चैतन्यके २३ औं वार्षिकोत्सव
पहुरा समाचारदाता
धनगढी, २८ फागुन । धनगढी उपमहानगरपालिका वडा नम्बर ५, शिवनगर स्थित चैतन्य पाठशाला सोम्मारके रोज आपन २३ औं वार्षिकोत्सव तथा अभिभावक दिवस भब्यताके साथ मनैले बा ।
दुई दशक पहिले २०५८ सालमे स्थापना हुइल पाठशाला शिक्षा ओ संस्कारके संगम मूलनारा सहित समाजमे संस्कारयुक्त व्यक्तित्व निर्माणमे जोड डेले बा । प्रधानाध्यापक कटक बहादुर सिंह विद्यालयके विषय वस्तु तथा बार्षिक प्रतिवेदन सुनैटी पाठशालासेआजके समय ओ शिक्षामे डेखल अभावके प्रत्याभूत प्ररिपुर्तिके लाग स्थापित आधुनिक ओ पूर्ण स्कूल रहल बटाइल रहिट ।
उहाँ कहलै,‘आजके शिक्षासे पूर्ण मनै नैहोके मेसिन ओ जागिरे उत्पादन करटी रहल समयमे चैतन्य पाठशाला मूल्यसहितके एकठो संस्कारयुक्त मानव निर्माणके लाग स्थापना हुइल साधना शिविर हो ।’
प्रधानाध्यापक सिँहविद्यालयसे शिक्षासहित संस्कारके सिकाईसँगे विद्यालय तहसे विद्यार्थीनहे टमान रचनात्मक कृयाकलाप ओर फेन प्रशिक्षि करैटी रहल बटैलै । उहाँके अनुसार विद्यालयमे संगीत, चित्रकला, नृत्य, सिर्जनात्मक लेखन ओ वक्तृत्वकला सहित पाँच भागमे विद्यार्थीनके रुचिअनुसार वर्गीकरण कैके उ विद्यामे विद्यार्थीनहे पाछेसमम दिगो ओ व्यावसायिक रुपमे उभे सेक्ना मेरके प्रशिक्षण डेटी रहल बटाइल रहिट ।
उहाँ इ मेरके प्रशिक्षणसे विद्याथीनके सीप, कला, क्षमता ओ ज्ञानगुनके बाटके वृद्धि विकास हुइना बटाइल रहिट ।
कितावी ज्ञान वाहेक यैसिन रचनात्मक ओ सिर्जनशिलतासेफे विद्यार्थीनके वौद्धिकतामे निखार अइना उहाँ बटाइल रहिट ।
पाठशालाके सीइओ गणेशप्रसाद जोशी पाठशालासे २० वर्षपाछे काम लग्ना शैक्षिक गुणस्तरीय शिक्षा डेटी रहल बटाइल रहिट । विद्यालयमे वेद ओ विज्ञानहे सँगसँगे पढैटी रहल ओ विद्यार्थीहुकनहे अब्बेक समय परिवेश अनुसार आवश्यकता परल शिक्षा अनुकूल स्मार्ट बोर्डसेफे पठनपाठन समेत करैटी रहल उहाँ बटैलै ।
इहे बिच चैतन्यसे सामाजिक कार्य ओर फेन अग्रसर रहल जनाइल बा । चैतन्य ग्रुप अफ कम्पनी अन्र्गत टमान सामाजिक एंव सकारत्मक कार्य कैटी आइल प्राधान्यपाक सिंह जानकारी डेलै ।
पाठशालासे एक लाखके चैतन्य भासकीय सुधार एवं सुशासन प्रवद्र्धन पुरस्कार स्थापना कैले बा । जौन पुरस्कार पहिल व्यक्तिके रुपमे पूर्व मुख्य सचिव डा. विमल कोइरालाहे प्रदान करले बा ।
ओस्टके गत जाजरकोटमे गैल विनासकारी भूकम्प पीडितहे एकलाख सहयोग, समजाके टमान क्षेत्रमे क्रियाशिल एवं अनुकरणीय उत्प्रेरणादायी व्यक्तित्वहे चैतन्य शिक्षा साधना सम्मान, दृष्टि फाउण्डेशनहे सहयोग लगायत कैटी आइल प्राधानाध्यापक सिंह बटाइल रहिट ।
कार्यक्रमके पहुनामे मदन पुरस्कार विजेता डा.नवराज लम्साल, सुदूरपश्चिम प्रदेश सभा सदस्य डा. तारा जोशी, समाजसेवी, बौद्धिक व्यक्तित्व लगायत रहल रहिट । कार्यक्रम शिक्षक अभिभावक समिति अध्यक्ष ईश्वर गिरीके अध्यक्षतामे हुइल रहे । कार्यक्रमके सञ्चालन शिक्षक रमेश छेडाल ओ हेमा जोशी करल रही ।
उहे बिच वार्षिकोत्सवके अवसरमे टमान प्रतियोगितामे भाग लेहुइया प्रतियोगि विद्यार्थी, अभिभावक, समाजसेवीहुक्रनहे सम्मान तथा प्रमाणपत्र वितरण करल रहे ।
