ऐश्वर्य बहुमुखी क्याम्पसके १८औं वार्षिकोत्सव

पहुरा समाचारदाता
धनगढी, २६ चैत । कैलालीके धनगढी उपमहानगरपालिकामे रहल ऐश्वर्य बहुमुखी क्याम्पसके १८औैं बार्षिकोत्सव तथा अभिभावक दिवस कार्यक्रम सम्पन्न हुइल बा ।

क्याम्पसके १८औ वार्षिकोत्सव समारोह क्याम्पस सञ्चालक समितिके अध्यक्ष नृप बहादुर वडके अध्यक्षतामे हुइल कार्यक्रममे बरका पहुना विश्वविद्यालय अनुदान आयोगके अध्यक्ष प्रा. डा देवराज अधिकारी रहल रहिट । कार्यक्रममे सम्बोधन करटी उहाँ ऐश्वर्य बहुमुखी क्याम्पस सुदूरपश्चिम प्रदेशमे अब्बल क्याम्पसके रुपमे स्थापित हुइटी गैल बटैलै ।

विशिष्ट पहुना नाष्ट कलेजके प्रमुख शिवहरि मुडभरी ऐश्वर्य क्याम्पस अभिभावकहुकनके मन जिटना सफल हुइल ओ गुणस्तरीय शिक्षामे महत्वपूर्ण योगदान रहल बटैलै ।

वार्षिकोत्सव कार्यक्रममे विशिष्ट पहुना यज्ञराज पाठक, प्रा. डा. हेमराज पन्त, खेमराज पाण्डेय, लक्ष्मणदत्त भट्ट, डा. पूर्णबहादुर लामिछाने, रामलाल जोशी, मदनराज पाण्डेलगायत पहुनाके उपस्थिति रहे । कार्यक्रममे ऐश्वर्य वहुमुखीके क्याम्पसके प्रमुख धर्मदेव भट्ट ८औं वार्षिकोत्सव समापन समारोहके अवसरमे प्रगती प्रतिवेदन प्रस्तुत करल रहिट ।

सुदुरपश्चिमके अमूल्य गहना एवं अग्रणी शैक्षिक धरोहर यी ऐश्वर्य सार्वजनिक शैक्षिक गुठीके स्रोत साधन, राजनैतिक दलके प्रतिवद्धता स्थानीय समुदायके सदभाव, प्राध्यापक कर्मचारीहुकनके सहयोग तथा ऐश्वर्य विद्या निकेतन मावि विद्यालय व्यवस्थापन समितिके पहलमे ऐश्वर्य बहुमुखी क्याम्पसके स्थापना हुइल उहाँ बटैलै ।

तत्कालिन समयमे विज्ञान विषयमे सुदूरपश्चिम प्रदेशमे कौनोफे सरकारी तथा सामुदायिक क्याम्पससे स्नातक तहके कक्षा संचालन करे नइसेकल अवस्थामे क्याम्पसके स्थापनाकालसे लेके बृद्धि विकासमे तत्कालिन क्याम्पस संचालक समिति, वर्तमान सञ्चालक समिति ओ सल्लाहकार समितिके अमूल्य योगदान रहल उहाँ बटैलै । उहाँहुकनके क्रियाशिलता तत्परता ओ अथक मेहनतके कारण यी क्याम्पस आज यी अवस्थामे पुगल जनैलै ।

वि.स. २०६३ सालमे क्याम्पस स्थापनासंगे विज्ञान संकायके विएससी कार्यक्रम सुरु करल, लगटे वि.स.२०६४ सालमे व्यवस्थापन संकाय अन्तर्गत विविएस कार्यक्रम सुरु करल ओ वि.स. २०७८ सालसे एमविविएस कक्षा संचालन कैगिल प्रमुख भट्ट बटैलै । अइना दिनमे त्रिविके कार्यक्रम अनुसार B.Sc CSIT/B/T/BBA/BBM/BSW कार्यक्रम संचालन कैना योजना समेत रहल क्याम्पस प्रमुख भट्ट बटैलै ।

वि.स २०७३ सालमे यी क्याम्पमे जम्मा ४८९ जाने विद्यार्थी रहलमे २०८० सालमे अब्बे २५ सय ६१ विद्यार्थी रहल बटै । कलेसे एमविविएसमे पहिल बर्षमे ११२ ओ दुसरा बर्षमे १०२ जाने विद्यार्थी अध्ययनरत रहल बटै ।

वार्षिकोत्सवके अवसरमे क्याम्पसे अध्यापन करटी रहल सह प्राध्यापक नारायणदत्त अवस्थी, एमविएस ओरके मुकेश चन्द, विएससी ओरके आनन्द प्रकाश जोशी, विएससी ओरके मनोज ओझा, विविएस ओरके पुष्पराज पाण्डे, विविएस ओरके महेश मुडभरीहे सम्मान कैगिल बा ।

यिहे विच क्याम्ससे अध्ययनरत रहल राष्ट्रिय खेलाडी ईश्वरी साउँद, आलोक बुढामगर ओ गोमती साउदहे सम्मान करले बा ।

बार्षिकोत्सवमे क्याम्पससे पढाइमे अब्बल रहल उत्कृत स्थान हासिल करल विद्यार्थीहेफे सम्मान कैगिल बा । सम्मानित हुइलमे दिनेश महरा, बसन्त पन्त, यूवराज कट्टेल, नरेन्द्र कार्की, जनकनाथ अवस्थी, दिपा खत्री, दिपक भट्ट, सुरेश शाही, अवेक थापा, केशव गिरी, सरस्वतीकुमारी भट्ट, स्वस्तिक जैरुलगायत रहल बटैलै । यिहे बार्षिकोत्सव विद्यार्थीहुकनसे सांस्कृतिक प्रस्तुती प्रर्दशन कैगिल रहे ।