कैलारीके गदरियामे सिकलिङ स्क्रेनिङ शिविर सुरु
पहिल दिन १४५ जाने रगत परिक्षणमे ४१ जनहनमे सिकलिङ पोजेटिभ
पहुरा समाचारदाता
हसुलिया, १३ बैशाख । कैलाली जिल्लाके कैलारी गाउँपालिका वडा नम्बर ९ स्थित गदरिया स्वास्थ्य चौकी, गदरिया बजारमे विफेक रोजसे सुरु हुइल सिकलिङ स्क्रेनिङ शिविर सुरु हुइल बा ।
पहिल दिन १४५ जाने रगत परिक्षणमे ४१ जनहनमे सिकलिङ पोजेटिभ सिकलसेल तथा थालेसेमिया रोगके पहिचानके लाग रक्त जाँच शिविरके पहिल हुइल दिनमे हुइल सिकलिङ स्क्रेनिङ शिविरमे १४५ जानेक रगत परिक्षणमे ४१ जनहनमे सिकलिङ पोजेटिभ डेखल बा ।
गदरिया स्वास्थ्य चौकी, गदरिया बजारमे आजफे शिविर संचालन रना कैलारी गाउँपालिका स्वास्थ्य शाखाके प्रमुख नरेशकुमार चौधरी बटैलै । उ स्वास्थ्य शिविर निमेष सामुदायिक अस्पताल एवं सिकलसेल रोग अनुसंन्धान केन्द्र, कृष्णपुर, गुलरिया तथा कैलारी गाउँपालिकाके संयुक्त आयोजना तथा सहकार्यमे हुइटी रहल बा । सिकलसेल तथा थालेसेमिया रोग पहिचानके लाग रक्त जाँच शिविर सञ्चालन कैलारी गाउँपालिकाके टमान वडामे संचालन हुइटी रहल बा ।
सिकलसेल तथा थालेसेमिया रोगके पहिचानके लाग रक्त जाँच शिविरहे आ–अपन वडा अन्तरगतके गाउँ÷टोल तथा समुदायमे बडघर ÷ भलमन्सा तथा महिला स्वास्थ्य स्वयं सेविका मार्फत थारु समुदायके ५ वर्ष उमेरसे उप्परके ओ हालसम सिकलसेल तथा थालेसेमिया रोग पहिचान सम्बन्धी रगत जाँच नइकरल सक्कु जनहनहे उ स्वास्थ्य शिविररमे जाँचके लाग प्रचार प्रसार तथा आवस्यक सहयोग कैना आग्रह कैगिल बा ।
उ स्वास्थ्य शिविरमे निमेष सामुदायिक अस्पताल एवं सिकलसेल रोग अनुसंन्धान केन्द्र, कृष्णपुर, गुलरियाके प्रमुख डा. फुलराम चौधरीलगायत उहाँक टिम, कैलारी गाउँपालिका स्वास्थ्य शाखा प्रमुख नरेशक्ुमार चौधरीलगायत गदरिया स्वास्थ्य चौकीके टिम सहभागी रहिट । उ शिविर आजफे संचालन रना बा ।
