नाउपाभिटर द्वन्द्व चर्कल
पहुरा समाचारदाता
धनगढी, १५ चैत । नागरिक उन्मुक्ति पार्टी (नाउपा) सुदूरपश्चिम संसदीय दलके नेता घनश्याम चौधरी प्रदेश सरकारहे डेहल समर्थन कायमे रना बटैले बटै ।
बुधके रोज टीकापुरमे उ पार्टीके अध्यक्ष रञ्जिता श्रेष्ठके नेतृत्वमे बैठल संस्थापक केन्द्रीय सदस्य ओ सांसदहुक्रे सम्मिलित बैठकसे प्रदेश सरकारहे डेहल समर्थन फिर्ता लेना निर्णय करलेसेफे चौधरी अपनेहुकनके समर्थन कायमे रना दाबी करले बटै ।
सुदूरपश्चिम प्रदेशके आर्थिक मामिला मन्त्रीसमेत रहल चौधरी कहलै, ‘हम्रे बहुमत संसदीय दलके सदस्यहुकनके समर्थन प्रदेश सरकारहे कायमे रहल बा । आज का निर्णय हुइल, हम्रहिनहे पत्ता नइहो ।’
सरकारबारे निर्णय कैना बुधके टीकापुरमे बैठल संस्थापक केन्द्रीय सदस्य ओ सांसदहुक्रे सम्मिलित बैठकके औचित्य समेत नइरहल उहाँ बटैलै ।
पार्टीके संरक्षक रेशमलाल चौधरीसहित बहुसंख्यक संस्थापक सदस्य तथा सांसदहुकनके उपस्थितिविना निर्णय हुइल कहटी दुसर थरीसे विरोध जनैले बटै । ओस्टे, नाउपा निकट स्रोतके अनुसार जापानमे रहल पार्टी संरक्षक चौधरी यैसिन राजनीतिक निर्णय ढेर करल करल बटैटी सांसदहुकनहे विचलित नइनासमेत आग्रह करल ओ अपने लौटलपाछे ठोस निर्णय लेना कहटी आश्वस्त पारल बताइल बा । लक्ष्मणकिशोर कहलै, ‘नाउपाके निर्णयमे संरक्षक ओ और सांसदके उपस्थिति खोइ ?
नागरिक उन्मुक्ति पार्टी (नाउपा) के टीकापुरमे सम्पन्न संस्थापक केन्द्रीय सदस्य ओ सांसदहुक्रे सम्मिलित बैठक विवादित बनल बा । पार्टीके संरक्षक रेशमलाल चौधरीके साथे बहुसंख्यक संस्थापक सदस्य तथा सांसदहुकनके उपस्थिति विना हुइल कहटी दुसरथरीसे विरोध जनैले बटै ।
बुध टीकापुरमे पार्टी अध्यक्ष रञ्जिता श्रेष्ठके अध्यक्षतामे हुइल बैठकसे सक्कु तहमे नयाँ राजनीतिक गठबन्धनहे समर्थन कैना निर्णय करले बा । साथे कांग्रेस नेतृत्वके सुदूरपश्चिम प्रदेश सरकारहे डेहल समर्थन फिर्ता लेना निर्णय समेत करले बा । मने नाउपाके दुसरथरी संस्थापक तथा नेताहुक्रे उ निर्णय अल्पमत सदस्यसे करल कहटी मान्य नइहुइना बटैले बटै ।
बैठकमे सहभागी रहल सुदूरपश्चिम सरकारके विना विभागीय मन्त्री लक्ष्मणकिशोर चौधरी बैठकमे अपने फरक मत व्यक्त करल बटैले बटै । उहाँ कहलै ‘टुसा नइउम्रटी तुहैना काम हुइटी बा । यी बैठकमे पार्टी संरक्षक ओ बहुसंख्यक संस्थापक ओ सांसदहुकनके उपस्थिति बिना काहे धारगिल कना मोर धारणा रहे ।’
पार्टीसे करल निर्णयहे कार्यान्वयन करे परल नि कना जिज्ञासामे उहाँ कहलै ‘मै बुधके बैठकके निर्णयमे हस्ताक्षरफे करले नइहुँ । नोट अफ डिसेन्टफे जनैले नइहुँ ।’
ओस्टेक करके नागरिक उन्मुक्ति पार्टी (नाउपा) से सुदूरपश्चिम प्रदेशमे नयाँ गठबन्धनहे समर्थन कैना निर्णय करले बा ।
पार्टी अध्यक्ष रञ्जिता श्रेष्ठके अध्यक्षमे बुधके टीकापुरमे बैठल संस्थापक केन्द्रीय सदस्य ओ सांसदहुकनके बैठकसे नयाँ गठबन्धनहे समर्थन कैना निर्णय करल हो ।
नाउपाके संस्थापक केन्द्रीय सदस्य तथा टीकापुर नगरपालिका मेयर रामलाल डंगौराके अनुसार यी निर्णयसंगे नयाँ गठबन्धनसँग वार्ता कैना ओ उहे अनुसार सुदूरपश्चिम प्रदेश सरकारहे डेहल समर्थन फिर्ता लेना निर्णय हुइल हो ।
बैठकमे सुदूरपश्चिमके ७ जाने सांसद मध्ये पूर्वराज्यमन्त्री कैलाशी चौधरी, विना विभागीय मन्त्री लक्ष्मणकिशोर चौधरीके केल सहभागिता रहल रहे । ओस्टेक करके संस्थापक रेशम चौधरीफे सहभागी नइरहिट । विना विभागीय मन्त्री लक्ष्मणकिशोर चौधरी बैठकके निर्णयमे हस्ताक्षरफे नइकरले हुइट ।
