धनगढी भोकेस्नल स्कुलसे ८९ तालिम लेलै, ४१ जाने पैलै रोजगारी

पहुरा समाचारदाता
धनगढी, १४ बैशाख । धनगढी उपमहानगरपालिकासे नेपाल युथ फाउन्डेसनसंगके सहकार्यमे चलाइल भोकेस्नल स्कुलसे यी वर्ष चार ठो तालिम सम्पन्न हुइल बा ।

धनगढी–१८ मे रहल भोकेस्नल स्कुलसे यी वर्ष चार विधामे ८९ जाने तालिम लेले बटै । नेपाल युथ फाउन्डेसनके सहकार्यमे २०८० कुवँर ६ गते खुलल धनगढी भोकेस्नल स्कुलमे यी वर्ष चार ठो तालिम सम्पन्न हुइल बा । पहिल चरणमे प्लम्बिङ ओ इलेक्टिकल तालिम हुइल रहे । पहिल चरणमे कुवाँरसे हुइल तालिममे ५२ जाने सहभागी मध्ये २७ जाने प्लम्बिङ ओ २५ जाने इलेक्ट्रिकल तालिम लेहल हुइट ।

दुसरा चरणमे हुइल वेल्डिङ सहायक ओ फर्निचर मेकरके तालिममे ३७ जाने सहभागी हुइलमे शुकके तालिम समापन हुइल बा । दुसरा चरणमे वेल्डिङ सहायकके ५५० घण्टे तालिममे २१ तथा ३९० घण्टे फर्निचर मेकर तालिममे १६ जाने तालिम लेले बटै ।
तालिम समापन पश्चात् उपप्रमुख कन्दकलाकुमारी राना युवाहुकनहे प्रमाणपत्र वितरण करल हुइट ।

उहाँ उपमहानगरपालिकाके नीति तथा कार्यक्रमअनुसार रोजगार तथा स्वरोजगार हुइना सहयोग कैना युवाहुकनहे टमान तालिम डेना भोकेस्नल स्कुल खोलल बटैली । तालिम पश्चात् युवा आयआर्जन कैना सक्षम हुइना ओ आर्थिक रुपसे आत्मनिर्भर हुइना विश्वास व्यक्त करली ।

कार्यक्रममे वडा नम्बर १८ के अध्यक्ष भुवन रिजाल ओ निमित्त प्रमुख प्रशासकीय अधिकृत नरेन्द्रबहादुर खातीके समेत उपस्थिति रहल रहे ।

तालिम लेह मध्ये ४१ जाने पैलैं रोजगारी

पहिल चरणमे तालिम लेहल ५२ जाने मध्ये ३३ जाने ओजिटीके क्रममे रोजगारी पैले बटै । पहिल चरणमे तालिम लेहल ३३ ओ अब्बे दुसरा चरणमे तालिम लेहल थप ८ जानेसहित ४१ जाने तालिम पश्चात् रोजगारी पाइल धनगढी उपमहानगरपालिकाके रोजगार संयोजक चन्द्र महरा बटैलै । “युवाहुकनहे लक्षित करके चलाइल तालिममे अब्बेसम ८९ जाने तालिम लेले बटै । उहाँ कहलै, ‘जौन मध्य ४१ जाने ओजिटीके क्रममे रोजगारी पैले बटै कलेसे कुछ अपनही काम करे लागल बटै ।’

धनगढी उपमहानगरपालिकासे नेपाल युथ फाउन्डेसनसंग चालु आर्थिक वर्षमे चार ठो तालिम सञ्चालन कैना सम्झौता करल रहे । धनगढीसहित अन्य पालिकाके बेरोजगार युवाहुकनहे तालिम डेना खोलल भोकेस्नल स्कुलमे चार ठो तालिम डेना ५२ लाख खर्च हुइल रोजगार संयोजक महरा बटैलै । जौन मध्ये २७ लाख युथ फाउन्डेसन ओ १५ लाख धनगढी उपमहानगरपालिकासे व्यवस्थापन करल हो । तालिम लेना मध्ये फूलबारी क्षेत्रसे बाहेरके युवाहे यातायात खर्च बापत मासिक २ हजार डेहल महरा बटैलै ।