लैङिक समानता तथा सामाजिक समावेशीकरण सम्बन्धी क्षमता अभिवृद्धि तालिम

पहुरा समाचारदाता
हसुलिया, ८ चैत । कैलारी गाउँपालिकामे लैङिक समानता तथा सामाजिक समावेशीकरण सम्बन्धी दुई दिने क्षमता अभिवृद्धि तालिम डेगिल बा ।

सिसिएस कैलालीके आयोजनामे मर्सिकोर ओ एमरेड परियोजनाके आर्थिक सहयोगमे गाउँपालिकाके पदाधिकारी, कार्यपालिका सदस्य ओ कर्मचारीहुकनके लैगिंक समानता ओ सामाजिक समावेशिकरणके अवधारणामे साझा बुझाई अभिवृद्धि कैना, लैगिंक समानता, सामाजिक समावेशिकरण मुल प्रवाहीकरणके विषयमे स्थानीय जनप्रतिनिधिहुकनके क्षमता अभिवृद्धि कैना, सुरक्षा ओ संरक्षणके विषयमे न्यायीक समितिके पदाधिकारीहुकनसंग छलफल कैना उद्देश्यसे दुई दिने लैङिक समानता तथा सामाजिक समावेशीकरण सम्बन्धी क्षमता अभिवृद्धि तालिम डेहल हो ।

गाउँपालिका अध्यक्ष राजसमझ चौधरीके बरका पहुना ओ गाउँपालिका उपाध्यक्ष भगवतीकुमारी चौधरीके विशिष्ट पहुनामे दुई दिने तालिम हुइल रहे । तालिममे मर्सिकोर नेपालके वरिष्ठ लैङिक समानता तथा सामाजिक समावेशीकरण अधिकृत संगीता अधिकारी सहजीकरण करल रहिट ।

पहिल दिन लैंगिक समानता, सामाजिक समावेशिकरणके अवधारणा, मुलप्रवाहीकरण, विकास ओ सामाजिक न्याय, लैंगिक विभेदमे आधारित हिंसा, प्रकार ओ असर, लैंगिक विभेदमे आधारित हिंसा विरुद्धके कानूनी प्रावधानबारे सहजीकरण कैगिल रहे ।

ओस्टेक दुसरा दिन विपद जोखिम व्यवस्थापनमे लैगिंक समानता तथा सामाजिक समावेशिकरण, लैङिक समानता, सामाजिक समावेशिकरण सम्बन्धी राष्ट्रिय तथा अन्तराष्ट्रिय प्रावधान, लैङिक उत्तरदायी बजेट, वडा तथा पालिकामे हुइल लैगिक समानता, सामाजिक समावेशिकरणके मुद्दामे ओ करल प्रयासबारे सामुहिक छलफल कैगिल रहे ओस्टेक करके लैंगिक उत्तरदायि वार्षिक योजना तथा बजेट तर्जुमा प्रकृया सम्बन्धी छलफल (समुह कार्य ः ५ ठो विषयगत क्षेत्रमे लैगिक समानता ओ सामाजिक समावेशिकरण एकिकृत करके योजना बनागिल रहे ।

तालिम समापन कार्यक्रममे बरका पहुना राजमझ चौधरी जनप्रतिनिधि ओ कर्मचारीहुकनके लाग संचालन करल लैङिक समानता तथा सामाजिक समावेशीकरण सम्बन्धी क्षमता अभिवृद्धि तालिम महत्वपूर्ण रहल बटैलै । उहाँ कहलै,‘पालिकासे महिलाके हरेक मुद्दाहे उठैना ओ लैङिक समानता तथा सामाजिक समावेशीकरणमे ध्यान डेले बा ।,

कार्यक्रममे विशिष्ट पहुना गाउँपालिका उपाध्यक्ष भगवतीकुमारी चौधरी भौतिक विकाससंगे आब सामाजिक विकासहे ढेर ध्यान डेहे पर्ना जरुरी रहल बटैली । सिसिएस कैलालीके महासचिव गणेशदेव पार्कीके अध्यक्षतामे हुइल कार्यक्रमके संचालन सामाजिक परिचालिका मीना चौधरी करल रहिट । तालिममे गाउँपालिकाके प्रमुख प्रशासकीय अधिकृत लक्ष्मी दत्त भट्टलगायत वडा अध्यक्षहुक्रे, कार्यपालिका सदस्य ओ टमान शाखाके प्रमुखके सहभागिता रहल रहे ।