मकै बाली प्रवद्र्धन कार्यक्रमके सार्वजनिक सुनुवाई तथा कृषि सामाग्री हस्तान्तरण
पहुरा समाचारदाता
हसुलिया, ९ जेठ । कैलालीके कैलारी गाउँपालिका वडा नम्बर ७ बसन्तामे रहल इद्रेणी बहुउद्देश्यीय सहकारीसे संचालन करल मकै बाली प्रवद्र्धन कार्यक्रमके सार्वजनिक सुनुवाई तथा सामाग्री हस्तान्तरण कैगिल बा ।
कैलारी गाउँपालिकाके उपाध्यक्ष भगवतीकुमारी चौधरीके वरका पहुनामे हुइल कार्यक्रममे उहाँ वेमौसमी अन्नवाली ओ टिना खेतीमे मजा आम्दानी हुइल ओरसे कृषकहुकनहे ओहोर ओर लागे पर्ना बटैली ।
कृषि सामाग्री हस्तान्तरण करटी उहाँ अनुदान सदाके नइअइना ओरसे कृषकहुकनहे आत्म निर्भर हुइना जरुरी रहल बटैली । गाउँपालिका कृषि तथा शिक्षा क्षेत्रमे ढेर महत्व डेहल ओरसेफे उहाँ बटैली ।
गाउँपालिका उपाध्यक्ष कहली,‘कृषकके समस्या बुझटी मालपोट करमे पचास प्रतिशत छुट, सहजुले मलखाद पैना व्यवस्था मिलाइल बा । शैक्षिक क्षेत्र सुधारके लाग जिर्ण भवनके मर्मत ओ आवश्यकताके आधारमे विद्यालय भवनके व्यवस्था मिला जैटी बा ।
वेमौसमी टिना खेतीमे कृषकसे मजा मोल पैना ओरसे ओहोर ध्यान डेहे पर्ना गाउँपालिका उपाध्यक्ष बटैली । ओस्टेक उहाँ गाउँपालिकाके पचास प्रतिशत अनुदानमे मिलल कृषि सामाग्रीके सही सदुयोग कैना आग्रह करली । कैलारी गाउँपालिका कृषि शाखाके १ लाख ६२ हजार ५ सय ओ इद्रेणी बहुउद्देश्यीय सहकारीसे १ लाख ६२ हजार ५ सयके लगानीमे कृषि सामाग्री अन्र्तगत पानीमोटर, झिल्ली पाइप, पानीमोटरमे लगैना व्याण्ड कृषकहुकनहे हस्तान्तरण कैगिल बा ।
इद्रेणी बहुउद्देश्यीय सहकारीके अध्यक्ष हरि प्रसाद चौधरीके अध्यक्षतामे हुइल कार्यक्रममे कैलारी गाउँपालिका कृषि शाखा प्रमुख मैया कु्मारी चौधरी, बसन्ती चौधरी, गाउँपालिकाके रामकृष्ण चौधरीलगायत सहकारीके पदाधिकारी ओ कृषकहुकनके सहभागिता रहल रहे । कार्यक्रम इद्रेणी बहुउद्देश्यीय सहकारी लिमिटेड कैलारी–७ बसन्ताके आयोजनामे हुइल रहे ।
