कृृत्रिम घटना अभ्यास प्रदेशस्तरीय प्रारम्भिक छलफल कार्यक्रम
पहुरा समाचारदाता
धनगढी, ७ जेठ । यी बरसके मनसुन भिटरना समय लग्गे अइटी रहल ओरसे सुदुरपश्चिम प्रदेशमे विपद पुर्व ओ विपद्पाछेक अवस्थाके लाग तयारी सुरु हुइल बा ।
सोम्मार धनगढीमे प्रदेशके आन्तरिक मामिला तथा कानुन मन्त्रालयके आयोजनामे सुपर परियोजना अन्तरगत युरोपीयन युनियनके आर्थिक सहयोग ओ युएनडिपी, युनिसेफ, युएन ओमन रुडुकके सहकार्यमे सरोकारवाला निकायविच अन्तर प्रदेश कृृत्रिम घटना अभ्यास प्रदेशस्तरीय अभ्यास प्रारम्भिक छलफल कार्यक्रम कैगिल हो । यिहे जेठ १७, १८ ओ १९ गते नेपालगञ्जमे हुइना प्रदेश स्तरीय विपद जोखिम न्यूनीकरण सम्बन्धी पुर्व तयारी सम्बन्धी धनगढीमे छलफल करल बा ।
सुदुरपश्चिम प्रदेश, कर्णाली ओ लुम्बिनी प्रदेशसे करिब २०० जाने टमान सरोकारबालाके सहभागितामे तीन दिन सम ११ ठो विषयबस्तुमे छलफल हुइना बा ।
छलफल कार्यक्रममे प्रदेशस्तरमे विपद सम्बन्धी बनल प्रतिकार्य योजना, नीति नियम कानून तथा कार्यान्वयनके अवस्था ओ समेटे पर्ना विषयके बारेमे छलफल कैना युएनडिपी सुदुरपश्चिम संयोजक प्रगति भट्टराई जानकारी डेली ।
ओस्टेक विपद सम्बन्धी बनाइल नीति नियम कानून ओ योजनाहे कार्यान्वयनके चरणमे लैजाके थप सहजता कैसिक बनाई सेक्जाई कना बारेमे छलफल हुइना उहाँ जनैली ।
हालसम विपद व्यवस्थापनमे डेखल चुनौतीहेफे समाधानके उपायके खोजी करके थप समन्वयकारी भूमिकामार्फत व्यवस्थापन कैना युएनडिपी सुदुरपश्चिम संयोजक भट्टराई बटैली । उहाँक अनुसार विपद सम्बन्धी टमान निकाय तथा सरोकारबालासे सल्लाह, सुझाव लेनाके साथे आकस्मिक योजना परिक्षण ओ निर्माण कैजैना बा ।
कार्यक्रममे परामर्शदाता सृजन मल्ल ओ नरेश सुब्बा प्रशिक्षण करैटी टेवलटप तिनु प्रदेशमे यस्टे कार्यक्रम हुइटी रहल जानकारी डेले रहिट । तीनदिनसम विशेषज्ञ, टमान मन्त्रालय, स्वास्थ्य विज्ञ, फोकल पर्सन तथा टिटिएक्स टोलीसे विपद् जोखिम न्युनिकरण सम्बन्धी ब्रिफिङ, छलफल, अभिमुखिकरण सञ्चालन हुइना बटैलै । विपद् सम्बन्धी न्युनिकरण अभ्यासके अपेक्षित नतिजा, हालके प्रदेश ओ नगरपालिका विपद् जोखिम न्यूनीकरण ओ व्यवस्थापनके योजना ओ संस्था, मोडालिटीके दिशानिर्देशबारेमे, आकस्मिक योजना निर्माणके बारेमे छलफल फे कैना बटैलै ।
प्रदेशमे भुकम्प, आगलागी, बाढपहिरो चट्याङ लगायतके बहुट जोखिम बा । सुपुर परियोजनासे सुदुरपश्चिमके टमान जिल्लाके स्थानीय तह कैलालीके धनगढी उपमहानगर, डडेल्धुराके अमरगढी तथा बझाङके जयपृथ्वी नगरपालिकामे विपद् जोखिम न्युनिकरणके लाग टमान कार्यक्रम करटी आइल बा ।
आन्तरिम मामिला तथा कानून मन्त्रालयके सचिव सुशिल वैधके अध्यक्षतामे हुइल कार्यक्रममे सरोकार निकाय संस्थाके वरिष्ठ अधिकृत, सुरक्षा बल, नेपाली सेना, डिभिजन, सशस्त्र प्रहरी बल नेपाल, प्रादेशिक मुख्यालय, नेपाल प्रहरीको प्रादेशिक, स्वास्थ्य निर्देशक, विमानस्थल प्राधिकरण, एफएनसिसिआईके प्रदेश सदस्य, मिडिया, अपाङता ओ सीमान्तकृत समुदाय, विद्युत प्राधिकरण दूरसंचार अधिकारी लगायत सरोकारबालाके सहभागीता रहल रहे ।
