धनगढीहे प्रकृति संरक्षण पुरस्कार
पहुरा समाचारदाता
धनगढी, ७ जेठ । धनगढी उपमहानगरपालिका डब्लुडब्लुएफ संरक्षण पुरस्कार प्राप्त करले बा । वातावरण संरक्षणमे योगदान पुगाइल कदर कैटी विश्व वन्यजन्तु कोष नेपाल (डब्लुडब्लुएफ)से पालिकाहे संरक्षण पुरस्कार डेहल हो ।
हरियाली प्रवर्द्धन ओ सरसफाइ अभियानमे जुटल धनगढी उपमहानगरपालिका एक लाख रुपियाँ पुरस्कार प्राप्त करले बा । वन तथा वातावरण मन्त्री नवलकिसोर साह सुठी काठमाडौँमे नगर प्रमुख गोपाल हमालहे पुरस्कार हस्तान्तरण करल हुइट ।
डब्लूडब्लूएफ नेपाल आपन ३१ औँ स्थापना दिवसके अवसरमे पुरस्कृत करल हो । धनगढी वातावरण संरक्षणअन्तर्गत प्लास्टिक बिक्री वितरणमे रोक, वृक्षारोपण, पानी पुनरभरण, सर्प तथा जीवजन्तुके सकुशल उद्धार कैके सम्बन्धितके वास स्थानमे छोर्ना लगायतके क्षेत्रमे काम कैटी आइल बा ।
इहे बिच धनगढी ग्लोबल अलायन्स फर इन्सिनिरेसन अल्टरनेटिभ्ससे सदस्यता प्राप्त करले बा । फोहोरमैलाके उचित व्यवस्थापन करल कहटी धनगढीहे “जेरो वेस्ट सिटिज नेटवर्क” संस्थापक सदस्यता मिलल हो ।
उपमहानगरपालिकासे फोहोरमैला व्यवस्थापनसम्बन्धी कैटी रहल प्रयास एवं स्वच्छतासम्बन्धी पहलहे कदर कैटी जेरो वेस्ट सिटिज नेटवर्कके फाउन्डेसन मेम्बरके सदस्यता मिलल धनगढी उपमहानगरपालिका जनैले बा ।
जेरो वेस्ट सिटिज नेटवर्कमे हालसम विश्वके ५५० सहर आबद्ध रहल बावै । नेपालके धनगढीसहित काठमाडौंके गोकर्णेश्वर नगरपालिका ओ सिन्धुलीको दुधौली नगरपालिका फेन यम्ने आबद्ध रहल बा ।
