इजरायलमे ज्यान गुमाइल विद्यार्थीके परिवारहे आर्थिक सहयोग
पहुरा समाचारदाता
टीकापुर, २६ अगहन । इजरायलमे हमास विद्रोहीके आक्रमणमे परके ज्यान गुमाइल विद्यार्थीहुक्रनके सम्झनामे मंगरके टीकापुरमे स्मृति सभाके आयोजना करल बा ।
सुदूरपश्चिम विश्वविद्यालय कृषि विज्ञान संकायसे सभाके आयोजना करल हो । सभामे बोल्टी सुदूरपश्चिम प्रदेशके मुख्यमन्त्री कमलबहादुर शाह इजरायल घटनासे मुलुक ढेर क्षति व्यहोरे परल बटैलै । उहाँ अनाहकमे नागरिक गुमाइ परेबर जीवनभर बिर्से नैसेकजैना पीडा महशुस हुइटी रहल बटैलै ।
‘मृत्यु सत्य हो । हरेकजे जन्मलपाछे मरे परठ्’ उहाँ कहलै –‘मने कौनो कौनो मृत्यु जीवनभर बिर्से नैसेकजाइठ् । इ घटना फेन ओस्टहे हो ।’
उहाँ घरपरिवारके सपना साकार पर्ना विद्यार्थीहुक्रनके लक्ष्य अधुरो रहे पुगल बटैटी प्रदेश सरकार सदैव पीडित परिवारके साथमे रहना प्रतिवद्धता व्यक्त करलै । उहाँ पीडित परिवारके जीविकोपार्जनके लाग सेक्ना सहयोग कैना बटैलै ।
उहे सभामे बोल्टी इजरायली राजदूत खनान गोदर वहाँ मारल विद्यार्थीनके परिवार आब आपन परिवार सरह हुइल बटैलै । उहाँ इजरायल सरकारसे मृतकके परिवारहे अपने परिवार सरह सहयोग कैना बटैलै । ‘आब अपनेहुक्रे हमार परिवार हुइटी’ उहाँ कहलै –‘इजरायल सरकार अपनेनके साथमे बा ।’
उहाँ त्रिभुवन विमानस्थलसे अपनहे हात मिलाके विदाई करल विद्यार्थीनके बारेम खबर सुने परेबर बहुट दुःख लागल बटैलै । उहाँ उ क्षण आपन लाग जीवनके कठिन रहल बटैलै । ‘उ मोर लाग बहुट कठिन क्षण रहे’ उहाँ कहलै –‘मै हात मिलाके विदाई करल रहुँ ।’
उहाँ इजरायल ओ नेपालके झण्डै साठी बरस लम्मा सम्बन्धमे हमास तिक्तता लाने खोजल बटैलै । उहाँ खराब मनै समस्या खडा कैलेसे फेन दुई देश बिचके सम्बन्धमे कौनो असर नैपर्ना बटैलै ।
कार्यक्रममे हमासके नियन्त्रणमे रहल कञ्चनपुरके विपिन जोशीके बाबा महानन्द जोशी छावा अइना पर्खाईमे रहल बटैलै । उहाँ इजरायली राजदूतसँग छावाहे घुमाडेना आग्रह करलै । उहाँ युद्धविरामके अन्त्य पश्चात आफ्न परिवार थप निराश हुइल बटैलै ।
राजदूत गोदर जोशीसँग बातचित कैटी विपिनहे सकुशल उद्धार कैना बारेम पहल हुइटी रहल बटैलै । उहाँ विपिन नेपाल अइनामे विश्वस्त रहन आग्रह करलै ।
टीकापुरस्थित सुदूरपश्चिम विश्वविद्यालय अन्र्तगत कृषि विज्ञान संकायके १० जाने विद्यार्थीके कुँवार २० गते इजरायलमे हमासके आक्रमणमे परके ज्यान गुमाइल रहिट ।
ज्यान गुमुइयामे बझाङके गणेशकुमार नेपाली, डोटीके पदम थापा, डोटीके राजन फूलारा, दार्चुलाके लोकेन्द्रसिँह धामी, दार्चुलाके दिपेशराज बिष्ट, कैलालीके नारायणप्रसाद न्यौपाने, कैलालीके आशिष चौधरी, सल्यानके प्रवेश भण्डारी, सुनसरीके राजेशकुमार स्वर्णकार ओ धनुषाके आनन्द शाह रहल बाटै ।
उहाँहुक्रे लर्न एण्ड अर्न कार्यक्रम अन्र्तगत वहाँ पुगल हुइट । उहे कार्यक्रमे उहाँहुक्रे सहित विश्वविद्यालयसे ४९ जाने विद्यार्थी गैल रहिट । उ मध्ये कञ्चनपुरके विपिन जोशी अब्बेसम बेपत्ता रहल बाटै ।
मृतकके परिवारहे सहयोग हस्तान्तरण
सुदूरपश्चिम प्रदेश सरकारसे मृतक विद्यार्थीनके परिवारहे आर्थिक सहयोग करले बा । घटना लगत्ते घोषणा करल सहयोग रकम आन्तरिक मामिला तथा कानून मन्त्री शिवराज भट्ट स्मृति सभामे हस्तान्तरण करले बाटै ।
उहाँ प्रति परिवार दुई लाखके दरसे सहयोग रकम हस्तान्तरण करल रहिट । उ रकम सुदूरपश्चिम प्रदेशके टमान जिल्लामे स्थायी घर रहल सात जाने मृतक विद्यार्थीहुक्रनके परिवारहे हस्तान्तरण करल हो ।
उहे अवसरमे विश्वविद्यालयके प्राध्यापक ओ कर्मचारीनसे संकलित रकम समेत मृतक विद्यार्थीनके परिवारहे प्रदान करल बा ।
अस्टेक, मृतक विद्यार्थीहुक्रनके परिवार अक्षयकोष स्थापनाके घोषणा करले बाटै । उहाँहुक्रे मध्ये राजन फूलारा ओ पदम थापाके परिवार ओइसीन घोषणा करल हुइट ।
फूलाराके डाडा टीका फूलारा १ लाख ५१ हजार १०१ रुपैयाँके अक्षयकोष स्थापना कैना घोषणा करल रहिट । उहाँ कार्यक्रममे आपन बात राखे नैडेहल प्रति दुःख व्यक्त करलै । उहाँ मृतकके परिवारके पीडाहे वेवास्ता करल महशुस हुइल बटैलै ।
थापाके डाडा दानबहादुर थापा समेत भैयक स्मृतिहे जीवित राखक लाग अक्षयकोष बनैना बटैलै । उहाँ पैसासे भैया फिर्ता नैअइना कहटी भैया लगायत सक्कु जनहनहे स्मरण हुइना मेरके कौनो काम कैना सुझाव डेलै ।
मृतकके परिवारहुक्रनके बात सुनलपाछे सुदूरपश्चिम विश्वविद्यालय कृषि विज्ञान संकायके डीन डा. विष्णु विलास अधिकारी विद्यार्थीहुक्रनके सम्झनामे अक्षयकोष ओ शालिक स्थापना कैना प्रतिवद्धता व्यक्त करल रहिट ।
