बालबालिका संरक्षण, महिला समानता ओ सामाजिक न्यायके लाग नक्साङकन कैना

पहुरा समाचारदाता
हसुलिया, २५ फागुन । कैलारी गाउँपालिकामे बालबालिका संरक्षण, महिला समानता ओ सामाजिक न्यायके लाग नक्साङकन कैना हुइल बा ।

यूनिसेफके आर्थिक सहयोगमे सामुदायिक विकास केन्द्र डोटीके आयोजना ओ कैलारी गाउँपालिका महिला तथा बालबालिका शाखाके समन्वयमे विफेक रोज हसुलियामे सरोकारवाला निकायविच ‘११४औं अन्तर्राष्ट्रिय महिला दिवसके अवसरमे बाल संरक्षण तथा लैङिक हिंसा निवारणके क्षेत्रमे सेवा प्रदायक संघ संस्थाहुकनके नक्साङन’ विषयक पालिका स्तरीय कार्यशालामे कैलारी गाउँपालिकामे बालबालिका संरक्षण, महिला समानता ओ सामाजिक न्यायके लाग नक्साङकन कैना निर्णय हुइल हो ।

गाउँपालिका उपाध्यक्ष भगवतीकुमारी चौधरीके अध्यक्षतामे हुइल कार्यक्रममे उहाँ जोखिमे रहल बालबालिका, टमान मेरिक हिंसामे परल महिलाहुकनके तथ्याङक संकलन करके स्थानीय सरकार, गाउँपालिका अन्र्तगत लैङिक समानता तथा सामाजिकीकरण ओ बालबालिकाके क्षेत्रमे जिम्मेवारशिल संघ संस्था समन्वय करके जैना जरुरी रहल बटैली । उहाँ कहली, ‘महिलाहुक्रन उप्पर टमान मेरिक हिंसा हुइटी रहल बा । सामाजिक समावेशीकरण नइहुइनाफे हिंसा हो । महिलाहुकनहे समानुपतिक सहभागिता कराई अवस्था नइहो ।’

कार्यक्रममे कैलारी गाउँपालिकाके सामाजिक विकास समिति संयोजक तथा वडा नम्बर ३ के वडा अध्यक्ष सन्तराम चौधरी, बाल कल्याण संघ टिकापुरके परियोजना संयोजक परसुराम चौधरी, सामुदायिक विकास केन्द्र डोटीके करुणा चौधरी, कैलारी गाउँपालिका महिला तथा बालबालिका शाखा प्रमुख बालकुमारी चौधरीलगायत आ आपन सुझाव राखल रहिट ।

कार्यक्रममे सहजीकरण कैलारी गाउँपालिकाके सामाजिक विकास शाखा प्रमुख यगम कलेल करल रहिट । कार्यक्रममे गाउँपालिका अन्र्तगत लैङिक समानता तथा सामाजिकीकरण ओ बालबालिकाके क्षेत्रमे जिम्मेवारशिल संघ संस्थाके प्रतिनिधिहुकनके सहभागिता रहे ।