कैलारीमे हुइल एकीकृत स्वास्थ्य शिविरके समिक्षा

पहुरा समाचारदाता
हसुलिया, १६ बैशाख । कैलाली जिल्लाके कैलारी गाउँपालिकाके चार ठो वडामे हुइल पाठेघरके मुहके क्यान्सर परिक्षण तथा प्रजनन स्वास्थ्य सम्बन्धी एकीकृत स्वास्थ्य शिविरके समिक्षा अँटवारके रोज हसुलियामे हुइल बा ।

समिक्षा कार्यक्रम कैलारी गाउँपालिका उपाध्यक्ष भगवतीकुमारी चौधरीके अध्यक्षतामे हुइल बा । उहाँ ग्रामीण भेगके महिलाहुकनमे पेट बठैना, पाठेघर सम्बन्धी बहुट समस्या रहल ओरसे पाठेघरके मुहके क्यान्सर परिक्षण तथा प्रजनन स्वास्थ्य सम्बन्धी एकीकृत स्वास्थ्य शिविरके संचालन हुइल बटैली । शिविरसे आर्थिक अवस्था कम्जोर रहल डिडी बहिनीया ओ बाहेर जाँच चेकजाँच कराईबेर लजैना दिदीबहिनीयाहुक्रे लाभान्वित हुइल हुइल बटैली । घरमे लर्कापर्कासे हेर्नासे लेके छोट भारी काम महिलाके मुरी ठोपारल कारण गर्भवती ओ सुत्केरी अवस्थामे काम कैना बाध्य हुइलपाछे पाठेघरके मुहके क्यान्सर हुइना सम्भावना ढेर रहल उपाध्यक्ष बटैली ।

ओस्टेक कैलारीमे सिकलसेल एनिमिया शिविर संचालन हुइटी रहल ओरसे जाँच करैना सक्कु जनहनहे सहभागिताके लाग अनुरोध करली । उहाँ गर्मी महिना बह्रलसंगे डेंगु संक्रमण फेरसे फैले सेक्ना कहटी सरसफाईमे ध्यान डेहे पर्ना ओ गोहुँक लरुवामे लगाइल आगी बस्तीमे फैलेसेक्ना कहटी लरुवामे आगी नइलगैना आग्रह करली ।

कैलारी गाउँपालिका स्वास्थ्य शाखाके आयोजना तथा सहास नेपाल ओ ओरेक नेपाल कैलालीके सहकार्यमे चार ठो वडामे पाठेघरके मुहके क्यान्सर परिक्षण तथा प्रजनन स्वास्थ्य सम्बन्धी एकीकृत स्वास्थ्य शिविर हुइल रहे ।
जेम्ने वडा नम्बर ४ मे चैत ६ गते, वडा नम्बर १ मे चैत १० गते, वडा नम्बर २ मे चैत १४ ओ वडा नम्बर ९ मे चैत १५ गते पाठेघरके मुहके क्यान्सर परिक्षण तथा प्रजनन स्वास्थ्य सम्बन्धी एकीकृत स्वास्थ्य शिविर कैलारी गाउँपालिका स्वास्थ्य शाखा प्रमुख नरेशकुमार चौधरी बटैलै ।

महिलाहुकनके यौन तथा प्रजनन् रोगके पहिचान उपचार तथा परामर्श सेवा प्रदान कैना, पाठेघरके मुहके क्यान्सरके स्क्रिनिङ तथा अपरेशन सेवा प्रदान कैना, पाठेघर झरल महिलाहुकनके उपचार तथा अपरेशन सेवाके लाग सिफारिस कैना, नम्मा अवधिके परिवार नियोजनके साधन प्रदान कैनाके साथे प्रोत्साहान तथा परामर्श सेवा प्रदान कैना, गर्भवती महिलाहे अल्ट्रासाउण्ड सेवा (भिडियो एक्सरे) प्रदान कैना उद्देश्यसे कार्यक्रम कैगिल रहे । चार वडामे एक÷एक दिन करके चार दिनसम संचालन हुइल एकीकृत स्वास्थ्य शिविरके ७१२ जाने स्वास्थ्य जाँच कराइल रहिट । ओम्नेसे ६ जनहनमे रिङ पेसरी डारल ओ दुई जनहनहे अपरेशनके लाग रिफर कैगिल स्वास्थ्य शाखा प्रमुख बटै ।

कार्यक्रम सञ्चालन करेबेर प्रजनन स्वास्थ्य सेवा सेवाग्राहीके प्राथमिकतामे नइपर्ना, अपन समस्या लुकैना प्रवृती, जनचेतनाके कमी, सेवा प्रदायक संस्था सम पहुँच नइहुइना, कामके सिजन हुइल ओरसे सेवाग्राही लक्ष्य अनुसार सेवा लेहे नइआइल चुनौती हुइल उहाँ बटैलै ।

ओस्टेक करके उहाँ चालु आर्थिक बर्षमे कैलारीमे ७ जनहनमे डेंगु संक्रमण हुइल ओरसे यिहीसे बाँचेक लाग हप्तामे एक दिन सरसफाई करटी आइल ओ सक्कु वडामे सरसफाईहे निन्तरता डेना डेंगु मच्छर बैठना अण्डा पर्ना ठाउँहे सरसफाई कैना आग्रह करलै ।

ओस्टेक सिकलसेल एनिमिया पत्ता लगाइक लाग भर्खर वडा नम्बर ९ मे सिकलिङ स्क्रेनिङ शिविर सम्पन्न हुके अँटवारसे वडा नम्बर ८ मे सुरु हुइल ओरसे जाँच करैना बाँकी रहलहे सहभागिता करादेना आग्रह करलै ।

कार्यक्रममे संचालन कैलारी गाउँपालिका स्वास्थ्य शाखाके सिअनमी अनिता चौधरी करल रहिट । कार्यक्रममे सक्कु वडाके वडा अध्यक्षहुक्रे, प्रमुख प्रशासकीय अधिकृत लक्ष्मी दत्त भट्ट, टमान शाखाके प्रमुखहुक्रे, सहास नेपालके कार्यक्रम अधिकृत नरेश चौधरी, शिविर संचालन हुइल स्वास्थ्य संस्थाके प्रमुख तथा प्रतिनिधिहुकनके सहभागिता रहे ।