कैलारीके बालविकास कक्षामे स्थानीय सामाग्रीके प्रयोगसे शिक्षण सिकाई प्रभावकारी बनल

पहुरा समाचारदाता
हसुलिया, ११ बैशाख । ‘नेपालमा प्रारम्भिक बालशिक्षा र विकासको सवलीकरणका लागि प्रारम्भिक सिकाइ तथा विकास मापदण्ड कार्यान्वयन परियोजना’के समिक्षा तथा सामाजिक लेखा परिक्षण कार्यक्रम मंगरके रोज हसुलियामे हुइल बा ।

युनिसेफ नेपालके आर्थिक सहयोग, सेतो गुराँस राष्टिय वालविकास सेवा केन्द्रके प्राविधिक सहयोग, कैलारी गाउँपालिकाके सहकार्य ओ पीसविन कैलालीके स्थानीय साझेदारीमे सञ्चालित उ परियोजना कैलारी गाउँपालिकामे २०७८ साल फागुन १७ गतेसे २०८१ बैशाख ३ गतेसम लागु हुइल रहे । परियोजनाके कुल बजेट ९७ लाख २५ हजार एक सय रहल रहे । जेम्ने युनिसेफ नेपालके सहयोग ५७ लाख १७ हजार २० रुप्या, स्थानीय तहके योगदान रकम १४ लाख ८४ हजार ओ साझेदार संस्थाके योगदान रकम २० लाख ६२ हजार ८ सय रहल रहे ।

परियोजनाके समिक्षा तथा सामाजिक लेखा परिक्षण कार्यक्रम गाउँपालिका अध्यक्ष राजसमझ चौधरीके अध्यक्षतामे हुइल कार्यक्रममे उहाँ प्रारम्भिक बालविकास कक्षा सचालन हुइलपाछे बालवालिकाके सिकाइ तथा समग्र विकासके पक्षमे सकारात्मक प्रभाव परल बटैले बटै ।

उहाँ कहलै, ‘परियोजना लागु हुइलपाछे ढेर सुधार हुइल बा । पहिलेक कक्षा कोठा व्यवस्थापन, शिक्षकहुकनके पह्रैना शैलीसे अब्बे बहुट परिवर्तन हुइल बा । ओकरसंगे स्थानीय सामाग्रीके प्रयोग करके प्रयोगात्मक विधिसे अध्यापन कराईबेर विद्यार्थीहुकनके सिख्ना ओ बुझना शैलिमे परिवर्तन आइल बा ।’ परियोजनाके मजा सिकाईहे गाउँपालिकासे उहीहे निरन्तरता डेना प्रयास कैना उहाँ प्रतिवद्धता जनैलै ।

बालविकास केन्द्रके बसाइ व्यवस्थापन, सिकाइ क्षेत्र व्यवस्थापनमेफे सुधार हुइल ओरसे सक्कु जाने अपन क्षेत्रसे काम कैना आवश्यक बा ।’ पालिकाके अभिभावक समेट रहल गाउँपालिकासे सदैव सहकार्य ओ समन्वय कैना प्रतिवद्धता व्यक्तफे करले बटै ।

कैलारी गाउँपालिकाके उपाध्यक्ष भगवतीकुमारी चौधरी ‘नेपालमा प्रारम्भिक बालशिक्षा र विकासको सवलीकरणका लागि प्रारम्भिक सिकाइ तथा विकास मापदण्ड कार्यान्वयन परियोजना’ लागु हुइलपाछे अब्बे गाउँघर सहजुले भेटा सामाग्री विद्यार्थीहु्कनके कक्षा कोठामे व्यवस्थापन करके धारल ओ उहीहे प्रयोग करके प्रयोगात्मक विधिसे पह्राईबेर विद्यार्थी सहजुले बुझना सिखल बटैली । उहाँ कहली, ‘कौनो चिजहे असिन रहठ कनासेफे उहे चिजहे प्रत्यक्ष रुपमे धारके प्रयोगात्मक विधि अपनेलेसे झन प्रभावकारी रहठ । जौन यि परियोजना लागु हुइलपाछे सिकाईसँगे अध्यापन करैैना तौर तरिका शिक्षकहुक्रे सिखल ओ कक्षामे लागु कैगिल बा ।’

सेतो गुराँस राष्टिय वालविकास सेवा केन्द्रके कार्यकारी निर्देशक शसी विसि कार्यक्रममे सहजीकरण करल रहिट । उहाँ परियोजना निश्चित समयके लाग केल रहल मने परियोजनासे सिखाइल मजा बाटहे स्थानीय तहसे विद्यालयमे लागु कैना जरुरी रहल बटैली ।

गाउँपालिकाके प्रमुख प्रशासकीय अधिकृत लक्ष्मीदत्त भट्ट स्थानीय तहमे एकीकृत प्रारम्भिक बालविकासके लाग योजना कार्यक्रम तथा अगामी योजना तर्जुमा समन्वय करके आघे बह्रना सुझाव डेलै ।

