गुरगी बन्धुवा बनाई परल कटी किसानसे धर्नासहित सात दिने अल्टिमेटम

पहुरा समाचारदाता
धनगढी, १३ बैशाख । कैलालीके कैलारी गाउँपालिकाके किसानहुक्रे गुरगी बन्धुवा हलहाली बनाई परल कहटी सुदूरपश्चिम प्रदेशके भौतिक पूर्वाधार विकास मन्त्रालयमे बुधके रोज धर्नासहित सात दिने अल्टिमेटम डेले बटै ।

सिँचाइके लाग सरकारसे बर्सेनी बजेट विनियोजन करलेसेफे कार्यान्वयन नइहुइल कहटी किसानहुक्रे धर्ना डेहल हुइट । कैलारी गाउँपालिका २ कुकुरभुक्कास्थित कटैनी लडियामे बहुवर्षीय योजनाके रूपमे लेहल गुरगी सिँचाइ योजनाके लाग चालु आर्थिक वर्षमे सुदूरपश्चिम प्रदेश सरकार अन्तरगत भौतिक पूर्वाधार विकास मन्त्रालयसे १२ करोड बजेट विनियोजन करल बा । गैल आर्थिक वर्षमेफे ६ करोड बजेट विनियोजन करल रहे । मने कार्यान्वयनमे नइगैलपाछे स्थानीय किसानहुक्रे आन्दोलित हुइल रहिट । ओइने योजना कार्यान्वयन तत्काल हुई पर्ना कहटी संघर्ष सुरु करले बटै ।

यिहे बिच किसानहुक्रे भौतिक पूर्वाधार विकास मन्त्री कैलाश चौधरीहे योजना कार्यान्वयन लाग अल्टिमेटमसहितके माग पत्र बुझैले बटै । योजना कार्यान्वयन नइहुइलेसे चरणबद्ध रूपमे संघर्षके कार्यक्रम कैना गुरगी योजना संघर्ष समितिके संयोजक कमल प्रसाद चौधरी चेतावनी डेलै ।

संयोजक चौधरीके अनुसार सरकारसे योजना निर्माणके लाग आर्थिक वर्षमे ०७५/७६ मे ५० लाख, आव ०७९/८० मे ६ करोड बजेट कार्यान्वयन नइहुइटी फ्रिज गैल रहे । चालु आव ०८०/८१ फे विशेष अनुदानसे १२ करोड बजेट विनियोजन करलेसेफे हालसम कार्यान्वयनके प्रक्रिया समेत सुरु नइकरेबेर किसान आक्रोशित बनल बटै ।

संघर्ष समितिके संयोजक चौधरी कहलै, ‘यी सरासर जनताहे ठग्न प्रवृत्ति हो । करिब ७ हजार जनसंख्या योजना बन्लेसे लाभान्वित हुइटै । मने कार्यान्वयन नइहुके हम्रे बहुट दुःखी हुइल बटी । आजके खबरदारी ट्रेलर केल हो, कार्यान्वयन नइहुइलेसे काल्हके दिन जनता उतार्न तयार बटी ।’

ओस्टेक, कैलाली गाउँपालिका ५ के स्थानीय रेवन्त बोहरा कर्मचारी संयन्त्रसे अपन खुसी योजनाहे असफल घोषित करके जनताके सपनउप्पर गद्दारी करटी रहल बटैलै । उहाँ चालु अवके बजेट फिर्ता गैलेसे अपनेहुक्रे जैसिनफे संघर्ष कैना तयार रहल बटैटी काम नइकैना सिँचाइ विकास डिभिजन कार्यालय कैलाली, मन्त्रालयके सम्बन्धित कर्मचारीके राजीनामा समेत माग करलै ।

ओस्टेक गुरगी बाँध सिँचाइ जल उपभोक्ता संस्थाके अध्यक्ष भीष्मराज चौधरी डीपीआरके नाउँमे ठग्न काम हुइटी रहल कहटी आक्रोश व्यक्त करलै । यिहे बिच भौतिक पूर्वाधार विकास मन्त्री कैलाश चौधरी अपने सम्बन्धित निकायसंग बैठके योजनाबारे निकास डेना प्रतिबद्धता जनैलै ।

स्थानीय किसानसे ७ दिनभिटर कार्यान्वयनके प्रक्रियामे नइगैलेसे चरणबद्ध रूपमे संघर्षके कार्यक्रम कैना चेतावनी डेले बटै ।