धनगढीके टमान वडामे अपाङता स्क्रिनिङ शिविर संचालन
पहुरा समाचारदाता
धनगढी, ९ बैशाख । धनगढी उपमहानगरपालिकाके आयोजनामे सर्वाङिगण अपाङता विकास समाज नेपाल कैलालीसे धनगढीके टमान वडामे अपाङगता स्क्रिनिङ शिविर संचालन हुइटी रहल बा ।
सहायक सामाग्री वितरण करके अपांगता हुइल व्यक्तिहुकनके पहुँच अभिवृद्धि कैना उद्देश्यसे अपांगता हुइल व्यक्तिहुकनके शारीरिक अवस्था, कान ओ आँखा चेकजाँच करके आवश्यक सहायक सामाग्री पहिचान कैना क्लस्टर बमोजिमके ठाउँमे स्क्रिनिङ क्याम्प संचालन हुइटी रहल सर्वाङिग अपाङगता विकास समाजके कार्यकारी निर्देशक नन्दराज भट्ट बटैलै ।
अँटवारके रोज धनगढी उपमहानगरपालिकाके वडा नम्बर १० मे हुइल स्क्रिनिङ शिविरमे वडा नम्बर ९, १० ओ १२ मे रहल अपाङगता हुइल व्यक्तिहुकनके लाग सहायक सामग्री नापजाँच कैगिल उहाँ बटैलै । चेकजाँचमे सहभागी ७० जनहन मन्से ४५ जाने सहायक सामाग्री पैना योग्य रहल उहाँ बटैलै ।
सोम्मारके रोज धनगढी उपमहानगरपालिकाके वडा नम्बर ११ घोरसुवा शहरी स्वास्थ्य केन्द्रमे संचालन हुइना बा । जेम्ने वडा नम्बर ६, ११ ओ १३ नम्बर वडाके अपाङगता रहल व्यक्ति सहभागीहुक्रे स्क्रिनिङ कैना कार्यकारी निर्देशक भट्ट बटैैलै ।
निशुल्क स्वास्थ्य जाँच शिविर यिहे १२ धनगढी उपमहानगरपालिकाके अंङगानामे हुइना ओ यहाँ १,२,३,४,५,७ ओ ८ नम्बर वडाके अपाङगता रहल व्यक्तिनके स्क्रिनिङ जनागिल बा । निशुल्क स्वास्थ्य जाँच शिविरमे सहायक सामाग्री पैना योग्य रहल व्यक्तिनहे एक महिना भिटर उ सामाग्री वितरण कैनाफे जनैलै ।
