कृषिमे कुछ लावा काम करमः मन्त्री थापा
पहुरा समाचारदाता
धनगढी, ९ जेठ । सुदूरपश्चिम प्रदेशके भूमि व्यवस्था कृषि तथा सहकारी मन्त्री टीका थापा कृषि क्षेत्रमे कुछ लावा काम कैके डेखैना बटैले बटि ।
बुधके रोज हेफर प्रोजेक्ट नेपालके आयोजनामे धनगढीमे हुइल विकास साझेदार बिच प्रगति समीक्षा एवं समन्वयात्मक गोष्ठीहे सम्बोधन कैटि मन्त्री थापा कृषि क्षेत्रओर कुछ लावा काम कैके डेखैना इच्छा रहल बटाइल हुइटि ।
‘प्रदेशमे कृषि क्षेत्रके लागढेर सम्भावना रहल बा, हम्रहीन आभिन फेन कृषिके लाग ढेर काम कैना बाँकी रहल बा’, उहाँ कहली, ‘कृषकहुक्रनके क्षमता अभिवृद्धि बह्राके हुइठ कि यहाँके उत्पादन हुइल बस्तुके बजारीकरण कैके हुइठ् । लावा आर्थिक बरससे कृषि मन्त्रालयसे लावा तरिकासे काम कैना इच्छा रहल बा ।’
मन्त्री थापा कृषकहुक्रनसे आपनठन ढेर गुनासा फेन आइल बटैले बटि । उहाँ वास्तविक किसान सरकारी तथा गैरसरकारी क्षेत्रसे पाजैना सेवा सुविधासे वञ्चित हुइल कहटी ढेर गुनासा आइल बटैलि । कलेसे उहाँ अब्की सरकारसे वास्तविक किसान पहिचान कैके उ सेवासुविधा डेना फेन बटाइल रही ।
उहे बिच मन्त्री थापाहे पर प्रोजेक्ट नेपाल छोट समयमे कृषि क्षेत्रओर ढेर काम करल बटैटि उहाँ अइना दिनमे फेन समन्वय, सहकार्य कैके आघे बह्रना बटाइल रही । ओस्टके उहाँ प्रदेशके अन्य स्थानीय तहमे फेन प्रोजेक्ट लागु कैना आग्रह करल रही ।
प्रदेश सभा सदस्यदमन भण्डारी संस्थासे कृषि सँगे जनचेतना अभिवृद्धिके कार्यक्रम फेन सञ्चालन करे पर्ना जोड डेहल रहिट । ‘कृषकहे साधन स्रोतडेके किल नैहुइ’, ‘समाज रुपान्तरणके लाग ओइनके जनचेतना अभिवृद्धि फेन कैना कैना आवश्यक रहल बा ।’
पुर्नवास नगरपालिकाके नगरप्रमुख तोयप्रसाद शर्मा पोजेक्टसे सञ्चालित कार्यक्रमहे सफल बनाइक लाग सक्कु जाने लागे पर्ना बटाइल रहिट । उहाँ कार्यक्रमहे सफल पारक लाग संस्था अकेली नैसेक्ना बटैटी उहाँ प्रदेश सरकार, स्थानीय तह मिलके काम करे पर्ना जोड डेहल रहिट ।
कार्यक्रममे हेफर प्रोजेक्ट नेपालके कार्यक्रम निर्देशक प्रकाश केसी परियोजना तथा परियोजनाके प्रगतिबारे जानकारी कराइल रहिट । उहाँ प्रदेश सरकार ओ कञ्चनपुरके पुर्नवास नगरपालिका ओ बझाङके जयपृथ्वी नगरपालिका, छविसपाथिभेरा, खप्तड छान्ना, मष्टा गाउँपालिका ओ हेफरके सझोदारीमे कृषि ओ पशुवस्तुमे आधारित साना किसान तथा युवा उद्यमशिलता विकास कार्यक्रम सञ्चालन रहल बटाइल रहिट ।
गरिव, विपन्न परिवारहे स्वावलम्वी समूहमे आवद्ध कैके सामाजिक पुँजी अभिवृद्धि कैना लक्ष्य तथा उद्देश्य रहल परियोजना मार्फत ६० ठो स्वावलम्वी समूह गठन हुइलओ १५९२ परिवारहे समूहमे आवद्ध करल जनाइल बा ।
ओस्टके ४९ ठो मूल समूहके १२२५ जाने सदस्यहे हेफर आधारशिला तालिम, समूह व्यवस्थापन तालिमके साथे प्राविधिक सेवा,केभ परिचालन करल जनाइल बा ।
कार्यक्रम हेफर प्रोजेक्ट नेपालके उपाध्यक्ष डा. पदमबहादुर सिंहके अध्यक्षतामे हुइल रहे कलेसेहेफर इन्टर नेशनल नेपालके राष्ट्रिय निर्देशक डा. तीर्थराज रेग्मी स्वागत मन्तव्य राखल रहिट ।
कार्यक्रममे मष्टा गाउँपालिकाके अध्यक्ष ज्ञानबहादुर बोहरा, पशुपंछी तथा मत्स्य विकास निर्देशनालय डोटीके निर्देशक डा. पानसिंह ठगुन्ना, कृषि विकास निर्देशनालय डोटीके प्रमुख यज्ञराज जोशी, नेपाल वातावरण तथा सम किवास समाज कञ्चनपुरके कार्यकारी निर्देशक भवराज रेग्मी परियोजनाबारे धारणा राखल रहिट ।
