालिका उपाध्यक्ष बटैली । कार्यक्रममे वडा नम्बर ५ के वडा अध्यक्ष विष्णुप्रसाद चौधरी, कार्यपालिका सदस्य मनिराम कुमाल, वडा सदस्य भागुदास चौधरी, अनारकली चौधरी, पवित्रा परियार, कैलारी गाउँपालिकाके मेडपाके निर्मला चौधरीलगायतके सहभागिता रहे ।

तालिम समापन कार्यक्रमके संचालन कैलारी गाउँपालिकाके मेडपाके प्रमुख प्रदीप चौधरी करल रहिट । तालिममे २६ जाने सहभागी रहिट ।