गाउँपालिका अध्यक्ष कहलै, ‘भल्मन्साहुक्रे कर्तव्य पालना करे परल

पहुरा समाचारदाता
धनगढी, २१ चैत । कैलारी गाउँपालिकाके जनप्रतिनिधिहुँक्रे भल्मन्साहुँक्रनहे अपन कर्तव्य पालना कैना आग्रह करले बटै ।
कैलारी गाउँपालिकाके जनप्रतिनिधिहुँक्रनके लाग नेपाल आदिवासी जनजातीके मानव अधिकारका लागि कानून व्यवसायी संघ(लाहुर्निप) ओ थारु कल्याणकारिणी सभा कैलारीके आयोजनामे बुधके रोज धनगढीमे हुइल आदिवासी अधिकार सम्बन्धी अन्तरक्रिया कार्यक्रममे जनप्रतिनिधिहुँक्रे उ आग्रह करलक हुइट ।

गाउँपालिका अध्यक्ष राजसमझ चौधरी भल्मन्साहुँक्रनहे अधिकार डेहक लाग कैलारी गाउँपालिकासे भल्मन्सा ऐन शंसोधनसहित पास करटी लागल बटैल । उहाँ कहलै’ ‘हम्रे भल्मन्साहुँक्रन अधिकार डेना तयार बाटी मने वहाँहुँक्रे अपने पालन कैना कर्तव्य विस्राई निपरल । कानूनसे भारी कोई नइहो । जनप्रतिनिधि इलेक्टेड हुके आइल बटै । मने भल्मन्साहुक्रे स्थानीय सरकारके कामहे अवरोध करे नइपरल । स्थानीय तहके कामहे सहयोग करे परल ।’

हम्रे भल्मन्साहुकनहे सम्मान करले बटी,’ गाउँपालिका अध्यक्ष कहलै, ‘जौनफे कार्यक्रम गाउँघरमे जाइठ भल्मन्सा मार्फत जाइठ । मने भल्मन्साहुक्रे अपन कर्तव्य नइनिभाडेठै । छोट–छोट कार्यक्रमफे भल्मन्सा मार्फत छनौट करेक लाग जिम्मेवारी डेठी ।’ गाउँघरमे बेगारी कैना हमार परम्परा रहे ।

भल्मन्साके नेतृत्वमे कुलुवा झरना, सरसफाई कैना, डगर घाट भँठना परिपाटी रहे । अब्बे अल्छी बन्ना काम हुइटा संघ संस्थाहेफे उल्टा बाट नइसिखा डेना आग्रह करलै । गाउँपालिका अध्यक्ष कैलारीमे सांस्कृतिक, पर्यटकीय, धार्मिक ओ विशेष क्षेत्र घोषणा करे सेक्ना बटैलै ।

वडा नम्बर ५ के वडा अध्यक्ष विष्णुप्रसाद चौधरी पहिले गाउँघरमे टमान मेरिक बेगारी लगायत जनश्रमदान कैना परिपाटी रहे मने अब्बे गाउँक सडकमे एक ठो खटहा हुगिलेसे पालिकासे डोजर मग्ना परिपाटी बह्रलक बटैलै ।

गाउँपालिकाके प्रमुख प्रशासकीय अधिकृत लक्ष्मीदत्त भट्ट भल्मन्साहुँक्रनहे प्रोत्साहन कैना स्थानीय सरकारके दायित्व रहल बटैलै । उहाँ नेपालके मुल कानूनसे निबझँना ओ भल्मन्सा प्रथाके मौलिकता स्थापना हुइना मेरिक गाउँपालिकासे भल्मन्सा ऐन नन्ना तयार रहल बटैलै । भल्मन्साहुकनके काम कर्तव्य अधिकार तोक्ले समय सापेक्ष तोक्लेसे काम सहजुल हुइना बटैलै ।

लाहुर्निपके केन्द्रीय अध्यक्ष दिनेश घले नेपालक १४२ जाती ओ १२४ भाषाभाषी मन्से थारु समुदाय सब धनी रहल बटैलै । उहाँ संविधानभिटर थारु जातीके समावेशके अवस्थाबारे जानकारी डेटी धारा २६१ मे आदिवासी जनजाती आयोग, धारा १६३ मे थारु आयोगके व्यवस्था, नेपालके आदिवासी जनजाती भिटर थारु रहल जानकारी डेहल रहिट । कार्यक्रममे उहाँ आदिबासी जनजाती सम्बन्धी महासन्धी १६९ अन्तराष्ट्रिय श्रमसंगठनबारे, ओकर कार्यक्षेत्र, प्रथा परम्परा, प्रथाजनित कानून जानकारी डेहल रहिट । उहाँ कैलारी गाउँपालिकामे सास्कृतिक क्षेत्र, स्वयत्त क्षेत्र, विशेष क्षेत्र बनैना सहजुल रहल कटी गाउँपालिका उ क्षेत्रहे घोषणा करेक लाग आघे बह्रलेसे अपनहुँक्रे प्रविधिक सहयोग कैना प्रतिबद्धता जनैलै ।

थारु कल्याणकारिणी सभा कैलारीके सभापति अशोक चौधरीके अध्यक्षतामे हुइलक कार्यक्रममे वडा अध्यक्षहुँक्र, कार्यपालिका सदस्यहुकनके सहभागिता रहे । कार्यक्रममे सहजीकरण लाहुर्निपके कार्यक्रम संयोजक दुर्गा याम्फु, कैलारी गाउँपालिकाके कानूनी सल्लाहकार जोहरीलाल चौधरीलगायतसे सहजीकरण करल रहिट । कार्यक्रममे कैलारी गाउँपालिकामे शंसोधन सहित आज पास हुइटी रहल भल्मन्सा ऐनबारे व्यापक छलफल हुइल रहे । कार्यक्रमके संचालन मञ्जु चौधरी करल रही ।

ओस्टेक यिहीसे आघे मंगरके रोज कैलारी गाउँपालिकाके वडा सदस्यहुकनसे आदिवासी अधिकार सम्बन्धी अन्तरक्रिया हसुलियामे कैगिल रहे ।