कैलारीमे जेठ ९ ओ १० गते बाल भेला हुइना

पहुरा समाचारदाता
हसुलिया, ३ जेठ । कैलाली जिल्लाके कैलारी गाउँपालिकामे यिहे अइना जेठ ९ ओ १० गते बाल भेलाके आयोजना हुइना बा ।

कैलारी गाउँपालिका अन्र्तगतके बालबालिकाहुकनके क्षमता विकास संरक्षण ओ सम्बद्र्धन कार्यहे तदारुकताके साथे उठान करेक लाग योजना निर्माण कैना उद्देश्यसे बाल भेला कैना निर्णय हुइल बा । यूनिसेफके आर्थिक सहयोगमे सामुदायिक विकास केन्द्र (सिडिसी, डोटी)के आयोजना तथा कैलारी गाउँपालिकाके समन्वयमे विफेक रोज स्थानीय वाल अधिकार समितिके संयोजक एवं गाउँपालिका उपाध्यक्ष भगवतीकुमारी चौधरीके अध्यक्षतामे बैठल बैठकसे उ निर्णय कैगिल हो ।

समितिके बैठकसे बाल भेला, स्थानीय बाल कोष स्थापना, प्रदेश स्तरीय बाल संजाल सहभागिता सम्बन्धमे, बाल संरक्षण तथा सम्बद्र्धन नीति सम्बन्धमे, स्थानीय समाजसेवी बालमनोविज्ञ सम्बन्धमे, स्थानीय बालअधिकार समिति गठन सम्बन्ध छलफल कैगिल रहे ।

उ बैठकमे बाल भेला जेठ ९ ओ १० गते कैना, स्थानीय बाल कोष स्थापना करेक लाग कार्यविधि निर्माण कैना, प्रदेश स्तरीय बाल संजाल सहभागिता सम्बन्धमे विचैपुर राष्ट्रिय माविके ममता जैसीहे सिफारिस कैगिल बा ।

कैलारी गाउँपालिकाके बाल संरक्षण नीति २०७६ हे अध्यवधिक कैना, स्थानीय समाजसेवी बालमनोविज्ञ सम्बन्धमे सूचना जारी कैना ओ स्थानीय बालअधिकार समिति गठन सम्बन्धमे सक्कु वडामे वडा अध्यक्ष वा हुकान तोकल व्यक्ति,१ जाने, वडा सदस्य ४ जाने, वडा सचिव १ जाने, स्वास्थ्य शाखा(हेपो सदस्य) १ जाने, बाल अधिकारके क्षेत्रमे क्रियाशिल सदस्य १ जाने, १ बालिकासहित दुई जाने सदस्य उ समितिहे रहना जनागिल बा ।

बैठकमे स्थानीय वाल अधिकार समितिके सदस्य प्रमुख प्रशासकीय अधिकृत लक्ष्मी दत्त भट्ट, सदस्य प्रहरी प्रमुख लोकेन्द्र बहादुर चन्द, सदस्य स्वास्थ्य शाखा प्रमुख नरेशकुमार चौधरी, सदस्य सामाजिक विकास शाखा प्रमुख यगम कलेल, सदस्य पत्रकार प्रेम चौधरी, सदस्य महिला तथा बालबालिका शाखा प्रमुख बालकुमारी चौधरी, सदस्य प्रा.स शिक्षा शाखा रेखा पन्त रहल रहिट ।

ओस्टेक अमन्त्रितमे कैलारी गाउँपालिका अध्यक्ष राजसमझ चौधरी, वडा नम्बर ३ के वडा अध्यक्ष सन्तराम चौधरी, गाउँपालिका प्रवक्ता तथा वडा नम्बर ७ के वडा अध्यक्ष दिपेन्द्रबहादुर बम, सिडिसि प्रतिनिधि तिलक चौधरी, करुणा चौधरी, सकुन्तला चौधरी, बाल कल्याण संघ टिकापुरके परशु राम चौधरी, किसन कसारालगायतके सहभागिता रहे ।