विद्यार्थी जुटलै सरसफाई अभियानमे

पहुरा समाचारदाता
धनगढी, ४ चैत । हमार धनगढी हम्रे बनाब, हमार धनगढी सफा धनगढी कना अभियान अन्र्तगत धनगढ्री उपमहानगरपालिकाके विद्यार्थीहुक्रे सरसफाई अभियानमे जुटल बटै ।

अँटवारके रोज धनगढी उपमहानगरपालिका–८ स्थित एरिष्टो बोर्डिङ स्कूलके विद्यार्थी धनगढीके मुख्य सडकके पाँच सय मिटर सरसफाई करले बटै । उ विद्यालयमे अध्ययनरत विद्यार्थी गौरव उपाध्याय विद्यार्थीहुक्रे किताबी ज्ञान लेना केल नाही किताबमे सरसफाई करे परठ कना सिखल ज्ञानहे आज व्यावहारिक रुपमे उटारेक लाग सरसफाई अभियानमे सहभागी हुके मजा कामके सुरुवाट करल बटैलै ।

उहाँ कहलै, ‘अपन घर वारपार सरसफाई कैना सक्कु जानेक कर्तव्य हो । अपन घर वारपारके वातावरण सरसफाई रख्लेसे शारिरीक तथा मानसिक सन्तुलन रना ओ सदैव खुशी रहे सेक्जाइठ ।’

उहे विद्यालयके विद्यार्थी एलिसा गिरी जथाभावी फेकल फोहोर मानव जीवनमे असर परठ । वातावरण सरसफाई राखेक सक्कु जाने आ अपन ठाउँसे लग्लेसे वातावरण सफा धारे सेक्ना बटैली । धनगढी उपमहानगरपालिका डगरमे नेगुइयाहुकनके टमान ठाउँमे फोहोर फेक्ना डस्तविनके व्यवस्था करले बा ।

ओस्टेक करके धनगढी उपमहानगरपालिका–३ चटकपुरमे रहल श्री मणिलेक ईन्टरनेशनल स्कुलमे अध्ययनरत विद्यार्थी बिनिता धामी अपनेहुक्रेफे आज (अँटवारके रोज) सरसफाई अभियानमे जुटल बटैली । उहाँ कहली, ‘घरसे निकरल चिजहे जेहोर टेहोर फेक्डेलेसे फोहोर हुइठ । वातावरण प्रदुशन हुइठ । उहीहे एक ठाउँमे कुरहयाके रख्ना, नगरपालिकाके फोहोर संकलन कैना गाडी आइल बेला ओम्नेहे धारडेलेसे वातावरण सफा राखे सेक्जाइठ ।’

अपनेहुक्रे अपन कैना कर्तव्य सरसफाई अभियानमे जुटल बटैली । उहाँ सरना ओ नइसरना फोहोर अलग छुटयाके रख्ना आग्रह करली ।

ओस्टेक करके धनगढी–४ श्री राष्ट्रिय तुलसीराम माध्यमिक विद्यालयके छात्र सरसफाई समिति सदस्य सुमन भट्टफे अपनेहुक्रे सरसफाईमे जुटल बटैलै । हमार धनगढी हम्रे बनाब, हमार धनगढी सफा धनगढी कना अभियानहे सार्थक बनाइक लाग धनगढ्री उपमहानगरपालिकाभिटर प्राय सक्कु विद्यालयके विद्यार्थीहुक्रे सरसफाई अभियानमे जुटल बटै । कलेसे टोल–टोलमे टोल विकास समितिसे सरसफाईमे जुटल बटै ।

अँटवारके रोज धनगढी उपमहानगरपालिकासे नगर भिटरके स्वास्थ्यजन्य फोहोरमैला व्यवस्थापनके (सामान्य ओ हानिकारक) के लाग धनगढी उप–महानगरपालिका वडा न. २ निर्माण हुइटी रहल हेल्थ केयर वास्ट ट्रिटमेन्ट फेसिलिटी मे जिआइजेड सेभड चिल्ड्रेनसे प्राप्त हुइल मेसिनरी (२ ठो अटोक्याभ ४०० लि. ओ १ ठो इन्फेक्सन सोलिड वास्ट मेनेजमेन्ट फ्रेक्टिशनल हट टेक्नोजी धरले बा । उ केन्द्रसे स्वास्थ्यजन्य फोहोरमैला व्यवस्थापन धनगढी उपमहानगरपालिकाके नगर प्रमुख गोपाल हमाल बटैलै ।

