शिक्षकहे कठरिया भाषा सम्बन्धी तालिम

पहुरा समाचारदाता
सुखड, ५ बैशाख । कैलालीके घोडाघोडी नगरपालिका वडा नं. १ सुखडमे कठरिया भाषा सम्बनधी शिक्षकहे तालिम डेहल बा । शिक्षकहे पह्रैना लिखैना सजिल हुइना उद्देश्यसे तालिम डेहल हो । हिमाली आदिवासी समाज काठमाडौं ओ कठरिया समाज नेपालके सहकार्यमे शिक्षकहे दुई दिने तालिम डेहल जनाइल बा ।

पढाई प्रवाह परियोजना अन्तरगत कठरिया भाषाके सरासर पह्रना, लिख्ना कक्षा कैलालीके १५ ठो कठरिया गाउँमे लागु हुइल बा । उहे अनुरुप पहिल चरणमे सरोकारवालाहुक्रनके बैठक, स्थलगत सर्बेक्षण, पाठ्यपुस्तक निर्माण लगायतके कार्य सम्पन्न हुइल पश्चात् उ कार्यके निरन्तरता स्वरुप दुई दिने शिक्षक तालिम आयोजना करल हिमाली आदिवासी समाज नेपालके फिल्ड सुपरभाइजर टीआर कठरिया बटैलै ।

उहाँदुई दिने शिक्षक तालिम पश्चात शिक्षकहुक्रे आपन गाउँमे गाउँके भल्मन्सा, अगुवा ओ बुद्धिजीवीहुक्रनके सहयोगमे २५ से ३० जाने समके सहभागी छनौंट कैके धाराप्रवाह रुपमे कक्षा सञ्चालन कैना बटैलै । हरेक गाउँमे १ महिनासम चल्ना कक्षामे देवनागरीमे मजासे पह्रे ओ लिखे सेकुइयाहुक्रनके सहभागी रहना बा । इ कक्षासे अन्य भाषा पह्रना ओ लिख्नामे अब्बल रहल व्यक्तिहुक्रनहे आपन भाषामे समेत कुछ चिज लिख्ना ओ पह्रना उत्प्रेरणा मिल्ना सहयोगी संस्थाके ठम्याँई रहल बा ।

कठरिया भाषा सरासर पह्रना, लिख्ना कक्षा सञ्चालनके लाग हुइल शिक्षक तालिममे परियोजना लागु हुइल जिल्लाके मुनवा, लक्कड, घुसरी, सिमरी, तुल्सिपुर, भुरवा, मुडा, सुवरखाल, बगुलइहिया, सिसैया, तपा, कोंटा, चर्रा, पवेरा, ओ लौसाके प्रतिनिधिहुक्रनके सहभागीता रहल रहे ।

तालिमके सहजीकरण एसआईएल इन्टरनेशनलके निर्देशक पृथ्वी चौधरी, हिमाली आदिवासी समाजके कार्यक्रम संयोजक टेसिडेमा भोटे ओ फिल्ड सुपरभाइजर टिआर कठरिया करल रहिट ।