व्यावसायिक टिना खेतीके अनुगमन

पहुरा समाचारदाता
हसुलिया, ३१ बैशाख । कैलारी गाउँपालिका–८ पूर्व टेढीके पहुरा कृषक समुहके सदस्यहुकनसे व्यावसायिक रुपमे कैगिल टिना खेतीके अनुगमन कैगिल बा ।

कैलारी गाउँपालिकास्थित सहास नेपालसे कार्यान्वयन करल स्थानीय प्रयासमे खाद्य सुरक्षा रुपान्तरण (लिफट) परियोजना अन्र्तगत समुहके सदस्यहुकनसे व्यक्तिगत रुपमे कैगिल टिना खेतीके सोम्मारके रोज कैलारी गाउँपालिकास्तरीय अनुगमन टोलीसे स्थलगत रुपमे अनुगमन करल हो ।

अनुगमनसंग्गे कृषक समुहसे कैगिल अन्तरक्रिया कार्यक्रममे गाउँपालिका अध्यक्ष राजसमझ चौधरी सहास नेपालके सपोर्टमे मजा टिना खेती हुइल बटैलै । उहाँ कहलै, ‘परियोजना निश्चित समयके लाग रहठ । यिहीहे सिखल ज्ञान सीपके सदुपयोग करलेसे पाछेसम यी व्यवसाय करे सेक्जाइठ ।’ परियोजना सेक्लेसे स्थानीय सरकारसे यिहीहे निरन्तरता डेना कहटी कृषक समुहहे पालिकासे समन्वय कैना उहाँ आग्रह करलै ।

गाउँपालिका उपाध्यक्ष भगवतीकुमारी चौधरी व्यावसायिक टिना खेतीसे महिलाहुकनके आर्थिक सशक्तीकरणमे टेवा पुगल बटैली । उहाँ कहली, ‘महिलाहुक्रे मजासे व्यावसायिक रुपमे टिना खेती करलपाछे ओकर आम्दानीसे घरपरिवारमे अइना छोट–छोट समस्या उहीसे समाधान करे सेक्ना हुइल बा ।’ व्यवसाय संग्गे व्यक्तित्व विकास हुइलमे उहाँ खुशी व्यक्त करली ।

गाउँपालिकास्तरीय अनुगमन टोलीसे स्थलगत अनुगमनमे करेबेर भेटघाटके क्रममे कैलारी गाउँपालिका–८ पूर्व टेढीके पहुरा कृषक समुहके अध्यक्ष रुपा चौधरी÷देवकी चौधरी प्रगती विवरण प्रस्तुत करटी टिना खेती करलपाछे आय आर्जनमे टेवा पुगल बटैलै । समुहमे २६ सदस्यीय रहल मने ११ जाने टिना खेती करटी रहल बटै । टिना उत्पादनसे घरखर्च चलैना सहजुल हुइल बा । अपन चाहल टिना बजारसे किने नइपरल जनैलै ।

समुहके सदस्य शोभा चौधरी अपनेहुक्रे पहिल चरणमे कैगिल टिना उत्पादन बजार नइपाके खेर गैल बटैठी । टिना खेती सुरु करलपाछे सिकाई हुइल बा, ‘उहाँ कहली, ‘अब्बे यिहीहे विस्तार करटी व्यावसायिक रुपमे आघे बह्रना योजना बा । सहास नेपाल ओ स्थानीय सरकार बजारीकरणमे सहयोग करलेसे कृषक समुहके हौसला प्रदान हुइना रहे ।’ समुहके कोषाध्यक्ष सैजुराम चौधरी पहिले परिवर्तन हुइल नइरहे । समुह गठन संगे टिना खेतीके सुरुवाट ओ समुह बचत, समुहमे हुइना छलफलसे समाज परिवर्तनमे टेवा पुगल बटैलै ।

उहाँ कहलै, टिना खेतीसंगे समाजमे रहल विकृति विसंगति हटैना, सरसफाई, लागु औषध नियन्त्रण कैना, बाल विवाह न्यूनिकरणके लाग समुहमे छलफल हुइटी आइल बा ।’

कैलारी गाउँपालिका–८ के वडा अध्यक्ष तारामल कठरिया सहास नेपालसे संचालन करल गतिविधि नमूना रहल बटैलै । उहाँ कहलै, ‘यी संस्थासे समुह गठन करके टिना खेतीसे लेके क्षमता अभिवृद्धिमे समेट सहयोग पुगैले बा । वडा नम्बर ८ मे टिना खेती संचालन हुइलपाछे महिलाके आर्थिक सशक्तीकरणमे सहयोग पुगल बा ।’ उहाँ वडा कार्यालयसे हुइना सहयोग सदैव रनाफे प्रतिवद्धता जनैलै ।

कैलारी गाउँपालिकास्थित सहास नेपालसे कार्यान्वयन करल स्थानीय प्रयासमे खाद्य सुरक्षा रुपान्तरण (लिफट) परियोजना कैलारीके पाँच ठो वडामे संचालन हुइल परियोजना अधिकृत नरेश चौधरी बटैलै । उहाँ परियोजना मार्फत कृषि पोषणसंगे सामाजिक कुरुति हटैना काम करटी रहल बटैलै ।

अनुगमन टोलीसे पहुरा कृषक समुहके सदस्यहुकनसे कैगिल तनेलमे लहरे टिना, सोलार पम्पके व्यवस्था कैसिन सिचाई आयोजना, खेर जैना पानीके भण्डारण, बंगुर पालनके खोरके अनुगमन कैगिल बा । अनुगमनमे सामाजिक विकास शाखा प्रमुख यगम कलेल, स्वास्थ्य शाखा प्रमुख नरेशकुमार चौधरी, योजना शाखा प्रमुख सन्तोष कुमार चौधरी, पशु शाखा प्रमुख सुर्यप्रसाद चौधरी, कृषि शाखा प्रमुख मैया चौधरी, महिला तथा बालबालिका शाखा प्रमुख बालकुमारी चौधरी, कार्यपालिका सदस्य सुनिला चौधरी, लालबहादुर विक, वडा–८ वडा सदस्य लक्ष्मी चौधरी, सहास नेपालके कृषि प्राविधिक नरबहादुर जिरेल, स्वास्थ्य प्राविधिक माया चौधरी, वित्त तथा लेखा सहायक सुनिता चौधरी, वन प्राविधिक विप्लव चौधरीलगायत टमान कृषक समुहके प्रतिनिधिहुकनके सहभागिता रहे ।