भौतिक सुख बह्रता, खुशी घटताः मुख्य सचिव
पहुरा समाचारदाता
धनगढी, ६ बैशाख । बह्रमाकुमारी ईश्वरी विश्व विद्यालय क्षेत्रीय प्रशिक्षण केन्द्र धनगढीसे लौव बरसके शुभकामना प्रदान कैगिल बा ।
सुदूरपश्चिम प्रदेश सरकारके मुख्य सचिव डा हरि लम्सालके बरका पहुनामे हुइल कार्यक्रममे उहाँ अब्बे भौतिक सुख बह्रटी गैलेसेफे खुशी घटटी गैल बटैलै । समाजमे बैचैनी, सन्तोष बह्रटी गैलपाछे आत्महत्याके संख्या बह्रलफे उहाँ बटैलै ।
उहाँ कर्मचारीहुकनके मिठास व्यवहार नइहुइल कारण सेवा लेहे आइल सेवाग्राही निराश हुइटी गैल कहटी आजसे कर्मचारीहुकनके तालिम डेहे जैटी रहलफे बटैलै ।
नेपाल पत्रकार महासंघ कैलालीके अध्यक्ष हिमालय जोशी ओम शान्तिसे सामाजिक कार्यमे महत्वपूर्ण भुमिका निर्वाह करटी आइल बटैलै । ओम शान्तिसे टमान मेरिक जनचेतनामुलक कार्य साथे समाजहे बह्रटी गैल लागु औषध दुव्र्यशनी न्यूनिकरण कैना मेरिक कार्य करल बटैलै । उहाँ ओम शान्तिके करल हरेक कार्यमे महासंघसे समन्वय करटी आघे बह्रना तयार रहल बटैलै ।
कार्यक्रममे ओम शान्तिके महेन्द्र खनाल, सुदूर सन्देश दैनिकके सम्पादक हेमन्त पौडेल, धर्मराज भट्टलगागतसे शुभकामना मन्तव्य व्यक्त करल रहिट । बह्रमाकुमारी ईश्वरी विश्व विद्यालय क्षेत्रीय प्रशिक्षण केन्द्र धनगढीके सहसंचालिका दुर्गा बैनीके अध्यक्षतामे हुइल कार्यक्रमके संचालन हेमराज भण्डारी करल रहिट । यिहे विच ओम शान्तिसे मायाके चिनोमे फुलाके टेलुवा ओ भित्रेपात्रो प्रदान कैगिल बा ।
