धनगढीमे भोकेस्नल स्कुल भवनके शिलान्यास
पहुरा समाचारदाता
धनगढी, २६ चैत । धनगढी–१८ मे भोकेस्नल स्कुल भवनके शिलान्यास करल बा । धनगढी उपमहानगरपालिका ओ नेपाल युथ फाउन्डेसनके सहकार्यमे सञ्चालित व्यावसायिक तालिम केन्द्र अर्थात् भोकेस्नल स्कुल भवनके सोम्मार शिलान्यास करल हो ।
धनगढी–१८ फूलबारीमे तालिम केन्द्रके शिलान्यास उपमहानगरपालिकाके ओरसे प्राध्यापक डाक्टर हेमराज पन्त ओ युथ फाउन्डेसनके ओरसे अध्यक्ष सोम पनेरू तालिम केन्द्रके शिलान्यास करल हो ।
कार्यक्रममे नेपाल युथ फाउन्डेसनके अध्यक्ष सोम पनेरु धनगढी उपमहानगरपालिकासँगके सहकार्यमे काम करे पोक एकदम खुसी लागल बटैलैं । उहाँ व्यावसायिक तालिम केन्द्र युवा लक्षित ४ प्रकारके सीप विकास तालिम करटि रहल बटैलैं । तालिम केन्द्रसे ५५० घण्टे वेल्डर ओ ३९० घण्टे पलम्बर, ईलेक्ट्रिसियन तथा फर्निचर मेकर तालिम प्रदान करटि आइल बा । निकट भविष्यमे फूलबारीमे आवासीय भवनसे युवाहुक्रे सीपमूलक तालिम लेहे पैना पनेरू बटैलैं ।
अध्यक्ष पनेरू यी क्षेत्रके कृषिके सम्भावनाहे लक्षित कैके आधुनिक कृषि प्रणाली सम्बन्धी फेन तालिम तथा उपकरण मर्मतमे सहयोग करना प्रतिवद्धता करले बटैं ।
तालिम केन्द्र शिलान्यास हुइलसँगे पहिल चरणमे एक प्रशासनिक भवन, दुईठो तालिम व्लक, तीनठो छोट भवन तथा घेरवारसहितके संरचना निर्माण करल बा ।
तालिम केन्द्र सञ्चालनमे आके पाँच वर्ष पश्चात युथ फाउन्डेसन सञ्चालन, व्यवस्थापन साथे संरक्षणके जिम्मेवारी धनगढी उपमहानगरपालिकाहे हस्तान्तरण करल बा ।
कार्यक्रममे उपस्थित युथ फाउन्डेसनके नेपाली बालबालिका सहयोग कार्यक्रमके प्रतिनिधि श्रीमती हाजेल ग्रेस धनगढीमे युवा लक्षित कार्यक्रम सञ्चालनमे आइलमे खुसी व्यक्त करले बटि । उहाँ युवा लक्षित कार्यक्रम सफल परना आर्थिक तथा जनशक्तिके सहयोग करना बटैले बटि ।
नगरप्रमुख गोपाल हमाल फुलवारी क्षेत्रमे सञ्चालनमे रहल व्यावसायिक तालिम केन्द्रमे सुदूरपश्चिमके सब जिल्लाके इच्छुक युवा तालिम लेहे सेक्ना बटैलैं । नगरप्रमुख हमाल सीपमूलक तालिम पश्चात् युवा टमान स्थानमे सहज रोजगारी पैना अवस्था निर्माण होके गरिबी घटाइ सेक्ना विश्वास करल बा ।
नगरप्रमुख हमाल व्यावसायिक तालिमसे रोजगारीके अवसर प्रदान करना ओ गरिबीके दरहे घटैना मद्दत करना बटैले बटैं । नगरप्रमुख हमाल निर्माण हुइ लागल भवन नागरिकके सम्पत्ति हो कना मान्के निर्माण पश्चात संरक्षणमे सब जाने ध्यान डेहेपरना बटैलैं ।
शिलान्यास पश्चात् प्राध्यापक डाक्टर हेमराज पन्त धनगढी उपमहानगरपालिकाके अब्बेक नेतृत्वसे रचनात्मक काम करटिरहल बटैलैं । उहाँ उपमहानगरपालिकासे सञ्चालनमे नानल तालिम केन्द्रसे सुदूरपश्चिमके युवा सेकटसम ढेर लाभ लेहेपरना बटैलैं । कार्यक्रममे वडाध्यक्ष भुवन रिजाल स्वागत करले रहैं ।
