स्वास्थ्य वीमाके सेवा प्रभावकारी बनाई
स्वास्थ्य वीमा विपन्न गरिवहुकनहे लक्षित करके सरकार २०७२ साल चैत २५ गते कैलालीसे सुरुवाट करल रहे । सरकारके पाइलट प्रोजेक्टके रुपमे सुरुवाट करटी सक्कु जिल्लामे लागु कैना योजना लेके आघे बह्रल । अब्बे ७५३ स्थानीय तहमे स्वास्थ्य वीमा कार्यक्रम लागु हुइल बा । सुन्लेबेर हेरेबेर बहुट मजा बा । पाँच जानेक परिवारमे ३५ सय रुप्याक वीमा करलेसे एक लाख रुप्याक औषधि उपचार कराई कहल बा । बहुट जाने यी सेवा लेटीफे रहल बटै । बहुट जानेक जनगुनासो चाही सेवा गुणस्तरीय नइहो । वीमा करल व्यक्तिसे सेवा लेहे हुइल व्यवहारसे उहाँहुकनके चित नइबुझल हो । जेकर परिणाम एक चो स्वास्थ्य विमा कराइल परिवार उहीहे नविकरण करे परठ । यहाँ का समस्या बह्रटी जाइटा कलेसे लौव वीमा करुइयाके संख्या बह्रे पर्ना हो । मने जे–जे स्वास्थ्य वीमामे आवद्ध हुइलै ओइने सक्कु जाने नविकरण नइहुइल डेखल बा । राष्ट्रिय जनगणना २०७८ के तथ्यांक अनुसार सुदूरपश्चिमके जनसंख्या २६ लाख ९४ हजार सात सय ८३ पुगल । मने स्वास्थ्य वीमा बोर्ड सुदूरपश्चिम प्रदेश कार्यालय धनगढीके तथ्यांकमे यी प्रदेशके नौ जिल्लामे स्वास्थ्य विमा करुइयाके संख्या जम्मा ५ लाख ५६ हजार ३५९ जाने केल बा । उ संख्या हेरेबेर बहुट ढेर ग्याप हो । यकर खोजे पर्ना जरुरी बा ।
जिल्लागत तथ्याङक हेरेबेर विमा करलसेकलपाछे शत प्रतिशत नविकरण करल कौनो जिल्लाफे नइहो । विमा करसेकलपाछे विमितहुक्रे सेवा प्रदायक संस्थासे गुणस्तरीय सेवा प्रदान नइहुइना, विमारीहुकनहे हुइना व्यवहार, सेवा पैनामे ढिलाईके कारण ओ सेवाबारे जानकारी नइपैना ओरसे नविकरण नइहुइना ओ लौवा विमित नइथप्ना जनगुनासा आइल बा । कैलाली जिल्लामे विमित संख्या २ लाख ८६ हजार ५६० जाने विमित रहल ७९ हजार ४३१ परिवार विमा करलैले बटै । जेम्नेसे ४९ हजार ५३४ घरपरिवार नविकरण करले बटै । विमा करसेकलपाछे नविकरण करुइयाके परिवारके संख्या ६२ प्रतिशत केल हो । कञ्चनपुरमे २७ हजा ७७ परिवार विमा करलमे नविकरण २० हजार १२३ परिवार, डोटीमे ७ हजार ५०३ घरपरिवार विमा कराइलमे नविकरण भर ४ हजार २७७ घर परिवार(५७ प्रतिशत), दार्चुलामे ६ हजार ६४३ घर परिवार विमा कराइलमे ४ हजार १३६ घरपविार केल नविकरण करले बा । उ चाही ६२ प्रतिशत केल हो । डडेल्धुरामे ८ हजार ९५० घरपरिवार विमा कराइलमे नविकरण भर ६ हजार ४६ परिवार (६ प्रतिशत) रहल बटै ।
ओस्टेक करके बाजुरामे ८ हजार २२६ घरपरिवार विमा कराइलमे नविकरण २ हजार ९९२ घरपरिवार(३६.३७ प्रतिशत), बझाङमे ११ हजार ८९ घरपरिवार विमा करलमे नविकरण घरपरिवार संख्या ६ हजार २०२(५६ प्रतिशत) रहल बा । बैतडीमे १२ हजार ७४३ घर परिवार विमा करलमे नविकरणभर ८ हजार ५२३ घरपरिवार(६७ प्रतिशचत) ओ अछाममे १७ हजार ९८७ घरपरिवार विमा कराइलमे नविकरणभर १० हजार १३६ घरपरिवार केल रहल बा । लक्षित वर्ग ओ इमर्जेन्सी सेवामे सह–भुक्तानी लागु नइहुइना, दीर्घ रोगीहे ढेरमे ३ महिनासमके लाग औषधी उपलब्ध हुई सेक्ना व्यवस्था करल, दाबी व्यवस्थापनहे प्रभावकारी बनाइक लाग सुविधाके थैली अद्याबधिक कार्य प्रारम्भके साथे दाबी परीक्षण कैना जनशक्ति थप करल बा । आर्वेद तथा बैकल्पिक चिकित्सा सेवाके लाग तयारी हुइटी रहल बा ।
यी कार्यक्रममे सहभागी हुइना ५ जानेसमके परिवारसे वार्षिक रूपमे प्रतिपरिवार रु.३५००।– योगदान रकम तिरे परठ । ५ जाने ढेर सदस्य हुइलेसे प्रतिसदस्य रू.७००।– के दरसे थप योगदान रकम तिरे परठ । मने परिवारमे ५ जनासे कम सदस्य हुइलेसेफे तिरे पर्ना योगदान रकम नइघटठ । सदस्यता दर्ता हुइना समयमे एकमुष्ट रकम तिरे परठ । पाँच जाने परिवार रहुइयामे एक जाने १ लाख २० हजार समके निशुल्क औषधी, ओम्ने एक जाने ठप्टी गैलेसे ६ जाने रहलेसे १ लाख ४० हजार ओ ७ जाने रहलेसे २ लाख बराबरके औषधी निशुल्क करे सेक्ना व्यवस्था करल बा । स्वास्थ्य विमा प्रत्येक बरस नविकरण करे पर्ना रहठ ।
