चैतन्य जिल्लास्तरीय अन्तर विद्यालय तेक्वान्दो प्रतियोगिता निम्जल
पहुरा समाचारदाता
धनगढी, १२ जेठ । ‘स्वास्थ्यके लाग खेल, राष्ट्रके लाग खेल’ कना मूल नाराके साथ दुसरा चैतन्य पाठशाला कैलाली जिल्ला स्तरीय अन्तर विद्यालय तेक्वान्दो प्रतियोगिता २०८१ चैतन्य पाठशालाके फुटसलमे विधिवत रुपसे कार्यक्रमके पुरस्कार वितरण तथा समापन हुइल बा ।
जेठ १० गते सुरु हुइल प्रतियोगिता शनिच्चर रोज समापन हुइल हो । टमान तौल समूहके ३७ विद्यालयसे १७९ जाने प्रतियोगीहुकनके सहभागिता रहल रहे । क्रमशः पहिल हुइलहे चालिस हजार ट्रफीसहित प्रमाणपत्र, दुसराहे पच्चीस हजार ट्रफीसहित प्रमाणपत्र ओ टिसरा स्थान हासिल करुइयाहे पन्ध्र हजार ट्रफीसहित प्रमाणपत्र रहल रहे । कलेसे बेस्ट फाइटर एक जनहनहे नगर रु. पाँच हजारसहित प्रमाणपत्र ओस्टे बेस्ट रेफ्रीहेफे नगद रु. पाँच हजारसहित प्रमाणपत्र रहे ।
पुरस्कार तथा पहिल स्थान हासिल कैना सफल डोजाङ सिद्धनाथ मा. वि जुगेडा–१२, दुसरा स्थान हासिल कैना सफल डोजाङ भवानी मा. वि. धनगढी ९ ओ टिसरा स्थान हासिल कैना सफल डोजाङ शारदा मा.वि. जुगेडा– १० रहल बटै । बेस्ट रेफ्री टेक साउँद, बेस्ट प्लेयर विद्या भूषणके पुरुषओरके खेलाडी राजु ऐर ओ महिला ओरसे बेस्ट प्लेयर भवानी मा.वि.से वर्षा कोलीलगायत तिनु जनहनहे नगद रु.५÷५ हजार उत्प्रेरक वक्ता डा. ताराप्रसाद गिरीसे प्रदान करलै ।
विद्यालयके अध्यक्ष गणेश प्रसाद जोशी टिसरा चैतन्य पाठशाला कैलाली जिल्ला स्तरीय तेक्वान्दो प्रतियोगिता २०८२ मे विद्यालयके केल पूर्ण लगानी रना बाट जानकारी डेलै । उ समापन एक समारोहके विच बोल्टी विद्यालयके प्रधानाध्यापक कटक बहादुर सिंह खेल क्षेत्रसे विद्यार्थी अपन राष्ट्रहे चिन्हाई सेक्ना बाट बटैलै । उ कार्यक्रमके सञ्चालन तथा संयोजन विद्यालयके अतिरिक्त क्रियाकलाप संयोजक बिन्दास बम करले रहिट ।
