प्रदेशस्तरीय बरघर÷भल्मन्सा ऐनबारे सामाजिक विकास मन्त्रीसे छलफल

पहुरा समाचारदाता
धनगढी, १८ चैत । सुदूरपश्चिम प्रदेश स्तरीय बरघर÷भल्मन्सा ऐन हाल–हाली बनैना ध्यानाकर्षणके लाग अँटवारके रोज प्रदेशके सामाजिक विकास मन्त्री माननीय लक्ष्मणकिशोर चौधरीसंग थारु समुदायके अगुवाहुँक्रे छलफल ओ ध्यानाकर्षण करैले बटै ।

सुदूरपश्चिम प्रदेश सरकारके मुख्यमन्त्री कमलबहादुर शाह थारु समुदायके प्रथाजनित कानून बडघर÷भल्मन्सा ऐन अपन पालामे बनैना सक्रिय रहल ओरसे सामाजिक विकास मन्त्रालयसे हुइना कामहे झट्टेसे आघे बह्राई परल कहिके थारु समुदायके अगुवाहुँक्रे सामाजिक विकास मन्त्री लक्ष्मणकिशोर चौधरीके कार्यकक्षमे प्रत्यक्ष भेटघाट कैके ऐन निर्माणबारे छलफल ओ ध्यानाकर्षण कराइल रहिट ।

थारु नागरिक समाज कैलालीके संयोजक दिलबहादुर चौधरी मुख्यमन्त्री कार्यालयमे प्रदेश स्तरीय बरघर÷भल्मन्सा ऐनके ड्राफ्ट बुझासेकल ओरसे अब्बे उहीहे पास कैलेसे उपलब्धी विल्गैना बटैलै । उहाँ कहलै, ‘सुदूरपश्चिम प्रदेशमे यी ऐन अइलेसे ओम्ने कुछ संशोधन करे परलेसे पाछेफे संशोधन करसेक्जाई ।’

धनगढी उपमहानगरपालिका स्तरीय बरघर÷भल्मन्सा समितिके अध्यक्ष रोहितकुमार चौधरी प्रदेश स्तरीय बरघर÷भल्मन्सा ऐन पास हुइलेसे स्थानीय तहमे भल्मन्सा मार्फत योजनाके कामहे आघे बह्राई सेक्ना बटैलै ।

छलफल कार्यक्रममे सामाजिक विकास मन्त्री लक्ष्मणकिशोर चौधरी अपनहुँक्रे यिहे चैत २२ गते विश्वासके मत लेना हुइल ओरसे बरघर÷भल्मन्सा ऐन निर्माणके प्रक्रिया उहीसे आघे बह्रैना बटैलै बटै ।

मन्त्री चौधरी कहलै, ‘मै सामाजिक विकास मन्त्रीके पदभार ग्रहण करेबेर प्रदेशस्तरीय बरघर÷भल्मन्सा ऐनहे तुरुन्त बनैना ओ टिकापुरमे प्राविधि क्याम्पस स्थापनाके लाग प्रदेश सचिवहे बाट राखले रहुँ ।’ उहाँ थारु समुदायके अगुवनहे अपने प्रदेशस्तरीय बरघर÷भल्मन्सा ऐन बनाके छोरना आश्वस्तफे परल रहिट ।