बालबालिकाफे समाज रुपान्तरण करे सेक्ठैः गाउँपालिका उपाध्यक्ष

पहुरा समाचारदाता
हसुलिया, १० जेठ । बालबालिका अग्रसर हुइलेसे समाज रुपान्तरण करे सेक्ना कैलारी गाउँपालिकाके उपाध्यक्ष भगवतीकुमारी चौधरी बटैले बटी ।

बालबालिकाहुकनके प्रतिभा उजागर करेक लाग कैलारी गाउँपालिकामे हुइल दुई दिने बाल भेला समापन कार्यक्रमके वरका पहुना रहल उहाँ उ बटाइल रहिट ।

बालविवाह करलेसे, लागु औषध दुव्र्यशनीमे फस्गैलेसे बालबालिकाहुकनके पह्राई लिखाई अधुरा रहिजाइठ,’ गाउँपालिका उपाध्यक्ष कहली, ‘बालविवाह न्यूनिकरण कैना, लागु औषध दुव्र्यशनी न्यूनिकरण कैना बाल क्लव सक्रिय हुई पर्ना जरुरी बा । यदि बाल क्लव उ चिज न्यूनिकरणके लाग लागी कलेसे उ सम्भव बा ।’

गाउँघरमे लउण्डीहुक्रे छोटिमसे भागके चलजैना करठै । पह्रना उमेरके लउण्डाहुक्रे लागु औषध दुव्र्यशनीमे फसल कारण जिन्गी बरबद हुइल डेखजाइठ गाउँपालिका उपाध्यक्ष कहली ।

जेकर संलग्नता बा, ओइने सचेत हुइलेसे उहीहे न्यूनिकरण कैना कौनो भारी बाट नइरहल उहाँ कहली । बाल क्लवके सदस्यहुक्रे अपन गाउँठाउँमे लग्गेक और जनहनफे जानल बाट सिखाई पर्ना ओ जे गलत डगरमे जाइटा उहीहे सुधार करेक लाग सक्कु जाने लग्लेसे सम्भव रहलफे गाउँपालिका उपाध्यक्ष बटैली ।

उहाँ कहली, ‘हरेक बालबालिकाभिटर मेरमेराइक प्रतिभा रहठ । कोई सहजुले डेखाइ सेकठ । कोई नइडेखाइसेकठ मने प्लेट फर्म तयार हुइलेसे उ बाहेर आई सेकठ । गाउँपालिका नुकल प्रतिभाहे बाहेर नानेक लाग सदैव लागी ।’

दुई दिने बाल भेला कैलारी गाउँपालिका अन्र्तगतके बालबालिकाहुकनके क्षमता विकास संरक्षण ओ सम्बद्र्धन कार्यहे तदारुकताके साथे उठान करेक लाग योजना निर्माण कैना उद्देश्यसे कैगिल रहे ।

कैलारी गाउँपालिका महिला तथा वालबालिका शाखाके आयोजना तथा सामुदायिक विकास केन्द्र (सिडिसी, डोटी), बाल कल्याण संघ टीकापुरके समन्वयमे बाल भेला हुइल रहे । बाल भेलामे बालबालिकाहुक्रे टमान मेरिक प्रतिभा नुकल मने प्रस्तुतीकरण मौका पाइल रहिट ।

समापन कार्यक्रममे महिला तथा वालबालिका शाखा प्रमुख बालकुमारी चौधरी बालभेलाके प्रगतीबारे जानकारी करैले रही ।
बाल भेला कैलारी गाउँपालिका एकसे नौ वडाके ६० जाने बालबालिकाहुक्रन सहभागिता रहे । कलेसे कार्यक्रम इको क्लवके अध्यक्ष अर्जुन चौधरीके अध्यक्षतामे सम्पन्न हुइल रहे ।

दुई दिने बाल भेलापाछे १० बुदे ध्यानाकर्षण पत्र बुझागिल

गाउँपालिका स्तरीय वाल भेला कार्यक्रमसे गाउँपालिका उपाध्यक्ष भगवतीकुमारी चौधरी ज्यूहे १० बुदे ध्यानाकर्षणपत्र ओ आ.व २०८१÷०८२ के लाग टमान माग कैगिल बा ।
१. पढाईसे बञ्चित रहल बालबालिका विपन्न ओ अपाङत रहल बालबालिकाहुक्रे शैक्षिक समाग्री, ड्रेस ओ छात्रावृतिके व्यवस्था करे पर्ना ।
२. अति जोखिममे रहल बालबालिकाहुकनके तथ्याङकके अनुगमन करके बालबालिकाहुकनके अवस्था बुझके कैलारी गाउँपालिकासे सहयोग करे पर्ना ।
३. समाजमे बह्रटी रहल लागु औषध दुव्र्यशनी न्यूनिकरण ओ बालविवाह सम्बन्धी जनचेतनामुलक सरोकारवालहुकनसंग अन्तरक्रिया कार्यक्रम, सडक नाटक करे पर्ना ।
४. वालबालिकाहुकनके लाग जीवन उपयोगी सीप कक्षा सन्चालन करे पर्ना ।
५. योजना छनौट प्रक्रियाममे बालबालिकाहुकनहे अर्थपूर्ण सहभागीता करे पर्ना ।
६ बालश्रममे रहल बालबालिकाहुकनहे विद्यालयमे भर्ना करके आवश्यक शैक्षिक समाग्री ड्रेस सहयोग करे पर्ना ।
७ बाल संरक्षण कोष स्थापना करके गाउँपालिकाके कुल बजेट मध्ये ५ प्रतिशत बजेट बाल संरक्षण कोष धारे पर्ना ।
८ गाउँपालिका स्तरीय बाल संजालमे रहल बाल क्लवहुकनहे बाल संरक्षण ओ नीति सम्बन्धी तालिम सन्चालन करे पर्ना ।
९ लागु पदार्थ दुव्र्यशन सम्बन्धी हरेक सामुदायिक स्कूलमे कार्यक्रम सन्चालन करे पर्ना ।
१० हरेक बडामे टोल वडा स्तरीय बाल सन्जाल गठन करके कार्यक्रम अर्थपूर्ण सहभागीता करे पर्ना माग कैगिल बा ।