मुख्यमन्त्रीमे नागरिक उन्मुक्तिके दाबी
पहुरा समाचारदाता
धनगढी, २८ चैत । नागरिक उन्मुक्ति पार्टी (नाउपा) सुदूरपश्चिम प्रदेश सरकारके नेतृत्वके लाग छलफल आघे बह्रैले बा ।
बुधके रोज नाउपाके संरक्षक रेशम चौधरीके उपस्थितिमे आर्थिक मामिला मन्त्री घनश्याम चौधरीका सरकारी निवासमे सांसदहुक्रबिच प्रदेश सरकारके नेतृत्व लेना मेरके आघे बह्रना विषयमे छलफल हुइल हो ।
छलफलमे सहभागी सामाजिक विकास मन्त्री लक्ष्मणकिशोर चौधरी कहलै, ‘लावा गठबन्धनमे मुख्यमन्त्री हमार बटमलाइन हो । संरक्षक ज्यू सरकार नेतृत्व लेना मेरके एकमत होके आघे बह्रना हम्रहीनहे सुझाव डेले बाटै,’ उहाँ कहलै,‘औरे चरणमे फेनसे बैठके निष्कर्षमे पुग्ना बात हुइल बा ।’ उहाँ संरक्षकसहितके बैठकमे इ बीचमे हुइल घटनाक्रमके समेत समीक्षा हुइल बटैटी आब एकमत होके आघे बह्रनामे छलफल केन्द्रीत हुइल बटैलै ।
उहाँ नाउपामे हुइल बिवाद कैसिक समाधान कैना बिषयमे फेन छलफल हुइल कहटी हमार नेतृत्वमे सरकार बनलपाछे इ बिवाद साम्य हुइना उहाँके तर्क रहे । छलफलमे नाउपासे प्रदेश सभा सदस्यसे पदमुक्त हुइल इन्दिरा गिरीसहितके सक्कु सांसद सहभागी रहल रहिट ।
संघमे लावा समीकरण बनलपाछे नाउपामे अध्यक्ष रञ्जिता श्रेष्ठ ओ संरक्षक रेशम चौधरीबीच विवाद सिर्जना हुइल रहे । रञ्जिता सुदूरपश्चिममे लावा गठबन्धनके पक्ष ओ रेशम कांग्रेसके पक्षमे रहल रहिट ।
रेशमके जोडबलमे नाउपाके ७ मध्ये ५ जनहनहे मुख्यमन्त्री कमलबहादुर शाह मन्त्री बनाइल रहिट । मने रञ्जिता पक्षके कैलाशओ टीका थापा शाहहे विश्वासके मत नैडेहलपाछे मुख्यमन्त्री शाह २२ चैतमे पदसे राजीनामा डेहल रहिट ।
