घोडाघोडीमे फुटबल प्रतियोगिता हुइना
पहुरा समाचारदाता
सुखड, ७ चैत । कैलालीके घोडाघोडी नगपालिका–१, सुखडमे डुसरा वडा अध्यक्ष कप फुटबल प्रतियोगिता २०८० हुइना हुइल बा ।
स्थानीय स्तरमे खेलकुदके पहुँच अभिवृद्धि कैना ओ खेल क्षेत्रमे युवा वर्गके स्फूर्ति बह्राइक लाग डुसरा वडा अध्यक्ष कप फुटबल प्रतियोगिता हुइ लागल हो । वडा अध्यक्ष कप सञ्चालक समितिके आयोजना तथा वडा नम्बर १ के आर्थिक सहयोगमे प्रतियोगिता हुइ लागल जनाइल बा । इहे चैत १० गतेसे प्रतियोगिता सञ्चालन हुइना पत्रकार सम्मेलन मार्फत जानकारी कराइल हो ।
प्रतियोगितामे वडा न १ भिट्टर रहल युवा क्लबके टीम सहभागिता रहना वडा अध्यक्ष कप सञ्चालक समितिके अध्यक्ष वीरेन्द्र शाही पत्रकार सम्मेलनमे जानकारी डेलै । प्रतियोगितामे पहिल हुइया टीमहे ३० हजार नगद सहित ट्रफी,मेडल ओ प्रमाणपत्र प्राप्त कैना जनाइल कलेसे डुसरा हुउइया टीम नगद १५ हजार सहित ट्रफी,मेडल ओ प्रमाणपत्र प्राप्त कैना जनाइल बा ।
साथे उत्कृष्ट खेलाडी, सर्वाधिक गोलकर्ता, उत्कृष्ट गोलकिपरहे पुरस्कारके व्यवस्था समेत रहल अध्यक्ष शाही जानकारी डेलै । चैत १० गतेसे सञ्चालन हुइना प्रतियोगिताके खेल नकआउटके आधारमे खेलाजैना वडा अध्यक्ष कप सञ्चालक समितिके सचिव धर्मेन्द्र विष्ट जानकारी डेलै । इ मेरकेखेलसे युवा वर्गके स्फूर्ति बह्रनाके साथे मनोरञ्जन फेन हुइना उहाँके धारणा रहल रहे ।
लागू औषध न्यूनीकरणमे जोड तथा युवा,बालबालिकाहे खेलकुदके माध्यमसे देश विदेश सम चिन्हैना सोचके साथ प्रतियोगिता सञ्चालन हुइ लागल उहाँ जानकारी डेलै ।
इहे बिच प्रतियोगिताके तयारीहे तीव्र पारल उहाँ बटैलै । पत्रकार सम्मेलनमे घोडाघोडी क्लबसे दुई थान फुटबल वडा अध्यक्ष कप सञ्चालक समितिहे हस्तान्तरण समेत करले बा ।
प्रतियोगितामे सहभागिताके लाग इच्छुक सक्कु टोल तथा युवा क्लबहे चैत्र ९ गते समटीम दर्ता कैना समितिसे आग्रह करले बा । टीमदर्ता निःशुल्क रहल ओ खेल बेलारमे रहल लाली गुराँस युवा क्लबके खेल मैदानमे खेलाजैना जनाइल बा ।
