सीमान्तकृत समुदाय आर्थिक रुपमे सवल हुइटैः गाउँपालिका उपाध्यक्ष

पहुरा समाचारदाता
हसुलिया, १६ बैशाख । कैलारी गाउँपालिकाके नौ वडामे सन २०२१ से २०२४ सम संचालन हुइल आधार परियोजनाके प्रगती तथा समिक्षा कैगिल बा । डिसिएके आर्थिक सहयोग तथा कैलारी गाउँपालिकाके समन्वयमे दलित महिला अधिकार मञ्च कैलालीसे तीन बरससम उ परियोेजना संचालन करल रहे ।

कैलारी गाउँपालिकाके उपाध्यक्ष भगवतीकुमारी चौधरीके बरका पहुनामे हुइल कार्यक्रममे परियोजनासे सीमान्तकृत समुदायके आर्थिक पक्ष बल्गर बन्टी गैल ओ ओइने आत्मनिर्भर हुइटी गैल बटैलै । आधार परियोजनासे सीमान्तकृत समुदायके टमान मेरिक ज्ञान सीप प्रदान करके जीवन जिना आधार खडा करले बा,’ गाउँपालिका उपाध्यक्ष कहली, ‘सीमान्तकुत समुदायके डिडी बहिनीयाहुक्रे अपने व्यापार, व्यवसाय संचालन करके आत्मनिर्भर हुइटी गैल बटै । नेतृत्व विकास बह्रल संगे बोले सेक्ना ओ हिंसामे परेबेर आवाज उठाई सेक्ना अवस्थामे पुगल बटै ।’

अब्बे भौतिक विकासहे विकास डेखना मने मानविय विकास, साामाजिक विकास उहीहे और ढेर आवश्यक रहल उहाँ बटैलै ।
आधार परियोजनासे ढेर डिडीबाबु अपनही सीप सिखाइल, व्यवसायी कैना, बचत कैना टौर तरिका सिखाइल ओरसे परियोजनाके मजा कामहे निरन्तता डेना जरुरी रहल बटैली । महिलाहुक्रे आत्मनिर्भर हुइलेसे हिंसाफे कम हुइना ओरसे अपने महिलाहुकनके लाग कार्यक्रम नानेक जबफे जोर डेहल बटैली ।

गाउँपालिकाके प्रमुख प्रशासकीय अधिकृत लक्ष्मी दत्त भट्ट कैलारी गाउँपालिका कृषिमे आधारित रहल ओरसे आयआर्जन ओ सीपमुलक कार्यक्रमसे जोरसेक्लेस आत्मनिर्भर बनाई सेक्ना बटैलै । यी परियोजनासे सार्वजनिक करल प्रगतीमे ढेर डिडबहिनीया लाभान्वित हुइल ओरसे मजा कामहे निरन्तरता डेना जरुरी रहल बटैलै ।

सामाजिक शाखा प्रमुख यगम कलेल आधार परियोजना मार्फत गठन हुइल समुहहे सक्रिय बनाई सेक्लेसे पाछेसम यकर मजा प्रतिफल अइना नइटे परियोजना सेकलपाछे समुहफे भटाभुङ हुइलेसे लगानी बालुमे पानी डारे जस्टे हुइना बटैलै । समुहहे संस्थागत बनाके विगतमे करटी आइल व्यापार ओ व्यवसायीहे निरन्तरता डेनाफे जरुरी रहल बटैलै ।

वडा नम्बर ४ के वडा अध्यक्ष ठागुराम चौधरी आधार परियोजनासे टिना खेती, व्यापार व्यवसायीके लाग कैगिल कार्यक्रम सह्रनिय रहल बटैलै । सीमान्तकृत समुदाय टिना खेती करके आर्थिक रुपमे बल्गर हुइटै । कलेसे दुना टपरी उद्योग संचालनसे स्थानीयस्तरमे रोजगारी सृजना हुइल अवस्था रहल बटैलै ।

