भ्रष्टाचार अन्त्य नैहुइटसम देशके विकास असम्भ
पहुरा समाचारदाता
धनगढी, २८ चैत । धनगढी उपमहानगरपालिकाके नगरप्रमुख गोपाल हमाल भ्रष्टाचार अन्त्य नैहुइटसम देशके विकास असम्भव रहल बटैले बाटै । ओस्टके उहाँ सत्ता सञ्चालन करुइया राजनीतिक नेतृत्व इमानदार नैहुइटस फेन देशके विकास नैहुइना दाबी करले बाटै ।
चैतन्य पाठशालासे आयोजित धनगढीमे हुइल सुशासन, दिगो विकास ओ समृद्ध सुदूरपश्चिम विषयक प्रादेशिक सम्मेलनहे सम्बोधन कैटी उहाँ देशके विकासके लाग भ्रष्टाचारके अन्त्य हुइना आवश्यक रहल बटाइल रहिट । साथे राजनीतिक इच्छाशक्ति ओ नेतृत्वमे इमानदारीता फेन आवश्यक रहल औँल्याइल रहिट ।
नगर प्रमुख हमाल राजनीतिक नेतृत्व इमानदार नैहोके मुलुकमे भ्रष्टाचार, अनियमितता ओ ढिलासुस्ती बह्रल बटैलै । ‘हमार मुलुकमे अब्बेसम नेताहुक्रनके उद्देश्य पार्टी बनैना, पार्टी बचैनामे किल ध्यान रहल बा, देश बनैनामे केक्रो ध्यान गैल नैहो,’ उहाँ कहलै, ‘पार्टी बचैना, पार्टी बनैना कहलक कार्यकर्ताहे योजना डेना हो ।’
नगरप्रमुख हमाल उपभोक्ता समिति भ्रष्टाचार सिकैना अखडा बनल फेन बटाइल रहिट । ‘उपभोक्ता समिति भ्रष्टाचार सिखैना अखडा बनल बावै । उपभोक्ता समितिमे एक करोडके योजना पैलेसे ६० लाखमे काम निर्माण व्यवसायीहे डेजाइठ् ओ ४० लाख खैना प्रवृत्ति रहल बा,’ नगर प्रमुख हमाल कहलै, ‘धनगढीमे हम्रे उपभोक्ता मार्फत काम कैना बन्द करले बाटी । योजना ठेक्कामे लगाके काम कैना व्यवस्था करले बाटी । टेण्डर लगाइबर बचल पैसा जनताके काममे सदुपयोग कैना करल बाटी ।’
उपमहानगरमे भ्रष्टाचार अन्त्य कैना तथा नागरिकहे सुविधा डेहक लाग अपने काम करटी रहल बटैलै । औद्योगिकीकरण तथा शिक्षा ओ स्वास्थ्यमे विकास हुइ नैसेकके सुदूरपश्चिममे गरिबी विगतके तुलनासे बह्रल उहाँके तर्क रहल बा । जनताके पक्षमे काम नैहोके, जनताके अवस्था सुधार हुइना योजनामे लगानी नैहोके सुदूरपश्चिममे गरिबी घट्नाके सट्टा बह्रल उहाँ बटैलै ।
सुदूरपश्चिम कर्णालीसे फेन गरिबीके अवस्थामे पुगल उल्लेख कैटी गरिबी निवारणके लाग शिक्षा ओ स्वास्थ्य क्षेत्रमे राज्यके लगानी हुइ पर्ना बटैलै । सरकारी अस्पतालमे स्तरीय सुविधा नैहोके बिरामी परलपाछे घरजग्गा बेचके निजी अस्पतालमे महँगो शुल्कमे उपचार करे पर्र्ना बाध्यता रहटसम गरिबी घटे नैसेकना उहाँके तर्क रहे । सरकारी अस्पतालमे स्तरीय ओ सहुलियतमे उपचार नैपाके फेन सर्वसाधारण गरिबीके चपेटामे परल नगर प्रमुख हमालके कहाइ रहल बा ।