यूनिसेफे नेपालके नेपालगंन्ज शाखाके कार्यक्रम अधिकृत इन्द्रराज पन्त, ‘नेपालमा प्रारम्भिक बालशिक्षा र विकासको सवलीकरणका लागि प्रारम्भिक सिकाइ तथा विकास मापदण्ड कार्यान्वयन परियोजनाके संयोजक जानकी सिंह, दिपेन्द्र माविके प्रअ विनोद भट्टराई, अभिभावक रिता चौधरी, सरस्वती मावि बनकट्टाके शिक्षिक अन्जुकुमारी शर्मा, कालीमाई आविके शिक्षिक मायारानी चौधरी लगायतसे अपन बाट राखल रहिट ।

कैलारी गाउँपालिकामे शैक्षिक गुणस्तर अभिवृद्धि कैना करैना माध्यम– क्रियाशील बालविकास पद्दतिमे आधारित घुम्ती बैठक संचालन करटी आइल रहे ।

क्रियाशिल वालविकास सञ्चालनके लाग कैलारी गाउँपालिका अन्र्तगत ९ वडाके ४८ ठो विद्यालयके प्रारम्भिक बालविकास शिक्षक तथा कक्षा १ मे अध्यापन करैना शिक्षकहुकनके अलग अलग क्लष्टर स्तरके समुह गठन करल रहे । ओ प्रत्येक २ महिनामे १ चो घुम्ती बैठक सञ्चालन करटी आइल बा ।

प्रारम्भिक बालविकासके टमान कार्यक्रम सञ्चालन कैना क्रममे व्रिmयाशील बालविकास पद्दतिहे एक ठो अलगे कार्यक्रम नइहुके गुणस्तर अभिवृद्धि कैना करैना माध्यमके रूपमे लेहल बा । प्रारम्भिक बालविकास केन्द्र तथा कक्षा १ हे गुणस्तरता प्रदान कैना क्रियाशील बालविकास पद्दतिसे बालबालिका, सरोकारवाला, समुदाय, अभिभावक, व्यवस्थापन समिति, सहजकर्ता, कक्षा एकके शिक्षक, बालशिक्षक सक्रिया करैना कार्य करल बा । बालबालिकाके सर्वाङगीण विकासके अधिकारहे संरक्षण तथा सम्बद्र्धनके लाग विशेष महत्व डेना कार्यमे यी प्रक्रियासे कार्यक्रममे प्रभावकारीता नन्ना सहयोग पुगैले बा ।

बालविकास पद्दतिके उद्देश्य गर्भसे ८ बर्षके बालबालिकाके प्रारम्भिक सिकाइ तथा विकास (शारीरिक, बौद्धिक, सामाजिक, संवेगात्मक ओ भाषिक) के लाग वाल शिक्षक, कक्षा एकके शिक्षकके दक्षतामे सुधार कैना आवश्यक पर्ना वातावरण तयार कैना तथा उमेर अनुसार बालबालिकाके स्तरमापन करके ओइनके स्तर अनुसारके थप रणनीति कार्यान्वयन कैना करैना करल बा ।

विद्यालयहे बुककेस हस्तान्तरण

परियोजना अन्र्तगत कैलारी गाउँपालिका अन्र्तगतके सामुदायिक विद्यालयहे बुककेस हस्तान्तरण कैगिल बा । ‘नेपालमा प्रारम्भिक बालशिक्षा र विकासको सवलीकरणका लागि प्रारम्भिक सिकाई तथा विकास मापदण्ड कार्यान्वयन परियोजना’ अन्र्तगत पीसविन कैलालीके सहयोगमे कैलारी गाउँपालिकाके ४४ विद्यालयहे बुकेस हस्तान्तरण कैगिल रह्े ।

उ बुककेस गाउँपालिकाके अध्यक्ष राजसमझ चौधरी विद्यालयके प्रध्यानापकहुकनहे हस्तारण करले रहिट । कक्षा एकके विद्यार्थीनके लाग डेहल उ बुककेसमे कविता, कथा संग्राहलगायत टमान मेरिक किताव समावेश कैगिल बा ।
युनिसेफ नेपालके आर्थिक सहयोग, सेतो गुराँस राष्ट्रिय वालविकास सेवा, पीसवीन नेपालके प्राविधिक तथा कैलारी गाउँपालिकाके समन्वय ओ सहकार्यमे ‘नेपालमे प्रारम्भिक बालशिक्षा र विकासको सवलीकरणका लागि प्रारम्भिक सिकाइ तथा विकास मापदण्ड कार्यान्वयन परियोजना’ कैलारीके ४४ ठो सामुदायिक विद्यालयमे टमान गतिविधि संचालन हुइटी रहे ।

कार्यक्रममे टमान शाखाके प्रमुख, पिसविन कैलालीके सदस्य हर्क ओली, सेतो गुराँस राष्ट्रिय वालविकास कैलारी गाउँपालिका संयोजक सुरज परियार, इसिडि कक्षा संचालन रहल विद्यालयके प्रअ, शिक्षक प्रतिनिधिहुकनके सहभागिता रहल रहे । कार्यक्रम संचालन गाउँपालिकाके सामाजिक विकास शाखा प्रमुख यगम कलेल करल रहिट ।