धनगढीमे हाफ म्याराथन प्रतियोगिता हुइना
पहुरा समाचारदाता
धनगढी, १० चैत । धनगढीमे लावा बरसके अवसरमे हाफ म्याराथन प्रतियोगिता हुइना हुइल बा ।
धनगढी जेसीजके आयोजनामे ‘अब धनगढी दौडिन्छ’ कना नाराके साथ हाफ म्याराथन प्रतियोगिताके आयोजना हुइना शनिच्चरके रोज पत्रकार सम्मेलन मार्फत जानकारी कराइल हो । लाव बरसके दिन बैशाख १ गते हुइना प्रतियोगिताके तयारी तिब्र पारल धनगढी जेसीसके कार्यक्रम संयोजक आशिष शाह जानकारी डेलै ।
धनगढी जेसीस अध्यक्ष अरुण कुमार सिंह समग्र सुदूरपश्चिमके व्यवसायिक, खेलकुद, आर्थिक, राजनीतिक क्षेत्रमे लावा बरसके अवसरमे नयाँ उत्साहके साथ लग्गा उद्देश्यके साथ प्रतियोगिता कैटी आइल बटैलै ।
धनगढी जेसीजसे २०७१ सालसे हरेक साल लावा बरसके दिन हाफ म्याराथन प्रतियोगिताके आयोजना कैटी आइल बा । २०७७ सालमे कोरोनाके कारण प्रतियोगिताके आयोजना करे नैसेक्लेसेफेन २०७१ सालसे प्रतियोगिता कैटी आइल आयोजक धनगढी जेसीज जनैले बा । म्याराथन चार विधामे हुइना बा । २१ दसमलव १ किलोमिटरके हाफ म्याराथनके विजेता ६६ हजार ६६६, डुसरा हुउइया ४४ हजार ४४४ ओ टिसरा हुउइया ३३ हजार ३३३ रकम पुरस्कार पैना बाटै ।
ओस्टके कर्पोरेट तथा सञ्चार विधामे ५ किलोमिटर, महिला ओर ५ किलोमिटरके दौड हुइना बा । उ डुनु विधामे पहिल हुउइया ६ हजार ६६६, डुसरा हुउइया ४ हजार ४४४ ओ टिसरा हुउइया ३ हजार ३३३ रकम पुरस्कार पैना बटै ।
ओस्टके ट्राईसाकल विधामे फेन म्याथान हुइना ओ सम्मान सहित पुरस्कार डेना आयोजक जनैले बा ।
२०८१ बैशाख १ गते धनगढी रंगशालासे सुरु हुइना हाफ म्याराथनमे आयोजक ४ हजार प्रतियोगीहुक्रनके सहभागिता रहना अनुमान करल जनैले बा । जेसीजसे युवाहुक्रनके व्यक्तित्व ओ नेतृत्व क्षमताके विकासके लाग हरेक बरस इ प्रतियोगताके आयोजना कैटी आइल जनैले बा ।
