चैतन्यसे जिल्ला स्तरीय तेक्वान्दो प्रतियोगिता सुरु
पहुरा समाचारदाता
धनगढी,१० जेठ । चैतन्य पाठशालाके आयोजनामे विफेक रोजसे कैलाली जिल्ला स्तरीय तेक्वान्दो प्रतियोगिता २०८१ सुरु हुइल बा ।
सुदूरपश्चिम प्रदेश खेलकुद परिषद्के सदस्य सचिव दिपक बहादुर सिंहके प्रमुख आतिथ्यमे हुइल उदघाटन कार्यक्रममे उहाँ विद्यार्थीहुकनहे शिक्षासंगे संस्कार सिखैना आवश्यक रहल बटैलै । उहाँ कहलै, ‘यी विद्यालय जिल्ला स्तरीय अन्तरविद्यालय तेक्वान्दो प्रतियोगिता आयोजना करले यी बहुट मजा पक्ष हो । विद्यार्थीहुकनहे खेलकुदसंगे गायन, संगीतके क्षेत्रमे बह्रैना जरुरी बा । पह्राई करलेसे केल विद्यार्थी उत्कृष्ट हुइही कना नइहो । सुदूरपश्चिमके खेलाडी राष्ट्रिय अन्तर्राष्ट्रिय नाउँ कमैना सफल हुइल बटै ।’
कार्यक्रममे विद्यालयके अध्यक्ष गणेशप्रसाद जोशी खेलकुदसे शारिरीक ओ मानसिक रुपमे फाइदा पुगाइल ओरसे यकर भारी महत्व रहल बटैलै । उहाँ कहलै, ‘खेलकुदसे मनैनहे अनुशासित बनाइठ । जे अनुशासित बा कलेसे उ अपन जीवनहे सफल बनाइ सेकठ । समाजहे अपनहे जिम्मेवार व्यक्तित्व बनाके सावित करठ ।’ चैतन्य पाठशाला शिक्षा ओ संस्कारके संगमके नारासहित आघे बह्रटी रहल ओ टमान गतिविधि संचालन करटी आघे बह्रल बटैलै ।
शनिच्चरसम चल्ना कैलाली जिल्ला स्तरीय तेक्वान्दो प्रतियोगिता चैतन्य पाठशालाके शिक्षक अभिभावक संघके अध्यक्ष ईश्वर गिरीके अध्यक्षतामे हुइल रहे । कार्यक्रममे शिक्षक अभिभावक संघके सदस्य पदमबहादुर खडका प्रतियोगिताके सफलताके सुभकामना व्यक्त रहिट । कार्यक्रममे स्वागत मन्तव्य विद्यालयके प्रिन्सिपल कटक बहादुर सिंह करल रहिट कलेसे संचालन सुवास शिक्षक सुवास गिरी करले रहिट ।
उदघाटन कार्यक्रममे तेक्वान्दो प्रशिक्षक गोविन्द विष्टहे दोसल्लासहित सम्मान कैगिल बा । उदघाटन कार्यक्रममे निर्णायकके ओरसे श्रीराम चौधरी ओ खेलाडीके ओरसे आयूशमान सिंह सपथग्रहण करल रहिट । कलेसे कार्यक्रममे प्रमुख अतिथि सुदूरपश्चिम प्रदेश खेलकुद परिषद्के सदस्य सचिव सिंहके खेल निर्णायकहे खेल सामाग्री हस्तान्तरण करल रहिट ।
