एसपीए कलेजसे टोल सरसफाइ कर्मचारी नियुक्त
पहुरा समाचारदाता
धनगढी, २६ चैत । धनगढी उपमहानगरपालिका वडा नं. २ मे अवस्थित सुदूरपश्चिमाञ्चल क्याम्पस (एसपीए) से टोल सरसफाइ कर्मचारी नियुक्त करले बा । क्याम्पससे धनगढी उप–महानगरपालिकासे सुरु करल ‘हाम्रो धनगढी, सफा धनगढी’ अभियानहे सहयोग पुगे कना हेतुसे टोल सरसफाइ कर्मचारी नियुक्त करल हो ।
समाजसे लेना केल नाही समाजहे कुछ प्रदान करे परठ कना बाटके ज्वलन्त उदाहरणके रूपमे कार्य करटी आइल सुदूरपश्चिमाञ्चल क्याम्पस (एसपीए) से नगरके सरसफाइ कार्यमे शैक्षिक क्षेत्रसेफे हातेमालो करटी आघे बह्रे परठ कना उदाहरण बन्टी अपन वरपर पाँच सय मिटरके वातावरण स्वच्छ रख्न टोल सरसफाइ कर्मचारीके रूपमे धनगढी–३ बैठना नेहा साउँदहे नियुक्त करल बा ।
कलेजसे यिहे चैत्र १८ गते टोल सरसफाइ कर्मचारी नियुक्त करल हुइलेसेफे उ बारे सोम्मार एक कार्यक्रमके बिच क्याम्पस प्रमुख योगराज उपाध्यायके नेतृत्वमे गैल टोलीसे धनगढी उप–महानगरपालिकाके कार्यालय ओ नगर प्रमुख गोपाल हमालहे जानकारी कराइल बा । उ कार्यक्रममे बोल्टी टोल सरसफाइ कर्मचारी साउँदसे कलेजसे अपनहे डेहल जिम्मेवारी इमानदारीके साथ निर्वाह कैना ओ उपमहानगरसे सुरु करल ‘हाम्रो धनगढी, सफा धनगढी’ अभियानहे सफल बनैना टोलबासीहुक्रनमे जथाभाबी फोहोर नइकैना आग्रह कैना, प्लास्टिक जन्य फोहोरसे क्यान्सर जैसिन घातक रोग लग्ना हुइल ओरसे यकर प्रयोग न्यून कैना तथा बन्द कैना हम्रे सक्कुहुनके दायित्व रहन जैसिन जनचेतनामूलक जानकारी प्रदान कैना बटैटी जिम्मेवारी प्रदान कैना सक्कुहुनहे धन्यवाद सहित आभार व्यक्त करली ।
उहे कार्यक्रममे बोल्टी धनगढी उप–महानगरपालिका वडा नं. २ के अध्यक्ष धर्मराज ओझा कलेजसे पालिकाके अभियानहे सहयोग करलमे धन्यवाद ज्ञापन करटी सक्कु तह ओ तप्कासे नगरपालिकासे थालनी करल उदाहरणीय अभियान सफल पर्ना सहयोग कैना पर्नामे जोड डेलै ।
ओस्टेक, उ अवसरमे बोल्टी धनगढी उप–महानगरपालिकाके प्रमुख गोपाल हमाल एसपीए कलेज यिही आघे समाजहे जागरूक कैना करल सरसफाइ लगायतके टमान कार्यहुकनके प्रशंसा करटी एसपीए कलेजसे शिक्षामे केल नइहुके विद्यार्र्थीहुक्रे अंक प्राप्तीसंगे समाज निर्माणमे अपनहुकनके भूमिका रहे परठ कना लगायतके उदाहरणीय काम करलमे धन्यवाद ज्ञापन करलै । ‘एसपीए कलेज अग्रणी रहे मने क्याम्पस प्रमुखके सहभागितासे थप उचाइ प्राप्त करले बा । हम्रे हेरटी रहल बटी । कलेजसे हम्रे अभियान सुरु कैनासे पहिलेसे शिक्षासंगे समाज निर्माणके कार्य करे परठ कना लगायतके उदाहरणीय कार्य करटी अइटी रहल बा । हम्रहिनहे एसपीए यैसिन उदाहरणीय काम करठ कना विश्वास रहे मने यिहीसे अन्य शैक्षिक संस्थासेफे हमार दायित्व रहल बा कना सिखे परठ, यैसिन उदाहरणीय कामहुकनके थालनी करे परठ । विद्यार्थीहु्कनके अन्य शैक्षिक संस्थासेफे आउर नइहेरके सामाजिक उत्तरदायित्वफे बहन करे परठ कना बाट सिखैलेसे अवश्यफे ‘हाम्रो धनगढी, सफा धनगढी’ हुई । धनगढी अइना हरेक व्यक्तिसे लौटके जाईबेर धनगढीके बारेमे सकारात्मक दृष्टिकोण सिर्जना हुइना कार्य कैना सक्कुहुनमे आह्वान करटु ।’ मेयर हमाल कहलै ।
धनगढीके कौनोफे नागरिक धनगढी बाहेर जाईबेर अपनेक धनगढी सहर टे सबसे ढेर अनुशासित, सफा, ओजरार ओ हरियाली सहर हो कना सुने पैलेसे उपमहानगरके अभियान सफल हुइल महसुस कैना मेयर हमालके कहाई बा । उपमहानगरके प्रमुख हमालके कार्यकक्षमे आयोजित उ कार्यक्रममे सुदूरपश्चिमाञ्चल क्याम्पसके क्याम्पस प्रमुख योगराज उपाध्याय, कलेजके प्रमुख प्रशासकीय अधिकृत प्रकाश बलायर, लेखा अधिकृत इन्द्रा धामी, क्रियटिभ डाइरेक्टर तार रोस्यारा, टोल सरसफाइ कर्मचारी नेहाँ साउँद, धनगढी उप–महानगरपालिका वडा नं. २ के वडा अध्यक्ष धर्मराज ओझा ओ मेयर गोपाल हमाल सहित नगरपालिकाके प्रमुख प्रशासकीय अधिकृत लगायतके कर्मचारीहुकनके उपस्थिति रहल रहे ।