औद्योगिक क्षेत्र ओ मेडिकल कलेज नैरहल एकठो किल प्रदेश सुदूरपश्चिम रहल उल्लेख कैटी गरिबी बह्रनामे व्यक्तिके आय बह्रैनामेरके रोजगारीके अवसर नैरहल उहाँ बटैलै ।
सुदूरपश्चिममे का कैना कहिके संघसे निक्र्याेल कैडेहे पर्ना उहाँ बटैलै । ‘पर्यटन, उद्योगधन्दा, कृषिमे का कैना कहिके निक्र्याेल करे परल, आब एक प्रदेश एक उत्पादनके अवधारणामे जाइ परर्ल,’ नगरप्रमुख हमाल कहलै, ‘हमारसँग स्रोतसाधनके नैहो, इच्छाशक्तिके कमी रहल बा ।’
सुदूरपश्चिम विश्वविद्यालयके पूर्वरजिस्ट्रार प्राध्यापक डा. हेमराज पन्त मुलुकमे सङ्घीयता अइलेसे फेन जनताके अवस्थामे परिवर्तन आइ नैसेकल बटैलै । रोजगारीके लाग भारत जाइ पर्ना बाध्यता यहाँ अब्बे फेन ओस्टे रहल उहाँ बटैलै ।
‘वनबासाके पुलमे जाके हेरलेसे हुइठ्, ८० बरसके वद्ध ओ बालक कामके लाग भारत जैटी रह डेखजाइठ् । उहाँहुक्रनके बुडुबाजेके पुस्ता फेन उहोँरे जाइट,’ डा. पन्त कहलै, ‘मै कैलाली क्याम्पसमे ४० बरससे पह्रैटी रहल बाटुँ । उ बेला क्याम्पस जाइबर काठीक बोझा बोकल मनै डगरामे भेँटजाइट, अब्बे क्याम्पस जाइबर फेन ओस्टहे डेख्ठु । जनताकेअवस्थाओस्टहे रहल बा ।’
कार्यक्रमके उद्देश्य तथा सहभागी पहुनाहुक्रनहे स्वागत चैतन्य पाठशालाके अध्यक्ष गणेश प्रसाद जोशी करल रहिट । उहाँ चैतन्यसे बरसमे एकचो राष्ट्रिय सेमिनारके आयोजना कैटी आइल बटैलै । मने इ बरस प्रदेश स्तरमे सम्मेलन आयोजना करल बटैलै । उहाँ विशेषकैकेसुशासन,दिगो विकास ओ समृद्धिके यात्रामे सुदूरपश्चिमहे केन्द्र भागमे राखकेसम्मेलन करल बटैलै ।
कार्यक्रममे लोक सेवा आयोगके पूर्व अध्यक्ष उमेश प्रसाद मैनालीसे राजनीतिक, प्रशासनिक, सुशासनबारे प्यानल छलफल करल बा ।
ओस्टके सुदूरपश्चिम प्रदेश सरकारके प्रमुख सचिव डा. हरि लम्सालसे दिगो विकास लक्ष्य विषयमे छलफल करल बा ।
ओस्टके डा. ताराप्रसाद जोशी, धर्मराज पाठक, सुशील मिश्र भट्ट, खडकराज जोशी बिचसुसंस्कृत राजनीति, सुशासन ओ समृद्धि विषयक प्यानल छलफलमे दिर्घराज उपाध्याय सहजीकरल करण करल रहिट ।
कलेसे डा. हेमराज पन्त, पुष्करराज ओझा, रामलाल जोशी, ठाकुर करिया प्रधान बिच समुन्नत सुदूरपश्चिमके आयाम विषयक प्यानल छलफलमे प्राध्यापक सीताराम भट्ट सहजीकरण करल रहिट ।
