नवजीवन सहकारी हसुलिया शाखासे होलिके शुभकामना अदान प्रदान कार्यक्रम
पहुरा समाचारदाता
हसुलिया, ८ चैत । नवजीवन सहकारी हसुलिया शाखासे होलि टिहुवारके शुभकामना अदानप्रदान कैगिल बा ।
प्रधान कार्यालय धनगढी रहल सहकारीके कैलारी गाउँपालिका वडा नम्बर १ हसुलियामे स्थापना हुइल शाखासे विफेक रोज एक कार्यक्रमके विच होलि टिहुवारके शुभकामना अदान प्रदान कैगिल हो ।
कैलारी गाउँपालिका अध्यक्ष राजसमझ चौधरीके बरका पहुना हुइल कार्यक्रममे उहाँ देशके आर्थिक तथा सामाजिक विकासमे सहकारी भारी योगदान डेहल बटैलै । उहाँ कहलै, ‘सहकारीसे उद्योगी, व्यवसायी ओ किसानहुकनहे सर्वसुलभ दरमे ऋण लगानीसे ओकर सदुपयोग करे जनुइया ढेर प्रगती करल बटैलै ।
कार्यक्रममे शाखाके प्रमुद एन. के. जोशी सहभागी अतिथिहुकनहे अविर लगाके स्वागत करटी स्थानीयस्तरके साथ, सल्लाहसे सहकारी यहाँसम पुगल बटैलै । उहाँ कहलै, ‘सहकारीसे सामाजिक क्षेत्रमे योगदान करटी रहल बटैलै ।
होलि टिहुवारके शुभकामना अदानप्रदान कार्यक्रममे गाउँपालिको प्रमुख प्रशासकीय अधिकृत लक्ष्मी दत्त भट्ट, शिक्षा शाखा प्रमुख गणेश प्रसाद मिश्र, पशु शाखा प्रमुख सूर्यप्रसाद चौधरी, सामाजिक विकास शाखा प्रमुख यगम कलेल, समाजसेवी ओमकार महतों, कैलारी उद्योग बाणिज्य संघके प्रतिनिधिहुकनहे सहभागिता रहल रहे ।