महिला तथा बालबालिका शाखाके प्रमुख बालकुमारी चौधरी आधार परियोजनाके गतिविधिमे टिना खेती ओ छेगरीपालन उत्कृष्ट हुइल बटैली । परियोजनासे स्वच्छ खानेपानी, बालमैत्री धारा ओ विद्यालयमे कैगिल सपोट पठनपाठनमे सहयोग पुगल बटैली ।

छिमानन्द आधारभूत विद्यालय हसुलियाके प्रअ नबिलाल चौधरी ओ जनता आधारभूत विद्यालय रामपुरके प्रअ विनयकान्त पाठक परियोजनासे स्वच्छ खानेपानीमे लाग बायो पानी फिल्टर, बालमैत्री धारा सहयोग करलपाछे विद्यार्थी स्वच्छ पानी पिए भेटाइल बटैलै । विद्यालयमे पाठय सामाग्री ओ डराज सहयोग करलपाछे पठनपाठनमे सहयोग मिललफे उहाँहुक्रे बटैलै ।

ओस्टेक करके आधार परियोजना मार्फत गठन हुइल समुहके सदस्य सुशिला विक अपने यी परियोजनाके सहयोगसे व्यापार सुरुवाट करलपाछे आर्थिक रुपमे बल्गर बन्टी गैल बटैली । उहाँ कहली, ‘मै पहिले आर्थिक समस्या परेबेर औरे जनहनहे सहयोग मगु अब्बे हात फैलाई नइपरठ । आर्थिक रुपमे अपनही सवल हुइटी गैल बटु ।’ उहाँ अब्बे छेगरी पालनफे करटी करल ओर व्यवस्थित रुपमे खोर सुधार करके व्यवसायिक रुपमे छेगरी पालन करल बटैली । सुशिला कहली, मै पहिले बोले नइसेकु अब्बे जहाँफे बोले सेक्ना आँट बह्रल बा ।

समुहके सदस्य माया चौधरी अपने यी परियोजना २२ ठो मुरगी सहयोग पाके व्यवसाय सुरुवाट अब्बे उही सिकाईहे निरन्तरता डेटी दुई बोइलर मुरगीके फर्म संचालन करल बटैली ।

समुहके सदस्य शोभा परियार अपनेहुक्रे २०७४ सालसे यी परियोजनासे जोरल कहटी दलित समुदायहे आर्थिक रुपमे बल्गर बनाइक लाग टमान मेरिक कार्यक्रम संचालन हुइल बटैली । परियोजनाके गतिविधिप्रति अपनेहुक्रे सन्तुष्ट रहल कहटी यिहीहे निरन्तरता डेना जरुरी रहल बटैली ।

समुहके सदस्य छाया सापकोटा परियोजनाके सिकाईसे अब्बे व्यावसाय कैना तरिका, हरहिसाव रख्ना तरिकासे लेके क्षमता अभिवृद्धि करल बटैली ।

आधार परियोजनाके व्यवस्थापक सृजना पराजुली यी परियोजना कैलारी गाउँपालिकाके नौ वडा ओ गौरीगंगा नगरपालिकामे संचालन हुइल बटैली । परियोजनासे गरिव तथा सीमन्तकृत समुदायसे उद्यमशिलता मार्फत जिविकोपार्जन ओ आयआर्जनमे सुधार हुइना, महिला तथा बालबालिका पारिवारिक पोषणमे सुधान नानके खाद्य सुरक्षामे जोर डेना, सीमान्तकृत महिला बालबालिकाके स्वास्थ्य ओ सरसफाईमे क्षमता बह्रैना, लक्षित समुदायके विद्यालयके विपद व्यवस्थापनमे सहयोग ओ वातावरणमे सुधार कैना लक्ष्य रहल उहाँ बटैली ।

