सुदूरपश्चिम प्रदेशके मुख्यमन्त्रीमे दीर्घ सोडारी नियुक्त
पहुरा समाचारदाता
धनगढी, ६ बैशाख । सुदूरपश्चिम प्रदेश सरकारके मुख्यमन्त्रीमे दीर्घबहादुर सोडारी नियूक्त हुइल बटै ।
सुदूरपश्चिम प्रदेश प्रमुख नजिर मियाँ नेपालके संविधानके धारा १६८ के उपधारा २ बमोजिम सोडारीहे मुख्यमन्त्रीमे नियुक्त करल हुइट । नवनियूक्त मुख्यमन्त्रीके सपथ ग्रहण अब्ब साँझयके ७ बजे कैना कार्यक्रम रहल बा । नेकपा एमालेके १०, नेकपा माओवादी केन्द्रके १०, एकिकृत समाजवादीके ४, नागरिक उन्मुक्ती पार्टीक २ ओ स्वतन्त्रके १ सांसदके समर्थनमे उहाँ मुख्यमन्त्रीमे दाबी पेश करल रहिट ।
नाउपाके पाँच सांसदसे प्रदेश प्रमुखहे कहलै– सोडारीहे हमार समर्थन नइहो
सुदूरपश्चिम प्रदेशके नागरिक उन्मुक्ति पार्टी (नाउपा) के पाँच जाने सांसदहुक्रे एकीकृत समाजवादी संसदीय दलके नेता दीर्घ सोडारीहे मुख्यमन्त्रीमे समर्थन नइरहल बटैले बटै । ओइने प्रदेश प्रमुखहे पत्र बुझैटी यैसिन बटाइल हुइट ।
ओइने सोडारीसे मुख्यमन्त्रीमे दाबी पेस करेबेर कैलाश चौधरी ओ टिका थापासे हस्ताक्षर करके समर्थन करल कना बाट गैरसंवैधानिक, गैरकानुनी ओ संसदीय मान्यता विपरीत हुइल प्रस्ट परृले बटै ।
ओइने घनश्याम चौधरी दलके नेता रहल पत्र प्रदेश प्रमुखहे बुझैले बटै । जेम्ने लक्ष्मणकिशोर चौधरी, घनश्याम चौधरी, इन्दिरा गिरी, रामेश्वर चौधरी, खुसीराम चौधरी हस्ताक्षर करले बटै । ओइने पाँचु जाने नाउपाके संरक्षक रेशम चौधरी निकट हुइट । नाउपा अध्यक्ष रञ्जिता श्रेष्ठ पक्षके कैलाश चौधरी अपने दलके नेता रहल दाबी करटी आइल बटै ।
नाउपा अध्यक्ष श्रेष्ठ कुछ दिनआघे घनश्याम चौधरीहे दलके नेतासे हटैटी तीन महिनाके लाग पार्टीसे समेत निलम्बन करल रहिट । विवादके बीच प्रदेश प्रमुख नजिर मियाँ सोडारीहे बिफे मुख्यमन्त्रीमे नियुक्त करले बटै ।
