प्रदेश आमसञ्चार सम्मेलनसे पाँच बुँदे घोषणापत्र जारी
पहुरा समाचारदाता
धनगढी, ११ जेठ । नेपाल पत्रकार महासंघ सुदूरपश्चिम प्रदेशके टेसर अधिवेशन ओ चौठा साधारण सभा तथा प्रदेश आमसञ्चार सम्मेलनसे पाँच बुँदे घोषणा पत्र जारी कैटी सम्पन्न हुइल बा ।
नेपाल पत्रकार महासंघ केन्द्रीउ समितिसे निर्वाचन कार्यतालिका लागू हुइना बेलासम फेन सदस्यताके अन्तिम रुप नैडेके शाखाके अधिवेशन करे नैसेक्ना ओ शाखासे शुद्धिकरण ओ नवीकरण कैके सर्वसम्मत प्रदेश मार्फत पठाइल सदस्यताहे अन्तिम रुप डेके जेठ १३ गते भिट्टर नाउँ सार्वजनिक करे पर्ना जिल्ला शाखाके मागहे समर्थन कैटी पाँच बुँदे घोषणा पत्र जारी करल हो ।
घोषणा पत्रमे प्रदेश सरकारसे प्रदेश सञ्चार ऐन वर्षे सभासे पारित कैके प्रदेश भिट्टर मिडियाके व्यवस्थापन ओ सहयोगके काम आघे बह्रैना माग करल बा । ओस्टके प्रदेश भिट्टरके सक्कु सञ्चार माध्यम जनशक्ति ओ सामाचार सामग्रीके हिसावसे समावेशी बनैना ओ श्रमिकहे न्यूनतम पारिश्रमिक उपलब्ध करैना आग्रह ओ एक व्यक्ति टमान पेशामे संलग्न होके कार्य करेबर पहिचानके चुनौती रहल ओरसे व्यवसायिक मर्यादाभिट्टर रहीके सञ्चार कर्म कैना आग्रह करल बा ।
महासंघके अध्यक्ष योगेश रावलके अध्यक्ष तथा मुख्यमन्त्री दीर्घबहादुर सोडारी बर्का पहुना रहल रहिट । ओस्टके खास पहुनामे नेकपा एमाले प्रदेश संसदीय दलके नेता तथा पूर्व मुख्यमन्त्री राजेन्द्रसिंह रावल, प्रदेश सभा सदस्य शिव सिंह ओली, आन्तरिक मामिला मन्क्रालयके सचिव सुशिल वैद्य लगायत रहल रहिट ।
कार्यत्रममे महासचिव रामसिंह ठगुन्ना सांगठनिक प्रतिवेदन प्रस्तुत करल रहिट । कलेसे कोषाध्यक्ष राम धामी आर्थिक प्रतिवेदन प्रस्तुत करल रहिट । उहाँ आर्थिक बरस २०७८/०७९ मे ३९ लाख ७७ हजार ८४७ रुप्या आम्दानी ओ ४३ लाख आठ हजार ४७६ रुप्या खर्च हुइल जनाइल रहिट ।
आर्थिक बरस २०७९/०८० मे ३२ लाख ३१ हजार ६९८ रुप्या आन्दानी हुइलमे ३८ लाख चार हजार ३०८ रुप्या खर्च हुइल ओ आर्थिक बरस २०८०/०८१ जेठ ९ गतेसम २९ लाख नौ हजार २८३ रुप्या आन्दानी हुइलमे २३ लाख १९ हजार ६२९ रुप्या खर्च हुइल बटाइल रहिट ।
डुसरा अधिवेशनसे निर्वाचित होके आइलपाछे वर्तमान कार्यसमितिसे १५ लाखके पत्रकार स्वास्थ्य उपचार कोष स्थापना ओ ४० लाखके पत्रकार स्वास्थ्य उपचार अक्षय कोष स्थापना कैके श्रमजिवी पक्रकारहुत्रनके स्वास्थय उपचारमे सहयोग करटी रहल कोषाध्यक्ष धामी जानकारी कराइल रहिट ।
ओस्टके उहाँ स्वास्थ्य उपचार कोषसे आर्थिक बरस २०७९/०८० मे २८ जाने पत्रकारहे तीन लाख ३० हजार रुप्या ओ चालु आर्थिक बरस २०८०/०८१ जेठ ९ गतेसम ५५ जाने पत्रकारहे सात लाख ९० हजार रुप्या सहित ८३ जाने पत्रकारहे हालसम १० लाख ९० हजार रुप्या स्वास्थ्य उपचार सहयता प्रदान करल बटैलै ।
इहे बिच सुदूर पश्चिमके पत्रकारिताके विकासके साथे प्रेस तथा अभिव्यक्ति स्वतन्त्रताके रक्षाके लाग निर्वाह करल योगदानके कदर कैटी पत्रकार दीर्घराज उपाध्यायहे सञ्चार गृह पत्रकारिता सम्मानसे सम्मानित करल बा ।
पत्रकार सिद्धराज भट्ट, पत्रकार अर्जुन शाह, राजेन्द्रनाथ, निमेन्द्र शाही, हेमन्ती चौधरी, कर्ण शाह ओ सुदूरपश्चिमके सर्वाधिक रक्तदाता पत्रकार दीपक उपाध्यायहे समेत सम्मानित करले बा ।
