दलित समुदाय शक्तिके रुपमे आघे बह्रना जरुरी बाः अभियान संयोजक विसि
पहुरा समाचारदाता
धनगढी, ११ जेठ । दलित समुदाय आब शक्तिके रुपमे आघे बह्रना जरुरी रहल राष्ट्रिय दलित मुक्ती अभियानके केन्द्रीय प्रेम विसि बटैले बटै ।
विफेक रोज कैलालीके गौरीगंगा नगरपालिकामे हुइल दलित मुक्ती अभियानके क्रममे सम्बोधन करटी उहाँ बाट बटवाइल रहिट । नेपालके संविधानमे दलित समुदायहे हक अधिकार डेहल मने कार्यान्वयन नइहुइल बटैलै । उहाँ कहलै, ‘जातीय छुवाछुट मुक्त घोषणा कागजमे सिमित बा । राज्य, राजनीतिक दलहुक्रे दलित समुदायहे हक अधिकार डेहे नइचाहठै । छुवाछुट अभिन जस्टेक तस्टेक । दलित समुदाय हुइलक कारण विभेद कायम बा ।’
दलित समुदायके बनाइल मठ मन्दिर, भौतिक संरचना, टमान हातहठियार चल्ना, दलित समुदायसे सियल लुगरा घल्ना मने पानी नइचल्ना यी कैसिन विभेद हो, अभियानके संयोजक विसि कहलै ।
दलित मुक्ती अभियान गैरसरकारी, वा कौनो राजनितिक पार्टी नइहो, उहाँ कहलै, ‘दलित समुदायहे अभिन विभेदमे पारल कारण जनचेतनामुलक अभियानके रुपमे आघे बह्राइल हो । अपन हकअधिकारके लाग आब राजनितिक स्वार्थसे उप्पर हुके आवाज उठाई पर्ना मुहमे दही जमाके बैठे नइपरल । आब दलित समुदायके एक ठो शक्तिके रुपमे उडाइ परल ।’
दलित समुदायहे राज्यके हरेक क्षेत्रमेपाछे पारल, दलित हुइल कारण अभिन हिंसामे परल बा । हिंसामे परल हुकनके आवाज सुनुवाई नइहोफे उहाँ बटैलै ।
कार्यक्रमके वडका पहुनामे गौरीगंगा नगरपालिकाके नगरप्रमुख देविदत्त कँडेल, दलित समुदायके अगुवाहुकनके सहभागिता रहे ।
