हिमोफोलियाबारे डाक्टर ओ नर्सहुकन तालिम

पहुुरा समाचारदाता
धनगढी, १० जेठ । हिमोफोलियाबारे डाक्टर ओ नर्सहुकनहे विफेक रोज एक दिने तालिम डेगिल बा ।

हिमोफोलिया सोसाइटी नेपालके आयोजना तथा नोभा नोर्डिक हिमोफोलिया फाउण्डेशके सहयोगमे धनगढीमे डाक्टर ओ नर्सहुकनहे एक दिने तालिम डेहल हो । हिमोफोलिया सोसाइटी नेपालके अध्यक्ष मुकुन्दमणी घिमिरेके अध्यक्षतामे हुइल कार्यक्रममे प्रमुख अतिथि सेती प्रादेशिक अस्पताल धनगढीके मेसु डा. शेरबहादुर कमर रहल रहिट ।

कार्यक्रममे उहाँ सुदूरपश्चिममे हिमोफोलियाके टमान विमारी रहल मने हेमोफोलिया पत्ता लगैना मेसिन नइरहल कारण ढेर विमारी पत्ता लागे नइसेकल बटैलै । उहाँ कहलै, ‘लक्षणके भर विमारी पत्ता लगैना अवस्था बा । सेती प्रादेशिक अस्पतालमे हाली यी मेसिनके व्यवस्था करजाई ।’ प्रादेशिक अस्पताल धनगढीके मेसु डा. कमर यी प्रदेशमे ४२ जाने केल खुलल ओ नियमित औषधी करैटी रहल बटैलै । कलेसे राष्ट्रिय तथ्याङक अनुसार ३६० जाने अभिन पत्ता नइलागल बटैलै ।

हिमोफोलिया सोसाइटी नेपालके अध्यक्ष मुकुन्दमणी घिमिरे विश्व स्वास्थ्य संगठनके अनुसार प्रति ५ हजार पुरुष जन्ममे एक जाने हिमोफोलियायूक्त व्यक्तिके जन्म हुइटी रहल बटैलै । वंशानुगतरुपमे वा अन्य कारणसफे हिमोफोलिया डेखा परना उहाँ जनैलै । नेपालके जनसंख्याहे आधाार मन्से करिब ३ हजार हिमोफोलियायूक्त व्यक्ति नेपाल रहल अनुमान करल उहाँ बटैलै । २०७९ सालसम करिब ८१४ जाने हिमोफोलिया यूक्त व्यक्तिहुक्रे हिमोफोलिया सोसाइटी नेपालके सम्पर्कमे आइल अध्यक्ष घिमिरे बटैलै ।

कार्यक्रममे हिमोफोलिष्ट नेम्स विर अस्पतालके डा. निरजकुमार सिंह हिमोफोलियाबारे यकर प्रभाव, लग्ना कारणबारे प्रस्तुतीकरण करल रहिट ।

शरिरमे रगत जमैना आवश्यक तत्वके कमीके कारण नम्मा समयसम रक्तस्राव हुइटी रना अवस्था हिमोफिलिया हो । प्रायः पुरुष यी रोगसे पीडित रहठै कलेसे महिला यकर वाहक हुइना करठै । हिमोफिलियाके कारणसे जीउमे निलडाम विल्गैना, जोर्नी तथा माशपेशी सुवैना, बठैना हुई सेकठ । यैसिन व्यक्तिमे चोटपटक लागके रगत बहलेसे नम्मा समयसम रगत नइरोक्ना रहठ । यकर उपचारके लाग रगत जमैना प्रोटिन डेहे पर्ना रहठ ।

कार्यक्रमके संचालन हिमोफोलिया सोसाइटी नेपालके महासचिव रेशमलाल रानाभाट करले रहिट । कार्यक्रममे टमान नीजि तथा संस्थागत अस्पतालके डाक्टर, नर्स, राष्ट्रिय अपाङ महासंघ सुदूरपश्चिम प्रदेश अध्यक्ष मानबहादुर साउद, अपाङताके क्षेत्रमे कार्यरत संघसंस्थाके प्रतिनिधि ओ टमान मेरिक रहल व्यक्तिहुकनहे सहभागिता रहल रहे ।