कैलारी–४ मे प्रजनन स्वास्थ्य शिविर

पहुरा समाचारदाता
हसुलिया, ६ चैत । कैलारी गाउँपालिका वडा नम्बर ४ मे मंगरके रोज संचालन हुइल प्रजनन स्वास्थ्य शिविरमे २ सय २ जाने निशुल्क सेवा पैले बटै ।

कैलारी गाउँपालिका गाउँ कार्यपालिका उपाध्यक्ष भगवतीकुमारी चौधरीके बरका पहुनामे उदघाटन कार्यक्रममे उहाँ निशुल्क स्वास्थ्य शिविरसे विपन्न ओ आर्थिक अवस्था कम्जोर रहल महिला शिविरसे लाभान्वित हुइल बटैली । उहाँ कहली, ‘महिलाहुक्रे लर्कामे जिम्मेवारीसे लेके घरके भारी भारी काम कैना कारण पाठेघरके समस्या झेले परल बा । गैल बरसके निशुल्क स्वास्थ्य शिविरमे ढेर जाने निशुल्क सेवा पाइल रहिट ।’

शिविरमे ९० जाने महिलाके पाठेघर मुहके स्क्रेनिङ, ३१ जाने गर्भवती महिललाके अल्ट्रसाउण्ड, २ जाने महिलाके पाठेघर खसल महिलनमे रिङ पेसरी, १ जनहन पाठेघर खसल महिलाके पाठेघर अप्रेशनके लाग रेफर ओ १६४ जाने महिलाहुकन यौन रोग सम्बन्धी उपचार करल स्वास्थ्य शाखा प्रमुख नरेश कुमार चौधरी बटैलै ।

निशुल्क स्वास्थ्य शिविर वडा नम्बर ४ के वडा अध्यक्ष ठागुराम चौधरीके अध्यक्षतामे हुइल रहे । कार्यक्रममे स्वास्थ्य शाखा प्रमुख नरेशकुमार चौधरी, सहास नेपालके परियोजना अधिकृत, नरेश चौधरी ओरेक नेपालके जिल्ला संयोजक गीता चौधरी, कार्यपालिका सदस्य लालबहादुर विक, वडा सदस्य हरिद्वारी चौधरी, लक्ष्मी चौधरी, सुवा परियारलगायत महिला स्वास्थ्य स्वयं सेविकाहुकनहे सहभागिता रहे । कार्यक्रम संचालन स्वास्थ्य शाखाके अनिता चौधरी करल रहिट ।

कैलारी गाउँपालिके आयोजना तथा सहयोगी हातहरुको समूह (सहास नेपाल) ओ ओरेक नेपालसंगके सहकार्यमे कैलारी गाउँपालिका वार्ड नं ४ के–गाउँ आधारभूत स्वास्थ्य केन्द्रमे विशेषज्ञ चिकित्सक सहितके प्रजनन स्वास्थ्य सम्बन्धी निःशुल्क स्वास्थ्य शिविर हुइल रहे ।

शिविरमे स्त्रीतथा प्रसुती रोग सम्बन्धी विशेषज्ञ चिकित्सकसे स्वास्थ्य परिक्षण तथाजाँच, यौनरोग तथाप्रजनन रोग संग सम्बन्धित रोगके (तल्लो पेट बठैना, उज्जर पानी बहना, यौन अंगमे घाउ खटिरा आदि) जाँच तथा उपचार, पाठेघर खसल (आङ खस्न समस्या) महिलाके उपचार परामर्श तथा अप्रेसन करे पर्ना अवस्थामे निशुल्क अप्रेशनके लाग प्रेषण सुविधा, पाठेघरके क्यान्सर सम्बन्धी निःशुल्क जाँच सुविधा, निःशुल्क मनोसामाजिक परामर्श सेवा, गर्भवती महिलाहुकनहे निशुल्क भिडियो एक्सरे सेवा प्रदान कैगिल रहे ।

ओस्टेक करके अइना १० गते वडा नम्बर १ मनाउँ आधारभूत स्वास्थ्य केन्द्रमेफे विशेषज्ञ चिकित्सकसहितके प्रजनन स्वास्थ्य सम्बन्धी निःशुल्क स्वास्थ्य शिविर सञ्चालन हुइना स्वास्थ्य शाखा प्रमु्ख नरेश चौधरी जानकारी डेलै ।