धनगढीके फिस रिसोर्टमे वाटर साइकल सञ्चालन
पहुरा समाचारदाता
धनगढी, २५ चैत । धनगढी उपमहानगरपालिका वडा नम्बर ३ विशाल नगरमे रहल न्यू एड्भेन्चर फिस रिसोर्टमे वाटर साइकल सञ्चालन आइल बा ।
अँट्वारके रोज नेपाल पत्रकार महासंघ कैलाली जिल्ला अध्यक्ष हिमाल जोशी ओ रिसोर्टके सञ्चालक करिना अन्सारी वाटर साइकल चलैटी उद्घाटन करल हुइट । सुदुरपश्चिममे पहिल वाटर साइकलरहल जनाइल बा ।बिगत लम्मा समयसे सञ्चालित रिसोर्ट लावा व्यवस्थापन सहित फेनसे सञ्चालन हुइलपाछे टमान सेवा थपल हो । उहे अनुरुप वाटर साइकलिङ सेवा शुरु करल हो ।
रिसोर्टके म्यानेजर राम थापाके अनुसार सिंगल वाटर साइकलिङके ३ सय ओ कपल वाटर साइकलिङके ५ सय रुपयाँ शुल्क राखल बा । यकर साथे रिसोर्टमे बोटिङ, जिपलाइन्, वाटर वल लगायत मनोरन्जनके लाग टमान सेवा थप करल बटैलै ।
बच्चासे लेके बृद्धसमहे अक्के ठाउँमे मनोरन्जन डेना उद्देश्य सहित रिसोर्टमे सेवा थपल बटाइल बा । बोटिङके लाग प्रतिव्यक्ति १ सय, जिप लाइनके २ सय ओ वाटर बलके लाग ३ सय रुपयाँ शुल्क रहल उहाँ बटैलै ।
वाटर साइकलिङ उद्घाटन कैटी नेपाल पत्रकार महासंघ कैलाली अध्यक्षजोशी वाटर साइकलिङ धनगढीमे आन्तरिक सँगे बाह्य पर्यटक टन्ना महत्वपुर्ण भुमिका खेल्ना बटैलै ।
सुदुरपश्चिममे अन्टे कहोँरो नैरहल सेवा न्यु एडभेन्चर फिस रिसोर्ट एण्ड पार्क सञ्चालनमे लानल सञ्चालक अन्सारी बटैली । यहाँ आन्तरिक तथा बाह्य पर्यटकके लाग ढेर सेवा रहल बावै उहाँ कहली, ‘वातावरणके हिसाबसे स्वच्छ, सफा ठाउँ रहल ओरसे फेन पर्यटकके रोजाई एडभेन्चर फिस रिसोर्ट एण्ड पार्क पर्ना बा, पर्यटकहुक्रे खोजल सेवा हम्रे लन्ले बाटी, इहीसे धनगढीके पर्यटन प्रबद्र्धनमे समेत टेवा पुग्ना अपेक्षा लेले बाटी ।’
‘हमार सँग मनोरञ्जनके लाग किल पार्क नैहोके पारिवारिक वातावरण रहल रेस्टुरेन्ट फेन बा’, उहाँ कहली,‘घुमक लाग किल नैहोके कौनो कार्यक्रम तथा पारिवारिक भेटघाटके लाग फेन उपयुक्त ठाउँ रहल कारण सक्कु जनहनके रोजाईमे इ पार्क पर्ना बा ।’
