धनगढीमे हरियाली प्रवर्द्धन कार्यक्रम सुरु
पहुरा समाचारदाता
धनगढी, ८ जेठ । धनगढी उपमहानगरपालिकासे टेसर चरणके हरियाली प्रवर्द्धन कार्यक्रम सुरु करले बा ।
धनगढी नगर क्षेत्रहे स्वच्छ बनैना उद्देश्यके साथ उपमहानगरपालिकासे टेसर चरणके हरियाली प्रवर्द्धनके कार्यक्रम आघे बह्राइल हो । इ अभियानअन्तर्गत टमान प्रजातिके साढे पाँच हजार बिरुवा लगैना लक्ष्य रहल निमित्त प्रमुख प्रशासकीय अधिकृत नरेन्द्रबहादुर खाती बटैलै ।
उहीसे आघे, धनगढी उपमहानगरपालिकासे दुई चरणके हरियाली प्रवर्द्धन कार्यक्रममार्फत नगरके छ लेन सडक, हुलाकी राजमार्गके मेडियनमे वृक्षारोपण करसेकल बा । इहे अभियानके कारण भर्खरे धनगढी उपमहानगरपालिकासे प्रकृति संरक्षण पुरस्कारसमेत प्राप्त करले बा ।
धनगढी उपमहानगरपालिका–१ स्थित हुलाकी सडकके खण्ड ‘घ’ मे वडा अध्यक्ष सन्तोष मुडभरि वृक्षारोपण कैके टेसर चरणके हरियाली प्रवर्द्धन कार्यक्रमके उद्घाटन करल रहिट ।
तेस्रो चरणअन्तर्गत हुलाकी सडकके डुनु ओर वडा नम्बर २ से १४ के फूलबारीसम, विमानस्थल सडक, चक्रपथमे बिरुवा लगाजैना जनाइल बा । लगाइल बिरुवा संरक्षणके लाग ट्रि–गार्ड रख्नाके साथे मलजल, गोडमेल कैना लगायतके कार्य हुइना जनाइल बा । उहीसे आघे सञ्चालित दुई चरणके अभियानसे पाँच हजार ढेर बिरुवा लगाइल रहे ।