हरियाली अभियानमे धनगढी उपमहानगर

सुदूरपश्चिम प्रदेशके एक ठो उपमहानगरपालिका धनगढीहे हरियर, सफा ओ सुन्दर बनैना अभियान जारी बा । धनगढीहे हराभरा बनैना अभियानअन्तर्गत टिसरा चरणके हरियो प्रवद्र्धन कार्यक्रम सुरू हुइल बा ।
हरियो प्रवद्र्धन कार्यक्रमके क्रममे शुकके रोजसे धनगढी विमानस्थल जोरना सडकके दुनु किनारामे टेलुवा लगैना काम सुरु हुइल बा । धनगढी उपमहानगरपालिकाके अनुसार टिसरा चरणके हरियो प्रवद्र्धन कार्यक्रममे पाँच हजार पाँच सय ढेर टमान प्रजातीक बोट लगैना लक्ष्य लेहल बा । धनगढी विमानस्थल जोरना सडक तथा वडा नम्बर १३, चक्रपथ ओ वडा नम्बर २ से वडा १४, फूलबारीसमके हुलाकी सडकके दुनु किनारामे वृक्षारोपण कैना कार्यक्रम रहल बा ।
धनगढी उपमहानगरपालिका उपप्रमुख कन्दकला रानाथारु टिसरा चरणके हरियाली प्रवद्र्धन अभियान अन्तर्गत धनगढी विमानस्थलसे ६ लेन सडकसम चार सय ५० टेलुवा लगैना बटैली ।

उपमहानगरपालिका कार्यालयसे टिसरा तेस्रो चरणको हरियाली अभियानमे विमानस्थल सडक, चक्रपथ ओ हुलाकी सडकके दुनु किनारामे टमान प्रजातीके टेलुवा लगैना जनैले बा । उपमहानगरपालिकाके निमित्त प्रमुख प्रशासकीय अधिकृत नरेन्द्रबहादुर खाती कहलै– टिसरा चरणके हरियाली प्रवद्र्धन अभियानमे साढे पाँच हजार ढेर टेलुवा लगाजैना बा ।
उपमहानगरपालिकासे वृहत वृक्षारोपण अभियान सुरु करलथेनसे आम नगरबासीहे समेत अभियानमे सहभागी बनैटी आइल बा । निमित्त प्रमुख प्रशासकीय अधिकृत खाती कहलै– “वृक्षारोपणके लाग व्यक्ति समेत उपमहानगरपालिकाहे आर्थिक सहयोग करटी आइल बटै । हम्रे एक ठो टेलुवा लगाइक लगाइक लाग व्यक्तिसे पाँच हजार रुप्या सहयोगके कार्यक्रम बनैले बटी । नागरिकसे बहुत उत्साहके साथ यी कार्यक्रमहे समर्थन मिलल बा ।

वृक्षारोपण अभियानके क्रममे उपमहानगरपालिकासे आह्वान करलपाछे देशभिटर ओ विदेशमे रहल व्यक्तिसे आर्थिक सहयोग प्राप्त हुइटी रहल बा । निमित्त प्रमुख प्रशासकीय अधिकृत खाती कहलै– नागरिकसे प्राप्त हुइल रकमसे हम्रे टेलुवा ओ घेरबार किनके वृक्षारोपण कार्य आघे बह्रैले बटी । उहाँ नगर प्रमुख .गोपाल हमालके पहलमे धनगढीबासी तथा नेपालके टमान ठाउँ तथा विदेशमे बैठना नेपालीसे आर्थिक सहयोग प्राप्त हुइना क्रम जारी रहल बटैलै ।

उपमहानगरपालिकासे हरियालीयुक्त धनगढी सहर नारासहित चालू आर्थिक वर्ष २०७९÷८० से वृक्षारोपण अभियान आघे बह्रले बा । अभिनसम उपमहानगरपालिकाभिटरके ६ लेन सडकके बीच (मेडियन) ओ दुनु किनारामे वृक्षारोपण हुइटी रहल बा । ओस्टेक करके, क्याम्पस चोकसे मनेहरासमके हुलाकी सडकमेफे वृक्षारोपण कार्य पुरा हुइल बा । बजार क्षेत्रके निर्माण हुसेकल सडकमे समेत बृक्षारोपण ह्ुइल बा ।

नगर प्रमुख हमाल हरियाली धनगढी शहरके नारा साकार पर्ना वृहत रुपमे वृक्षारोपण अभियान आघे बढाइल बटैलै । उहाँ कहलै, – हम्रे आम नगरबासीके साथ ओ समर्थनसे यी अभियान आघे बह्रैटी रहल बटी । नागरिकके स्वामित्व रहल ओरसे यी अभियान सफल हुइना विश्वास बा ।

उपमहानगरपालिकासे लगाइल टेलुवाके सुरक्षाके लाग तारजाली (ट्री–गार्ड) धरनाके साथे मल डरना, डहैना ओ नियमित रुपमे गोडमेल कैना काम करटी रहल बा । हरियाली धनगढी अभियान अन्तर्गत टिसरा चरणसम धनगढीमे ११ हजार ७२४ टेलुवा लगैना जनाइल बा ।