परियोजनाके कार्यक्षेत्र कैलारी गाउँपालिकामे १ से ९ वडा ओ गौरीगंगा १ से ११ वडामे संचालन हुइल बा । यम्ने ६० ठो समुह, दुई सहकारी, ६ ठो विद्यालयमे काम करटी आइल रहे । परियोजनाके पकेट क्षेत्र ताजा टिना उत्पादन ४८१ सदस्य, बाख्रा पालक कृषक समुह ४५७, मुरगी पालक ३०७, गैर कृषि खेती २७६ करके जम्मा १५ सय २१ रहल बटै ।

परियोजनासे गरिब तथा सिमान्तकृत समुदायसे उद्यमसिलता मार्फत जिविकोपार्जन ओ आयआर्जनमे सुधार हुइल बा । उत्पादक समुह गठन २० ठो समुहके गठन करके ३० ठो समुह दर्ता हुइल बा । ३० ठो समुहसे स्थानीय सरकार ओ नेपाल सरकारके टमान तहसे प्रदान कैना अनुदान रु १ करोड १० लाख ७ हजार ८ सय बराबरके अनुदान प्राप्त कैना सक्षम हुइल बटै ।
समुह व्यवस्थापन तथा दिगो संचलनके लाग निरन्तर रुपमे पैरवी, वकालत करके राज्यके टमान स्रोत साधनमे पहुँच अभिवृद्धि हुइल बा । साथे नेतृत्व विकासके कारणसे निर्णय प्रक्रियामे सहभागिता वृद्धि हुइल बा ।

सहकारी व्यवस्थापनमे सहयोगः २ ठो सहकारीमे सहकारीहे संरचना निर्माण कार्य (फर्निचर, सौचालय, झयाल ढोका निर्माण ओ व्यवस्थापन सम्बन्धी सामाग्रीके सहयोग करल बा । १ ठो समुहमे महिला मैत्री मेसिनसे दुना टपरी उत्पादन करके आयआर्जनमे टेवा पुगाइक लाग प्रयास करल बा ।

दुना टपरी उद्योग संचालनमे नानल पश्चात प्लाष्टिकके दुना टपरी, प्लेटके प्रयोगमे कमी आइल बा । दुना टपरी उद्योग संचालनसे १३ जाने प्रत्येक्ष ओ ४३ जाने अप्रत्यक्ष रुपमे रोजगारीके सृजना हुइल बा ।

बाखाके खोर सुधार तथा नश्ल सुधार सहयोग कार्यक्रम ः २० जाने बाखापालक कृषकसे मापदण्ड अनुसारके खोर व्यवस्थापन करके व्यवसाय संचालन करटी रहल बटै । २२ जाने बाखापालक कृपक श्ल सुधारके लाग उन्नत जातके छेगरा प्रयोजन करके बंश सुधारके सहयोग पुगाइल बा । बाख्रा पालनके क्षेत्र विस्तार करके विविध निकायसे अनुदान प्राप्त करले बटै । ार्थिक आयआर्जनके प्रमुख स्रोतके रुपमे बाखा पालन व्यवसाय रहल ओरसे उ व्यवसाय विस्तार हुइल बा ।

दलित महिला अधिकार मञ्च कैलालीके अध्यक्ष सावित्रा घिमिरेके अध्यक्षतामे हुइल कार्यक्रममे उहाँ आधार परियोजना संचालन करेक लाग कैलारी गाउँपालिकासे मजा सहयोग मिलल बटैली । उहाँ यी परियोजनाके मजा कामहे आबसे पालिकासे अगुवाई कैनामे जोर डेली ।

आधार परियोजना ओरैलेसेफे दलित महिला अधिकार मञ्चसे संचालन करटी रहल पहुँच परियोजना निरन्तर रहल ओ आब थप ठो परियोजना लागु कैना बटैली । कार्यक्रमके संचालन संजय चौधरी करल रहिट । कार्यक्रममे गाउँपालिकाके टमान वडाके वडा अध्यक्ष, टमान शाखाके प्रमुख, दलित महिला अधिकार मञ्चके प्रतिनिधिहुक्रे, टमान समुहके सदस्यहुकनके सहभागिता रहल रहे ।