स्थानीय विपद व्यवस्थापन समिति ओ टास्कफोर्ससंग समन्वय बैठक
पहुरा समाचारदाता
हसुलिया, २७ बैशाख । बहुउद्देश्यीय विकास समाज डडेल्धुराके आयोजनामे स्थानीय विपद व्यवस्थापन समिति ओ टास्क फोर्ससंग समन्वय बैठक कैलारी गाउँपालिकाके हसुलियामे सम्पन्न हुइल बा ।
कैलारी गाउँपालिकाके समन्वय, केर्क इन एक्ट कार्डएडके सहयोगमे वहुउद्देश्यीय विकास समाज (एमपिडिएस) डडेलधुरासे संचालित बाढ पहिरोके उच्च जोखिमके पूर्व तयारी तथा प्रतिकार्य परियोजना अन्तर्गत परियोजनासे पालिकास्तरमे संचालन हुइल गतिविधि ओ उपलब्धीके प्रस्तुती ओ समीक्षा तथा अइना योजनाके बारेमे सरोकारवाला निकाय विच छलफल एवं जानकारी करैना उद्देश्यसे समन्वय वैठक आयोजना करल हो ।
बैठकमे कैलारी गाउँपालिकाके उपाध्यक्ष भगवती कुमारी चौधरी विपद जोखिम न्यूनीकरणके क्षेत्रमे ओ समुदायस्तरमे सचेतना अभिवृद्घि कैना कार्यमे एमपिडिएस महत्वपूर्ण भूमिका निर्वाह करल बटैली । उहाँ यी परियोजनासे पालिका अन्य काममेफे सहकार्य कैना बटैली ।
कैलारी गाउँपालिकाके प्रमुख प्रशासकीय अधिकृत लक्ष्मीदत्त भट्ट विपद संवेदनसिल विषय रहल ओरसे यकर व्यवस्थापनमे सक्कुहुनके सहयोग ओ सहकार्य आवश्यक रहल बटैलै ।
कैलारी गाउँपालिका वडा नम्बर ३ के अध्यक्ष सन्तराम चौधरी टास्क फोर्सके क्षमता अभिवृद्घि, सकृयता ओ परिचालनमे अपनेहुकनकेफे सहयोग कैना बटैलै ।
वडा नं ५ के अध्यक्ष विष्णु चौधरी संस्थासे पालिकास्तरमे करल काम बहुट मजा रहल बटैटी थप सचेतना अभिवृद्धिके कार्यक्रम संचालन करेपर्नामे जोड डेलै ।
वडा नं ६ के अध्यक्ष प्रेमबहादुर चौधरी विपदके बाढ डुबानके साथ साथे आगलागी नियन्त्रण सम्बन्धीफे सचेतनामूलक अभिमुखीकरण करे पर्ना बटैलै ।
ओस्टेक बैठकमे सुर्मिनाला टास्क फोर्सके अध्यक्ष जगलाल चौधरी स्थानीयस्तरमे विपद जोखिम न्युनिकरण ओ जनचेतना जगैना कार्यमे टास्कफोर्स लग्टी रहल बटैटी स्थानीय सरकारसेफे विपदके लाग वडास्तरमे बजेट ओ कार्यक्रम छुट्यई पर्ना बटैलै ।
कैलारी गाउँपालिका वडा नं ४ के अध्यक्ष एवं विपद व्यवस्थापन समिति संयोजक ठागुराम चौधरीके अध्यक्षतामे सम्पन्न हुइल बैठकमे सहभागी जनप्रतिनिधिहुक्रे भल्मन्सा ओ टास्कफोर्सके प्रतिनिधि विपदके क्षेत्रमे थप गतिविधिसहित कार्यक्रम संचालन करे पर्नामे जोड डेहल रहिट ।
