थारु सांस्कृतिक चौठा बरका भजहर कप २०८० के आयोजना
पहुरा समाचारदाता
धनगढी, २३ चैत । कैलाली जिल्लाके कैलारी गाउँपालिका–८ लोहरपुरमे थारु समुदायक संस्कृतिहे संरक्षणके लाग थारु सांस्कृतिक चौठा बरका भजहर प्रतियोगिता हुइना जनागिल बा ।
यूवा जनहित क्लव कैलारी–८ लोहरपुरके आयोजनामे यिहे अइना बैशाख १५ गतेसे २२ गतेसम फुटवल ओ थारु परम्परागत खेल छुर प्रतियोगिता हुइना शुकके रोज धनगढीमे पत्रकार सम्मेलनके आयोजना कैके जानकारी डेगिल बा ।
क्लवके अध्यक्ष मनिराम चौधरी अपनहुँक्रे थारु कला संस्कृति संरक्षणके लाग भजहर कना मुल नारा लेके २०७८ सालसे थारु सांस्कृतिक बरका भजहर प्रतियोगिता करटी अइलक जानकारी डेलै ।
थारु सांस्कृतिक चौठा बरका भजहर प्रतियोगिता अन्र्तगत फुटवल प्रतियोगिता ओ थारु समुदायके परम्परागत छुर प्रतियोगिता रहना अध्यक्ष मनिराम जनैलै । फुटवल प्रतियोगिताके विजेता १ लाख, उपविजेता ५० हजार ओ छुर प्रतियोगिताके विजेता ५० हजार, उपविजेता २५ हजार नगद पुरस्कार पैना उहाँ जनैलै ।
फुटवलमे १६ ओ छुरमे ६ टिम रना बा । ओस्टेक उ अवधिभर थारु समुदायके परम्परागत खेल ओ मेरमेराइक संस्कृति कार्यक्रमफे हुइना आयोजना जनैल बा । प्रतियोगिताके मुख्य प्रयोजकमे सुदूरपश्चिम खेलकुद परिषद ओ प्रवद्र्धकमे कैलारी गाउँपालिका रहल बा ।
