विकास निर्माणसंँगे वातावरण संरक्षणमे जोड

पहुरा समाचारदाता
धनगढी, १ चैत । विकास निर्माण संगसँगे वातावरण संरक्षण ओ वातावरणीय अधिकारहे ध्यान डेहे पर्ना जोर डेगिल बा ।

अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालयके सहयोगमे घोडाघोडी नगरपालिकास्तरीय मानव अधिकार समुहके आयोजनामे वातावरण संरक्षण ओ वातावरणीय अधिकार सम्बन्धी कार्याशालामे सहभागीहुक्रे उ बाटमे जोर डेहल रहिट ।

दशसथ माविके निमित्त प्रधानाध्यापक खगेन्द चन्द समुदायमे निर्माण हुइटी रहल सडकमे माटी डारके गाडी हक्टी मने निर्माण करुइया पक्षसे पानी नइदारेबेर धुर उरके टमान रोगके संक्रमण हुइटी रहल बटैलै । उहाँ कहलै, ‘विकास निर्माण करेबेर वैकल्पिक डगर नइबनाई नेंगघुम करुइयाहे समस्या आइल बा । उहोर पानी केल डारके छोरलमे भारी गाडीके आवागमन हुईबेर धुरधुँवासे नेंग्नाघुम्ना समस्या आइल बा ।’

पछिल्का समयमे लडियानाला अतिक्रमण कैना क्रम बह्रल ओरसे यिहीहे नियन्त्रण करे नइसेक्लेसे बर्षायाममे डुबानके समस्या अइना ओर सजक रहना उहाँ आग्रह करलै ।

घोडाघोडी नगरपालिकाके कार्यपालिका सदस्य मानबहादुर चौधरी स्थानीयह्ुक्रे डगरमे पशुचौपाय बाँध्न करल कारण दुर्घटनाके जोखिमके साथसाथे फोहोर व्यवस्थापनमे चुनौती थपल बटैलै । सडक निर्माण कम्पनीसे निर्माणधीन सडकमे पानी नइछिटेबेर धुरधुँवासे वातावरण प्रदुर्षित हुइल बटैलै ।

मानव अधिकार समुहके अध्यक्ष आशा परियार घोडाघोडी नगरपालिका—१० पहलमानपुरस्थित दिनेश राइस मिलसे उत्सर्जन हुइना फोहोरमे व्यवस्थापन कैना जरुरी रहल बटैली ।

बाल अधिकार चेतना समुहके अध्यक्ष निसा सन्ज्याल बालबालिकाहुक्रे अतिरिक्त कक्षाके लाग सकारे विद्यालय आइबेर सडकके पोलमे बत्ती नइहुइल कारण विद्यार्थी समस्यामे परल बटैली ।

स्थानीय जमुना कँडेल घोडाघोडी नगरपालिका—२ के शाहीपुरमे स्थानीयहुक्रे शौचालयके फोहोर खुल्ला रुपमे विर्सजन करेबेर वरपर दुर्गन्धित हुइल ओरसे व्यवस्थापनके लाग पालिकाहे पहल कर डेना मानव अधिकार समूहहे आग्रह करलै ।

इन्सेक जिल्ला कार्यक्रम सहजकर्ता कैलाश पनेरु राष्ट्रिय वातावरण नीति २०७६ प्रस्तुत करटी नीतिके कार्यान्वयनके अवस्थाके बारे सहजीकरण करल रहिट । उहाँ टिनामे प्रयोग हुइटी रहल विषादी तथा अन्नबाली भण्डारण करेबेर प्रयोग कैना विषादीसे दैनिक रुपमे उपभोक्ताहुक्रे मन्द बिष सेवन करटी रहल बाट उल्लेख करलै । नेपालके खेतीयोग्य जमिनमे रसायनिक मलके प्रयोग हुइटी गैलसे अइना १५ बर्षमे नेपाली माटीमे उत्पादन शक्ति नइरहना विचार रख्लै ।

कार्यक्रममे घोडाघोडी नगरपालिकाके जनप्रतिनिधी, मानव अधिकार समुहके पदाधिकारी, बाल अधिकर चेतना समुहके पदाधिकारी तथा स्थानीयहुकनके सहभागिता रहल रहे ।