मुक्तकमैयाहुकन आर्थिक रुपमे शसक्त बनैना जरुरी बाः गाउँपालिका अध्यक्ष
पहुरा समाचारदाता
हसुलिया, २८ चैत । कैलारी गाउँपालिकाके अध्यक्ष राजसमझ चौधरी मुक्तकमैयनहुकनके आर्थिक रुपमे शसक्त बनैना जरुरी रहल बटैले बटै ।
बुधके रोज मुक्त कमैया महिला विकास मञ्च कैलालीके आयोजनामे लुथरन विश्व फेडरेशन नेपालके आर्थिक तथा प्राविधिक सहयोगमे कैलारी गाउँपालिकामे मञ्चसे सञ्चालित कार्यक्रम ‘समुदाय सशक्तिकरण तथा विकासका लागि स्थानीय पहल परियोजना’के गाउँपालिकास्तरीय कार्यक्रमके जानकारी तथा समन्वय बैठकमे उहाँ उ बाट बटवाइल रहिट ।
सरकारसे २०५७ सालमे कमैया मुक्तीके घोषणापाछे कोई कमैया जग्गा पाइल कोई अभिनफे जग्गा नइपाके आन्दोलन करटी रहल अध्यक्ष बटैलै । मुक्तकमैया पुनस्र्थापनाके काम संघीय लागु हुइलपाछे रुकल कारण टमान जैसिन मुक्तकमैया अभिन जग्गा नइपाइल उहाँ बटैलै । मुक्तकमैयनहे अब्बे जग्गा डेहे नइसेक्लेसे सीपमुलक आयमुलक कार्यक्रम जारे सेक्लेसे आर्थिक रुपमे शसक्त बनाई सेक्ना बटैलै । आयमुलक सीप तालिमके लाग छनौट करलेसे काम करे सेक्ना व्यक्तिहुकनहे छनौट कैनाफे गाउँपालिका अध्यक्ष आग्रह करलै ।
कार्यक्रमके विशिष्ट पहुना गाउँपालिका उपाध्यक्ष भगवतीकुमारी चौधरी वडा नम्बर ३ ओमनगर मुक्तकमैया बस्तीके समाधानके लाग सम्बन्धित निकायसे बहुट चो आवाज उठाइल मने सुनुवाई नइकरल बटैली । उहाँ कहली, ‘संघीय सरकारसे स्थानीय तहहे हक अधिकार नइडेना अपन पालिकाके मुक्तकमैया पुनस्र्थापना करोफे कना यी चाही नइमिलल बटैली । कैलारीके ओमनगर मुक्तकमैया बस्तीके समस्या समाधानके लाग जिल्ला प्रशासन कार्यालय, डिभिजन वन कार्यालयसे बारम्बर अनुरोध करल बा । वन कार्यालय बनुवामे बैठाई नइपैना कहलपाछे ओइनके समस्या नइहुइल हो ।,
मुक्त कमैया महिला विकास मञ्चसे सञ्चालित ‘समुदाय सशक्तिकरण तथा विकासका लागि स्थानीय पहल परियोजना’से ढेर जनहनहे टमान मेरिक सीप प्रदान करल गाउँपालिका उपाध्यक्ष बटैली । पुनस्र्थापनासे बञ्चित रहल मुक्तकमैयनहे सीपमुलक आयमुलक कार्यक्रममे जोरसेक्लेसे आर्थिक रुपमे शसक्त बनाई सेक्ना उहाँ बटैली ।
मुक्त कमैया महिला विकास मञ्चके अध्यक्ष सीमाकुमारी चौधरीके अध्यक्षतामे हुइल कार्यक्रममे मञ्चके कार्यक्रम संयोजक इन्द्रजित चौधरीके परियोजनासे संचालन करल गतिविधिबारे जानकारी डेहल रहिट । उहाँ समुदाय सशक्तिकरण तथा विकासका लागि स्थानीय पहल परियोजनाके आगामी बजेट रु. २९ लाख ४० हजार ओ मुक्त कमैयाहरुको लागि सामाजिक, आर्थिक अधिकार प्रबद्र्धधनके लाग साझेदारी कार्यक्रमके आगामी बजेट रु. ९ लाख ३२ हजार ९२१ रुप्या रहना जनैलै ।
मुक्त कमैया महिला विकास मञ्चके संस्थापक अध्यक्ष कौशिला चौधरी कार्यक्रमके उद्देश्यबारे जानकारी तथा स्वागत करल रहिट । कार्यक्रममे वडाध्यक्षहुक्रे, सम्बन्धित शाखा प्रमुख ÷ प्रतिनिधिलगायत ३२ जानेक सहभागिता रहे । कलेसे सञ्चालन व्यवसाय विकास अधिकृत रामभरोसे चौधरी करल रहिट ।
