भलमन्सा प्रणालीके संरक्षणमे कौनो कसर बाँकी नरख्ना प्रतिबद्धता

पहुरा समाचारदाता
हसुलिया, १२ बैशाख । कैलालीके कैलारी गाउँपालिकाके अध्यक्ष राजसमझ चौधरी भलमन्सा प्रणाली समाज संचालनके सबसे मजा लोकतान्त्रिक बिधि रहल ओरसे एकर संरक्षण ओ सम्बद्र्धनमे कौनो कसर बाँकी नैरख्ना प्रतिबद्धता जाहेर करले बटै ।

आदिवासी जनजातिनके मानव अधिकार सम्बन्धि वकिल समुह (लाहुर्निप) ओ थारु कल्याणकारिणी सभा कैलारी गाउँपालिकासे बुधके डिन (बैशाख १२ गते) आयोजित एक छलफलमे बोल्टी अध्यक्ष चौधरी उ बातके प्रतिबद्धता जाहेर करल रहिट ।
लाहुर्निप ओ थाकस कैलारी भलमन्साहुक्रन सक्रिय ओ सशक्त बनाइक लाग ओइन आवश्यक पर्ना पोठी तयारीक लाग कचेहरी बलैले रहे । कचेहरीमे भलमन्सा प्रणाली का हो ? भलमन्सा प्रणाली काकरे आवश्यक बा ? काकरे सबसे ढेउर लोकतान्त्रिक बा ? भलमन्सा प्रणालीहे काकरे बचैना जरुरी बा ? भलमन्साहुक्रन सक्रिय ओ सशक्त बनाइक लग लाहुर्निप, थाकस ओ पालिकाके भूमिका काकरे जरुरी बा ? ओइन कैसिन पोठीके जरुरत बा ? अस्टहीं बिषयमे छलफल हुइल रहे ।

छलफलके ओरौनीओर पालिका अध्यक्ष एवं बर्का पहुना चौधरी लाहुर्निपसे उठान कैगिल मजा सवालके सम्बोधनमे स्थानीय सरकार पाछे नाइपर्ना, नीतिगत निर्णय किल नाही, पालिका तन मन ओ धनसे फे सहयोग कर्ना प्रतिबद्धता जाहेर करनै । भलमन्सन जरुरी पर्ना पोठी छपाईक लग पालिकाके पुरापुर सहयोगी रही कहटी उहाँ खुलके घोषणा करल रहैं ।

कार्यक्रमके विशिष्ट पहुना गाउँपालिका उपाध्यक्ष भगवतीकुमारी चौधरी थारु समुदायके चलन अनुसार कलुवा खैना चलन हेराई लागल, लौवा अन्नपात खाईबेर लवाङगी करैना चलनफे लोप हुइना अवस्थामे पुगल टैली । उहाँ कहली थारु पोठीमे थारु संस्कृति समेटे पर्ना जोर डेली । टरटिहुवारमे एक रुपता नाने सेक्लेसे विदा डेना सहजुल हुइना बटैली । गाउँपालिकासे भल्मन्सा ऐन शशोधनसहित भर्खर पास करलफे बटैली ।

सहभागीहुक्रे पोठीमे भलमन्सनके कार्यअवधि, कर्तव्य, दायित्व समेत लिखल हुइक पर्ना सल्लाह डेहल रहैं । कचेहरीमे कैलारी गाउँपालिकाके कानुनी सल्लाहकार अधिवक्ता जोहारी लाल चौधरी ओ लाहुर्निपके संस्थापक सदस्य सर्जुप्रसाद चौधरी बिषय बस्तुक उठान करल रहैं कलेसे लाहुर्निपके कैलाली सहजकर्ता दिलबहादुर चौधरी छलफलके उद्देश्यक बारेम जानकारी करैले रहैं ।

कार्यक्रम थारु कल्याणकारिणी सभा कैलारीक सभापति अशोक चौधरीक सभापतित्वमे हुइल कार्यक्रममे न्यायिक समितिके संयोजक भगवती चौधरी, बिधायन समितिके सभापति बिकास चौधरी, वडाध्यक्ष, थाकस प्रतिनीधि, भलमन्सनके प्रतिनीधि सहितके उपस्थिति रहे ।