परमेश्वरको मण्डलीके आयोजनामे १०७ पिन्ट रगत संकलन
पहुरा समाचारदाता
धनगढी, २८ फागुन । विश्व सुसमाचार समाज परमेश्वरको मण्डलीके आयोजनामे हुइल वृहत रक्तदान कार्यक्रममे १०७ पिन्ट रगत संकलन हुइल बा ।
निस्तार चाडके अवसरमे अँटवारके रोज धनगढीमे आयोजित रक्तदान कार्यक्रम भारी मात्रमे रगत संकलन हुइल हो । गैल वर्ष ६१ औं नेपाल रेडक्रस स्थापना दिवसके अवसरमे प्रशंसापत्र प्राप्त करल परमेश्वरके मण्डली विश्व सुखमाचार समाज महासचिव पास्टर जिम जु छत्त, यी पाछेक परमेश्वरको मण्डली कहल ओरसे १० तारिखके २७ गतेके दिन वृहत् रक्तदान कार्यक्रमके आयोजना करल । यी एक निस्तार चाडके प्रेम, जीवन बचैना प्रेम, रतदान अभियान’ हो । बाइयत्त अनुसार निस्तार चाडचाहिँ विपति पार हुके जाइठ कना अर्थ वोकल परमेश्वरके चाड हो ।
परमेश्वरको मण्डलीके एक अधिकारी ओ कार्यक्रमके संयोजक अनिल मोक्तान “येशू खीष्ट कृसमे बलि हुइनासे अघिल्का दिन उहाँ अपन देह ओ रगतहे संकेत कैना निस्तार भैयाके रोटी र दाखमद्यसे नयाँ करार स्थापना करके मानव जातिहे पाप क्षमा ओ अनन्त जीवन प्रदान करलै ।
निस्तार–चाड फे रगत ओ जीवनसंग सम्बन्धित हुइल ओरसे ओ नेपाल रेडक्रस सोसाइटीके “रक्तदान जीवन दान” कना कहाई रहल ओरसे यिहीहे आत्मासात करटी यी रक्तदान कार्यक्रम संचालन करे लागल बटैलै । निस्तार चाडमे समाहित खीष्टके प्रेम ओ बलिदानके अनुकरण करटी रक्त अभावसे जीवन जोखिममे परल मनैनथेन प्रेम बाँटेक लाग सन्तहुक्रे एक्के चित्तसे लागल रहिट । हमार छिमेकी सक्कुहुनके जीवन ओ स्वास्थ्य पुनस्र्थापना हुके हर्षपूर्ण जीवन जिए सेकिट कना चाहठै कहटी अपन शुभकामना व्यक्त करलै ।
कार्यक्रमके बरका पहुना धनगढी उपमहानगरपालिकाके उप मेयर कन्दकला कुमारी राना रगतके अभाव हुइटी रहल ओरसे रक्तदान सह्रनीय कार्य रहल बटैली । उहाँ जौनफे धर्मके सार सुशासन, अनुशासन सिखैना रहल बटैली ।
भीमदत्तसे रक्तदान करे आइल मण्डलीके एक सदस्य रञ्जित चौधरी रक्तदान कार्यक्रममे सहभागी हुई पाके एक जानेक जीवन बचाइल अनुभूति हुइल बटैली । टीकापुरसे आइल एक सदस्य परमेश्वरके शिक्षा अनुसार छिमेकी प्रेमहे व्यवहारमे लागु करटी मोर एक पिन्ट रगतसे अज्ञात व्यक्तिके जीवन बचाई पाइलमे खुशी लागल बटैलै ।
नेपाल रेडक्रस सोसाइटी कैलालीके जिल्ला सभापति बासुदेव विनाडी परमेश्वरको मण्डलीसे विश्वव्यापी रूपमे यैसिन मानव परोपकारके काम करटी आइल बटैलै । अब्बे विश्वव्यापी रूपमे १२८९ औं रक्तदान कार्यक्रम करटै । जीवन बचैना कार्यमे सहकार्य करल कहटी उहाँ मण्डलीप्रति कृतज्ञता व्यक्त करलै ।
नेपाल रेडक्रस मोमाइटी कैलालीके रक्त संचार विभाग प्रमुख धारणी पन्त मण्डलीके उत्कृष्ट कार्य रहल ओरसे अइना दिनमेफे यैसिन कार्यक्रम आयोजना करटी आग्रह करलै । परमेश्वरको मण्डलीमे आयोजित कार्यक्रममे धनगढी लगायत टीकापुर, भिमदत्त, घोडाघोडी, गोदावरी, गौरीगंगा लगायत ठाउँसे विश्वासीहुक्रे, ओइनके परिवार, छिमेकी, चिनाजाना करके करीव २५० जानेक सहभागिता रहल रहे ।
प्रत्येक वर्ष वृहत् रक्तदान कार्यक्रम करटी आइल परमेश्वरके मण्डलीसे यी वर्षफे जनवरीमे रुपन्देही जिल्लाके तिलोत्तमा, फेव्रुअरीमे बाँके जिल्लाके नेपालगञ्ज ओ पर्सा जिल्लाके वीरगन्ज, मार्चमे भक्तपुरस्थित मध्यपुर ठिमीमे रक्तदान कार्यक्रम आयोजना करल रहे । कुल ७०० जाने रक्तदान करलै ।
रक्तदान केल नाही गैल महिना ११ तारिख नुवाकोटके तुप्चेश्वरस्थित श्री कौकेश्वरी माध्यमिक विद्यालयमे १० थान कम्प्युटर सहयोग करके मण्डलीसे युवाहुकनहेफे समर्थन जनाइल रहे । ओस्टेक करके काठमाडौं, पोखरा, टीकापुर, ललितपुर, भरतपुर ओ हेटौंडामे स्थानीय वातावरणीय सरसफाई जारी करले बा ।
२०७२ सालके भूकम्पके समयमे मण्डलीसे ७१० से ढेर क्षेत्रमे पुनस्र्थापना कार्य, घाहिलहुकनके उद्धार कैना कार्यके नेतृत्व लेनाके साथे यातायात अवरुद्ध हुई पुगल हिमालयके दुर्गम गाउँ सेर्तुङ ओ तिप्लिङके १ हजार घरधुरीहे १४ चो हेलिकप्टरसे खाद्यान्न आपूर्ति करल रहे । भूकम्पसे भत्कल सिन्धुपाल्चोकके श्री प्राथमिक विद्यालय ओ काभ्रेके श्री भवानी माध्यमिक विद्यालयके पुनर्निर्माण करके मण्डलीसे भावी पुस्ताके लाग आशा जगैले बा ।
