फरार आठ जाने प्रतिवादी पक्राउ
पहुरा समाचारदाता
धनगढी, ५ चैत । सुदूरपश्चिम प्रदेशके टमान जिल्लासे फरार आठ जाने प्रतिवादी पक्राउ परल बटै ।
जिल्ला अदालत कैलालीके टमान मितिके फैसलासे जरिवाना ठहर हुके फरार रहल दुई जाने पक्राउ परल बटै । बन पैदावार बिना ईजाजत ओसार–पोसार मुद्दामे रू.२ लाख ३१ हजार १३६ जरिवाना ठहर ह्ुइल घोडाघोडी न.पा. ६ बैठना धना पार्की, बन मुद्दामे रू.३० हजार २०१ जरिवाना ठहर हुइल धनगढी उपमहानगरपालिका–१३ बैठना कर्णबहादुर बोहराहे जिल्ला प्रहरी कार्यालय कैलाली तथा मातहत प्रहरी ईकाइसे खटल प्रहरी टोली पक्राउ करल हो ।
ओस्टेक करके कञ्चनपुरमे कुटपिट ओ लुटपात मुद्दा लागके फरार रहल दुई जाने पक्राउ बटै । जिल्ला अदालत कञ्चनपुरके टमान मितिके फैसलासे जरिवाना ठहर हुके फरार रहल द्ुई जनहनहे पक्राउ करल हो ।
पक्राउ परुइया कुटपिट मुद्दामे रु.७५० जरिवाना ठहर हुइल दोधारा चाँदनी न.पा.७ बैठना कर्णे दमाई ओ लुटपाट मुद्दामे रु.१८ सय ७५ जरिवाना ठहर हुइल दोधारा चाँदनी न.पा.७ बैठना ईन्द्रबहादुर रावत रहल बटै । ओइनहे जिल्ला प्रहरी कार्यालय कञ्चनपुरसे खटल प्रहरी टोली ओइनहे घर ठेगानासे पक्राउ करल हो ।
ओस्टेक करके जिल्ला अदालत बाजुराके फैसलासे हातहतियार सम्बन्धी कसुर मुद्दामे जनही ९ महिना १७ दिन कैद सजाय ओ रु. १० हजार जरिवाना ठहर हुके फरार रहल चार जाने पक्राउ परल बटै ।
पक्राउ परुइयामे जिल्ला बाजुरा बुढीनन्दा न.पा. ८ बैठना कविन्द्र बोहरा, आईते बोहरा, दले कामी ओ वडा नम्बर १० बैठना पृथ्वी बहादुर सिंह रहल बटै । अँटवारके रोज प्रतिवादीहुकनहे अँटवार अस्थाई प्रहरी पोष्ट पाण्डुसैन, बाजुरासे खटल प्रहरी टोली ओइनहे घर ठेगानासे पक्राउ करल हो । ओइनहे फैसला कार्यान्वयनके लाग प्रहरी अदालत समक्ष पेश करल बा ।
